Ibyavuzwe ku munsi wa nyuma mu rukiko rukuru mbere yuko Béatrice Munyenyezi uregwa jenoside akatirwa

Mu rukiko rukuru ku wa gatatu, ubushinjacyaha bwasabye ko igihano cyo gufungwa burundu Béatrice Munyenyezi yari yarakatiwe mbere kigumishwaho, mu gihe uruhande rwe rwavuze ko ibimenyetso byatanzwe n'ubushinjacyaha bidafatika.

Munyenyezi arimo kujuririra icyo gihano yakatiwe mu 2024 ahamijwe ibyaha bine birimo gukora jenoside n'ubufatanyacyaha muri jenoside mu mujyi wa Butare mu majyepfo y'u Rwanda. We ahakana ibyo aregwa.

Munyenyezi yoherejwe mu Rwanda mu 2021 na Leta Zunze Ubumwe z'Amerika aho yari amaze igihe afungiye ku byaha byo kubeshya urwego rw'abinjira n'abasohoka.

Mu kumva bwa nyuma iburanisha mu bujurire mu rukiko rukuru, kuwa gatatu humviswe ubushinjacyaha, bwavuze ko abashinje Munyenyezi bavuze ibyo biboneye n'amaso kandi batibeshye ku wo bashinja.

Munyenyezi yarezwe kwica abantu bane ubwe abarashe n'imbunda nto (pistolet), gushinga bariyeri yicirwagaho Abatutsi no gushishikariza Interahamwe gusambanya abagore ku gahato mbere yo kubica.

Abashinjacyaha bagarutse cyane ku iyicwa ry'umubikira nyuma yo gusambanywa n'Interahamwe mu cyumba cyo hasi cy'iyahoze ari Hoteli Ihuriro i Butare, nyuma akicwa na Munyenyezi ubwe amurashe, nkuko umwe mu batangabuhamya yabivuze mu rubanza mu mizi.

Uruhande rwa Munyenyezi rwavuze ko abamushinja baranzwe no kudahuza no kuvuguruzanya haba mu gihe no mu buryo uwo mubikira yishwemo, mu gihe ngo bavuga ko babonye ibyabaye kuri iyo bariyeri.

Umushinjacyaha we yavuze ko urukiko rusanze harimo kudahuza kw'abatangabuhamya, rwabifata nko "kudahuza ku tuntu duto" nk'amatariki.

Munyenyezi mbere yireguye avuga ko mu gihe cya jenoside yari atwite akuriwe, ko atigeze ajya kuri za bariyeri kandi ko atagize uruhare urwo ari rwo rwose mu bwicanyi.

Munyenyezi – umugore wa Arsène Shalom Ntahobali akaba n'umukazana wa Pauline Nyiramasuhuko bombi bahamijwe ibyaha bya jenoside – yagiye anenga abamushinja kugerageza kumusanisha n'ibyashinjwe abo bo mu muryango we, avuga ko nta ho ahuriye na byo.

Kuri uyu wa kane urukiko ruraha umwanya uruhande rwa Munyenyezi.

Nyuma yo kumva impande zombi, urukiko rwanzuye ko umwanzuro kuri uru rubanza uzasomwa ku itariki 30 y'ukwezi kwa Nyakanga (7).