Ayavugwa mu mupira w'amaguru: Bellingham yemeye amasezerano mashasha na Real Madrid
Ahavuye isanamu, Getty Images
Jude Bellingham, umukinyi wo hagati mu murwi nserukiragihugu w'Ubwongereza akagira imyaka 23, yumvikanye na Real Madrid ku bijanye no kwongereza amasezerano yiwe gushika mu mwaka wa 2031. (AS – in Spanish)
Arsenal na Liverpool zoshobora kuba zitegerezwa kuriha amafaranga arenga imiliyoni 60 z'ama Pound kugira ngo zironke Kevin Schade, umukinyi w'inyuma ku ruhande afise imyaka 24, akinira Brentford akaba kandi ari mu murwi nserukiragihugu w'Ubudagi. (Teamtalk)
Leeds United iriko ikurikiranira hafi uko ivy'umukinyi w'imbere wa Marseille, Igor Paixão, akomoka muri Brésil, vyifashe. Uwo mukinyi w'imyaka 26 ari mu bakinyi uwo mugwi wo mu Bufaransa ushobora kuzobwirizwa kugurisha kubera ingorane z'amahera ifise. (Football Insider)
Chelsea, Manchester United, Arsenal, Liverpool na Bayern Munich bariko barakurikirana cane uko ibintu vyifashe ku mukinyi w'inyuma w'umurwi nserukiragihugu w'Ubufaransa, Jules Koundé, akinira Barcelona. Uwo mukinyi w'imyaka 27 ariko ariyumvira kazoza kiwe muri uwo mugwi wo muri Catalogne. (4-4-2.ch - German)
Barcelona ntishaka kwinjira mw'isiganwa ryo kurondera JJ Gabriel, umukinyi w'imyaka 16 akinira Manchester United, akina hagati ariko akaba n'umusatirizi. Imirwi Real Madrid na Paris Saint-Germain yiteguriye gutanga amahera menshi gusumba kugira ngo ironke uwo mukinyi. (Sport)
Newcastle United ntiratera imbere mu biganiro vyo kwumvisha Joe Willock, umukinyi wo hagati w'imyaka 27 ari mu murwi nserukiragihugu w'Ubwongereza, gusinya amasezerano mashasha. Ariko rero, umumenyereza wa Newcastle, Matthias Jaissle, arashima ubushobozi bw'uwo mukinyi. (Newcastle Chronicle)
Max Eberl, ajejwe igisata c'inkino muri Bayern Munich, yavuze ko ibiganiro n'umusatirizi w'Ubwongereza, Harry Kane, ku bijanye no kwongereza amasezerano yiwe biriko bigenda neza, naho ata masezerano mashasha arashikwako ku mugaragaro. (Sky Sports Germany – in German)
Real Madrid irashobora kureka Brahim Díaz, umukinyi w'imbere w'imyaka 27 akomoka muri Maroc, akaja gukinira uwundi murwi ku ntizanyo mu gihe co kugurisha abakinyi muri Nzero (1). Ivyo bishitse inyuma y'uko Endrick, umusatirizi w'imyaka 20 akomoka muri Brésil, amurushije amahirwe yo gukina muri uwo murwi. (Marca)
