Ifunguro rya nimugoroba n'abanyamakuru ryo muri White House, ryumvikanyemo amasasu, ni iki?

    • Umwanditsi, Bernd Debusmann Jr
    • Igikorwa, Umunyamakuru wa BBC muri White House
  • Igihe co gusoma: iminota 2

Muri iyi myaka ishize, ugusangira ifunguro rya nimugoroba n'abanyamakuru batara amakuru mu biro bya Perezida w'Amerika, rizwi nka 'White House Correspondents' Dinner', byahindutse ibirori byo kwigaragaza no kumenyana n'abakomeye, byitabirwa n'abategetsi bo muri leta hamwe n'ibyamamare.

Uretse iryo funguro rya nimugoroba, icyumweru cyose kiba cyaranzwe n'ibirori binyuranye i Washington DC, byateguwe n'ambasade zinyuranye, imiryango (ibigo) n'ibitangazamakuru.

Ariko mu mutima w'iki gikorwa, iri funguro riba rigamije gukusanyirizwamo amafaranga yo gufasha abanyeshuri bakiri bato biga itangazamakuru mu bice binyuranye muri Amerika batanga icyizere cyo kuzaba abanyamakuru bakomeye, bahabwa imfashanyo y'amafaranga ivuye mu ishyirahamwe ry'abanyamakuru batara amakuru muri White House, ryitwa 'White House Correspondents' Association'.

Buri munyeshuri muri bo ahuzwa n'umunyamakuru wo kumutoza iby'umwuga, wo muri iryo shyirahamwe kandi akaba ari umunyamakuru utara amakuru muri White House. Bose bahabwa ubutumire bwo kujya muri uko gusangira ifunguro.

Uyu mwaka, cyo kimwe no mu mwaka ushize, natoje umwuga w'itangazamakuru umwe muri abo banyeshuri, umukobwa w'umuhanga kandi uhora yishimye.

Yambwiye ko we n'abandi banyeshuri bahungabanye ariko ko batekanye. Ni nyuma yuko amasasu yumvikanye ku wa gatandatu nijoro muri Hoteli Hilton, muri ibyo birori byari byitabiriwe na Perezida w'Amerika Donald Trump n'umugore we Melania.

Abo banyeshuri ntibari biteze na rimwe ko ifunguro rya nimugoroba ryarangira igitaraganya mu gikorwa cyo kurasa.