RD Congo: Umuforomo yiciwe mu gitero mu gihe abanduye Ebola bari hafi kugera ku 10,000

Umuforomo umwe yishwe naho undi mukozi w'ubuzima arakomereka bikomeye mu gitero cyabereye mu majyaruguru ashyira uburasirazuba bwa Repubulika ya Demokarasi ya Congo (RDC), mu gihe igihugu gikomeje guhangana n'icyorezo cya Ebola kimaze kwanduza abantu hafi 10,000.

Radio Okapi, iterwa inkunga n'Umuryango w'Abibumbye, yatangaje ko icyo gitero cyabaye ku wa gatandatu mu mujyi wa Bafwasende, mu ntara ya Tshopo.

Amakuru avuga ko abo bakozi babiri b'ubuzima batewe n'urubyiruko rwo muri ako gace rwabashinjaga kwanduza amasoko y'amazi no gukwirakwiza virusi ya Ebola.

BBC yagerageje kuvugana n'itsinda rishinzwe kurwanya Ebola kugira ngo rigire icyo rivuga kuri icyo gitero, ariko nta gisubizo yari yabona.

Ishami ry'Umuryango w'Abibumbye ryita ku buzima (OMS/WHO) ryamaganye icyo gitero.

Mu butumwa yatangaje ku mbuga nkoranyambaga, umukuru wa OMS Dr Tedros Adhanom Ghebreyesus, yavuze ko abakozi b'ubuzima bagomba gukora akazi kabo batekanye kandi bubashywe, yongeraho ko bakwiye guhora barindwa.

OMS yanihanganishije umuryango w'uwo muforomo wishwe n'abo bakoranaga, inifuriza gukira vuba umukozi wakomeretse.

Iki gitero kibaye mu gihe inzego z'ubuzima zasohoye raporo nshya ku cyumweru igaragaza ko icyorezo cya Ebola gikomeje kwiyongera.

Itsinda ryo mu biro bya perezida wa RDC rishinzwe kurwanya Ebola rivuga ko kugeza ku itariki ya 24 Ukwakira (10) igihugu cyari kimaze kugaragaramo abantu 9,964 bemejwe ko banduye Ebola, mu gihe 4,841 bemejwe ko ari bo bamaze kwicwa na yo.

Ibi bivuze ko umubare w'abanduye ushobora kurenga 10,000 mu gihe cya vuba cyane kuva iki cyorezo gitangajwe ku itariki ya 15 Gicurasi (5) uyu mwaka.

Muri iyo raporo, inzego z'ubuzima zatangaje ko habonetse abantu 88 bashya banduye Ebola ndetse hapfa abandi 38 muri icyo gihe. Muri abo bapfuye, 26 bapfiriye mu ngo, mu gihe 12 bapfiriye mu bigo bivura abarwayi ba Ebola.

Abanduye bashya bagaragaye mu ntara za Ituri, Kivu ya Ruguru na Haut-Uélé.

Intara ya Ituri ni yo yibasiwe cyane n'iki cyorezo kuko yihariye 72% by'abanduye bose kuva iki cyorezo cyatangira, mu gihe Kivu ya Ruguru yo ikomeje kugira umubare munini w'abapfa bazize Ebola.

Mu kiganiro n'abanyamakuru ku wa gatanu, Dr Wessam Mankoula ukora mu kigo cy'Afurika gishinzwe kurwanya no gukumira indwara (Africa CDC), yavuze ko kuva iki cyorezo gitangiye, abakozi b'ubuzima 300 bamaze kwandura Ebola, muri bo 48 ikaba yarabishe.

Icyorezo kiriho ubu, giterwa n'ubwoko bwa virusi ya Ebola buzwi nka Bundibugyo, kimaze gukwira mu turere 66 tw'ubuzima, two mu ntara umunani za RDC.

Abategetsi bavuga ko bakomeje gushyira imbaraga mu gukorana n'abaturage, guhangana n'amakuru y'ibinyoma n'imyumvire itari yo ku bijyanye na Ebola, ndetse no gufata ingamba zigamije kugabanya ikwirakwira ry'iyi ndwara.