'Ikiganiro cy'ubukana' kuri telephone: Ni iki Trump yabwiye Netanyahu?

Ikiganiro kuri telephone hagati ya Donald Trump na Benjamin Netanyahu, kuri Perezida wa Amerika, cyatumye Israel ihagarika ibitero yari igiye gukora mu duce twa Beirut.

Ni ikiganiro cyavuzwe cyane mu binyamakuru, nubwo hari amakuru atandukanye avuga ku buryo icyo kiganiro cyari kimeze, harimo ayemeza ko Trump yakariye cyane Netanyahu.

Uko Donald Trump abivuga:

Perezida Trump yavuze ko ikiganiro na Benjamin Netanyahu cyatanze "umusaruro cyane".

Yanditse ku mbuga nkoranyambaga ko yasabye Netanyahu kutagaba "igitero gikomeye" kuri Beirut, kandi ko Netanyahu yahise asaba "ingabo ze gusubira inyuma".

Trump yavuze kandi ko nyuma yo kuvugana n'abahagarariye umutwe wa Hezbollah, ubu Israel na Hezbollah bumvikanye kutongera kurasana.

Ikiganiro kuri telephone cya Netanyahu na Trump cyije nyuma yo kuburira kwinshi kw'abategetsi ba Iran ko izahora ku bindi bitero byagabwa kuri Beirut.

Nyuma yo gutangaza agahenge gashya hagati ya Hezbollah na Israel, Trump yatangaje kandi ko "hari intambwe zihuse" zatewe mu biganirona Iran.

Mbere y'aya makuru, Iran yari yatangaje ko izivana mu mishyikirano na Amerika, ndetse ibiro ntaramakuru Tasnim byo muri Iran byanavuze ko gutumanaho hagati ya Iran na Amerika biciye ku ntumwa bihagaze.

Uko Benjamin Netanyahu abivuga:

Minisitiri w'intebe wa Israel nawe yavuze uko ikiganiro cye kuri telephone na Perezida Trump cyagenze.

Nyuma y'ikiganiro yagiranye na X-Net, Netanyahu yashimangiye ko "Uruhande rwacu ntabwo rwahindutse".

Yanditse ati: "Nijoro navuganye na Perezida Trump mubwira ko niba Hezbollah idahagaritse ibitero byayo ku mijyi n'abaturage bacu, Israel izarasa ibirindiro by'iterabwoba muri Beirut"

Netanyahu yasubiyemo ko ibikorwa bya gisirikare by'ingabo za Israel mu majyepfo ya Liban "bizakomeza nk'uko byateguwe".

Axios ivuga ko Trump yavuganye "ubukana":

Urubuga rw'amakuru Axios ruvuga ko, ku byo rukesha amasoko abizi neza mu butegetsi, Donald Trump yakoresheje amagambo akomeye abwira Netanyahu muri icyo kiganiro cyabo, anenga ibitero birushijeho bya Israel kuri Liban.

Axios ivuga ko Trump yibukije Netanyahu iby'urubanza rwa ruswa akurikiranyweho mu nkiko zo muri Israel.

Axios isubiramo amasoko y'amakuru avug ako Trump yabwiye Netanyahu muri aya magambo:

"Uri umusazi. Iyo bitaba ku bwa njye, ubu wari kuba uri muri gereza…Abantu bose barakwanga ubu. Abantu bose banga Israel kubera ibi.

Axios ivuga ko Trump yagize uburakari kandi ahantu hamwe muri icyo kiganiro ko yavugiye hejuru abwira Netanyahu amukankamira amubaza ku byo arimo gukora.

Trump kandi muri icyo kiganiro ngo yinubiye umubare munini w'abasivile bamaze gupfa muri Liban kandi anenga Israel ku gusenya inyubako yose mu gihe yari igambiriye kwica umukomanda wa Hezbollah.

Inkuru nyamukuru z'ibinyamakuru byinshi, harimo n'ibyo muri Israel, byibanze kuri iki kiganiro kuri telephone n'ibyakivugiwemo bishingira cyane cyane ku makuru yatanzwe n'abazi uko byagenze.