Partey yangiwe kwinjira muri Canada ku mukino ubanza wa Ghana mu gikombe cy'isi
Ahavuye isanamu, Getty Images
- Umwanditsi, Steve Sutcliffe
- Igikorwa, Umunyamakuru wa BBC Sport
- Umwanditsi, Dan Roan
- Igikorwa, Umwanditsi mukuru ku mikino
- Yatangajwe
- Igihe co gusoma: iminota 3
Thomas Partey, umukinnyi wo hagati w'ikipe y'igihugu y'umupira w'amaguru ya Ghana, ntazakina umukino wa mbere w'iyo kipe uzabera i Toronto uzayihuza na Panama ku wa kane, mu mikino y'igikombe cy'isi, nyuma yuko yangiwe kwinjira muri Canada.
Partey, w'imyaka 33, yahakanye ibirego birindwi aregwa byo gufata abagore ku ngufu n'ikirego kimwe cy'ihohotera rishingiye ku gitsina, bijyanye n'ibirego byatanzwe n'abagore bane banyuranye ku bivugwa ko byabereye mu Bwongereza hagati y'umwaka wa 2020 n'uwa 2022.
Biteganyijwe ko aburanishwa mu mwaka utaha.
Mu itangazo yasohoye, impuzamashyirahamwe y'umupira w'amaguru ku isi (FIFA) yemeje ko uwo mukinnyi wahoze akinira Arsenal, ubu ukinira ikipe ya Villarreal yo muri Espagne, atazashobora kuva aho ikipe ya Ghana ikorera imyitozo i Boston muri Amerika, aho ari kuri ubu, nyuma yuko "ubusabe bwa viza bwe bwanzwe na leta ya Canada".
Iyi mpuzamashyirahamwe yongeyeho iti: "FIFA nta ruhare igira muri gahunda z'abinjira mu gihugu z'ibihugu byakiriye [irushanwa], harimo n'icyemezo kuri za viza.
"Leta yakiriye [irushanwa] ni yo ifite ijambo rya nyuma ku muntu wo guha viza akemererwa kwinjira mu gihugu."
Ku rubuga rwa leta ya Canada, amategeko ajyanye no gusura icyo gihugu agira ati: "Niba warakoze cyangwa warahamwe n'icyaha, ushobora kutemererwa kwinjira muri Canada."
Partey yahakanye ibirego byose aregwa ndetse nta cyaha cyamuhamye ariko ategereje iburanisha ry'urubanza rwe.
Mu itangazo cyahaye BBC, ikigo cya leta ya Canada gishinzwe abinjira mu gihugu, impunzi n'ubwenegihugu cyagize kiti: "Canada itewe ishema no kuba igihugu cyakiriye igikombe cy'isi cya FIFA cya 2026 ndetse irimo gukora mu gutuma irushanwa rigenda neza ari na ko ibungabunga umutekano w'Abanya-Canada.
"Canada yakomeje kuvuga ko kwakira amarushanwa akomeye bidahindura amategeko ya Canada yo kwinjira mu gihugu.
"Umuntu wese ushaka kuza muri Canada asuzumwa ku giti cye, hashingiwe ku makuru y'ukuri ahari ndetse n'amategeko abigenga."
Umutegetsi wo mu biro bya gasutamo no kurinda imipaka by'Amerika yongeyeho ati: "Amerika irabizi ko hari urubanza rutaraba rwa Bwana Partey ariko, kuri ubu, ntarahamwa n'icyaha ndetse yemerewe [kwinjira] muri Leta Zunze Ubumwe [z'Amerika] nyuma yo guhabwa viza..."
Uwo mutegetsi yavuze ko urwo rwego rw'Amerika rwubaha icyemezo cya Canada cyo kumwima viza yo kwinjira muri Canada.
Minisitiri w'imikino muri Ghana Kofi Adams yavuze ko icyo cyemezo cya Canada gitunguranye kuko nubwo hari ibirego kuri Partey, yabaye arekuwe by'agateganyo hatanzwe ingwate mu Bwongereza kandi akaba agishobora kwambuka imipaka y'ibihugu binyuranye agiye gukina muri Espagne nta kibazo ahuye na cyo.
BBC Sport yasabye ishyirahamwe ry'umupira w'amaguru muri Ghana kugira icyo ribivugaho.
Ibi bibaye kuri Partey si byo bya mbere birimo uruhare rw'abategetsi bo mu bihugu byakiriye iri rushanwa – ari byo Amerika, Mexique na Canada – mu gihe iri rushanwa ryatangiye.
Rutahizamu Aymen Hussein w'ikipe y'igihugu ya Iraq yahaswe ibibazo mu gihe cy'amasaha menshi ku kibuga cy'indege cy'i Chicago, nyuma aza kwemererwa kwinjira muri Amerika.
Ikipe y'igihugu ya Iran byabaye ngombwa ko ihindura aho ikorera imyitozo ijya kuyikorera muri Mexique, amatike y'abafana bayo aburizwamo, mu gihe abategetsi baherekeje iyo kipe bimwe viza.
Hagati aho, umusifuzi w'Umunya-Somalia Omar Artan yangiwe kwinjira muri Amerika kubera "isano afitanye n'abacyekwaho kuba mu mitwe y'iterabwoba", nkuko uwatanze amakuru wo mu butegetsi bwa Perezida Donald Trump yabivuze.
