Sierra Leone yakuyeho ikirego cy'ubugambanyi ku wahoze ari perezida kijyanye n'igerageza rya Coup d'État

    • Umwanditsi, Thomas Naadi
    • Igikorwa, BBC Afurika
  • Yatangajwe
  • Igihe co gusoma: iminota 2

Leta ya Sierra Leone yakuyeho ibirego, birimo n'icy'ubugambanyi, ku wahoze ari Perezida w'icyo gihugu Ernest Bai Koroma, watawe muri yombi bijyanye n'igerageza ryo guhirika ubutegetsi (Coup d'État) ryabaye mu myaka hafi itatu ishize.

Minisitiri ushinzwe gutangaza amakuru Chernor Bah yabwiye BBC ko ibyo birego byakuweho ku mpamvu z'ubuzima.

Koroma, w'imyaka 72, yakomeje guhakana avuga ko nta ruhare yagize muri iryo gerageza ryo guhirika ubutegetsi ryabaye mu Gushyingo (11) mu 2023, ubwo abagabo bitwaje imbunda biraraga mu bubiko bw'intwaro no mu magereza menshi, bakarekura imfungwa hafi 2,000.

Mu kuvuga ku ikurwaho ry'iyo dosiye, Koroma yavuze ku kuntu yakomeje kwizera ko "amahoro, ubutabera n'ubwiyunge buri gihe bigomba gutsinda ingorane".

Mu itangazo yasohoye ku wa kabiri, Koroma yanashimiye Perezida wa Sierra Leone Julius Maada Bio, Perezida wa Nigeria Bola Tinubu n'umuryango w'ubukungu w'Afurika y'uburengerazuba (ECOWAS/CEDEAO) ku bw'ubufasha bwabo.

Nyuma yuko Koroma arezwe ndetse agafungishwa ijisho mu rugo iwe, CEDEAO yagiranye amasezerano na leta ya Sierra Leone, atuma uwo wahoze ari Perezida ajya mu buhungiro muri Nigeria no kuhivuriza.

Nuko umushinjacyaha mukuru atanga ubusabe bwuko urubanza rwa Koroma ruhagarikwa ndetse n'ibirego bigakurwaho, nkuko Minisitiri Bah yabivuze.

Yongeyeho ati: "Ku bw'ibyo, uyu wahoze ari perezida afite uburenganzira bwo kugaruka muri Sierra Leone igihe azahitamo no gukomeza gahunda ze zisanzwe."

Skip Ibisomwa cane and continue reading
Ibisomwa cane

End of Ibisomwa cane

Koroma yategetse Sierra Leone mu gihe cy'imyaka 11 kugeza mu 2018, ubwo Perezida Bio uri ku butegetsi ubu yatorwaga.

Abasivile 11 n'abasirikare 24 bahamwe no kugira uruhare muri iryo gerageza ryo guhirika ubutegetsi ndetse mu 2024 bakatiwe gufungwa igihe kirekire.

Abantu bagera kuri 20 biciwe muri izo mvururu, zabaye hashize amezi atanu habaye amatora yateje impaka yatumye Perezida Bio yongera gutorwa bigoranye kuri manda ya kabiri.

Ibyavuye mu matora byanzwe n'ishyaka rya Koroma ryitwa All People's Congress. Indorerezi zavuye mu mahanga na zo zanenze ayo matora, zivuga ku kuntu ibarura ry'amajwi ritakozwe mu mucyo.