Mexique: Umukuru w'abacuruza ibiyobyabwenge wari uri ku rutonde rw'abantu 10 bashakishwa cyane na FBI yatawe muri yombi

    • Umwanditsi, Tara Mewawalla
  • Yatangajwe
  • Igihe co gusoma: iminota 3

Umukuru w'abacuruza ibiyobyabwenge wari uri ku rutonde rw'abantu 10 bashakishwa cyane n'urwego rw'ubugenzacyaha rw'Amerika (FBI) yatawe muri yombi nyuma yo kurasana n'abasirikare ba Mexique.

Fausto Isidro "Chapo Isidro" Meza Flores n'abandi bantu barindwi bafashwe ku wa gatanu n'umutwe wihariye wo mu ngabo za Mexique, mu mujyi wa Guasave, muri leta ya Sinaloa, nkuko bitangazwa na minisiteri y'ingabo za Mexique.

Iyo minisiteri yongeyeho ko abacyekwa barindwi biciwe muri icyo gikorwa cya gisirikare, ndetse n'abasirikare bane ba Mexique, bari barimo kujya gukaza umutekano i Guasave, na bo bishwe.

Meza Flores yashakishwaga muri Mexique kubera ibirego by'ubugizi bwa nabi buteguwe, mu gihe FBI imushinja "kurunda muri Amerika [ibiyobyabwenge bya] fentanyl, cocaine, heroin n'ibindi biyobyabwenge byica". Amerika irimo gushaka ko yoherezwayo.

Mexique yongereye ibikorwa byo kurwanya ubugizi bwa nabi bushingiye ku biyobyabwenge, nyuma yuko yocyejwe igitutu na Perezida w'Amerika Donald Trump kuva asubiye ku butegetsi mu mwaka ushize.

Meza Flores, umukuru w'igico cyitwa 'Meza Flores Organisation', kinazwi nka 'Guasave Cartel', byibazwa ko yatangiye gucuruza ibiyobyabwenge kuva mu myaka ya 1990 ariko yari yarashoboye kugenda akwepa abategetsi, kugeza ubwo yafatwaga ku wa gatanu, akaba yari yarabishoboye kubera ko muri rusange atigaragazaga mu ruhame nk'umuntu ukomeye.

Yafashwe gute?

Bashingiye ku makuru y'ubutasi bahawe n'Amerika ajyanye n'ahantu yari aherereye, abasirikare bo mu mutwe wihariye wo mu ngabo za Mexique berekejeyo "bucece kandi mu buryo butunguranye", bashyiraho uruzitiro rwo kumubuza gutoroka no gutuma hataza abo kumutabara, nkuko bivugwa na minisiteri y'ingabo za Mexique.

Iyo minisiteri yongeyeho ko ariko abo basirikare "bagabweho igitero cy'amasasu n'ibiturika" mbere yuko binjira aho hantu, nuko bata muri yombi Meza Flores.

Videwo zahererekanyijwe ku mbuga zo kuri murandasi (internet) uko bigaragara zerekana indege za kajugujugu zirimo kurasa urufaya rw'amasasu ku butaka i Guasave. Izindi videwo, uko bigaragara, zerekana abantu bari mu kibuga cy'umukino wa baseball barimo guhunga ubwo bumvaga urusaku rw'amasasu.

Bose hamwe, abantu umunani batawe muri yombi, barimo uwungirije Meza Flores akaba ari na mubyara we, muramu we, uyu akaba ari na we wari ushinzwe imari muri icyo gico, nkuko minisiteri y'ingabo yabivuze.

Meza Flores, mubyara we na muramu we bajyanwe n'indege mu mujyi wa Mexico, umurwa mukuru wa Mexique, kugira ngo baburanishwe, nkuko minisiteri y'ingabo yabivuze. Abo bandi batanu bagumishijwe muri leta ya Sinaloa.

Mu mwaka wa 2025, ubwo Meza Flores yongerwaga ku rutonde rwa FBI rw'abantu ishakisha cyane, yashinjwaga "ibyaha ndengakamere" birimo ubushimusi, ubwambuzi n'iyicarubozo.

Icyo gihe, uwari umuyobozi w'agateganyo wa FBI, Brian Driscoll, yavuze ko Meza Flores n'igico cye banateje muri Amerika "icyago cy'ibiyobyabwenge binyuranyije n'amategeko" binyuze ku mupaka wayo wo mu majyepfo ihana na Mexique.

Mbere, yarezwe ubucuruzi bw'ibiyobyabwenge muri Amerika mu mwaka wa 2012, yongera kuregwa mu mwaka wa 2019.

Meza Flores, w'imyaka 44, ashinjwa kuba yaracuze umugambi wo gukora no gukwirakwiza ibiyobyabwenge byinshi bya cocaine, heroin, methamphetamine n'urumogi hagati y'umwaka wa 2005 n'uwa 2019.