Rwanda: Umukuru w'ikigo cy'ubuziranenge bw'ibiribwa n'imiti yatawe muri yombi bijyanye n'inzoga 'zitujuje ubuziranenge'
Ahavuye isanamu, RWANDA FDA
- Umwanditsi, Didier Bikorimana
- Igikorwa, BBC Gahuzamiryango
- Yatangajwe
- Igihe co gusoma: iminota 3
Umuyobozi mukuru w'ikigo cy'u Rwanda kigenzura ubuziranenge bw'ibiribwa n'imiti (Rwanda Food and Drugs Authority, FDA) yatawe muri yombi bijyanye n'ifungwa ry'inganda zakoraga inzoga abategetsi bavuga ko zitujuje ubuziranenge, nkuko amakuru yo mu bitangazamakuru byo mu Rwanda abivuga.
Profeseri (Prof) Emile Bienvenu ni umwe mu bantu 18 batawe muri yombi.
Amakuru yo mu bitangazamakuru byo mu Rwanda avuga ko Prof Bienvenu n'abandi bo mu nzego za leta berekanywe kuri uyu wa kane ku cyicaro cy'urwego rw'ubugenzacyaha (RIB) i Kigali. Ntihatangajwe igihe batawe muri yombi.
BBC Gahuzamiryango yandikiye umuvugizi wa RIB imusaba kugira icyo avuga kuri abo batawe muri yombi.
Amafoto yatangajwe mu bitangazamakuru byo mu Rwanda uko bigaragara yerekana Prof Bienvenu ari ku mapingu ahagararanye n'irindi tsinda ry'abantu mu nzu, inyuma yabo hari icyapa cya RIB.
Ibi bibaye mu gihe ibikorwa bya leta byo guhashya izo nzoga zivugwa ko zitujuje ubuziranenge byakajije umurego kuva mu bihe bya vuba aha bishize, aho inganda zirenga 100 zakoraga izo nzoga zamaze gufungwa, n'abantu babarirwa muri za mirongo batabwa muri yombi.
Prof Bienvenu ni umuyobozi mukuru wa Rwanda FDA guhera muri Kanama (8) mu mwaka wa 2021. Mbere yaho yari umwarimu mu ishami ry'ibijyanye n'imiti kuri Kaminuza y'u Rwanda.
Igitangazamakuru cya leta (RBA) kivuga ko abo bashinjwa kugira uruhare mu ikorwa ry'inzoga zitujuje ubuziranenge, zizwi mu Rwanda nk'ibyuma. Abategetsi bavuga ko zimaze kwica abantu bagera kuri 50 kuva mu ntangiriro y'uyu mwaka kandi ko umubare nyawo ushobora kuba ari munini kurushaho.
Mu ntangiriro y'uku kwezi, Minisitiri w'ubuzima Dr Sabin Nsanzimana yabwiye RBA ko ikibazo cy'izo nzoga asanga ari "icyorezo mu bindi", yongeraho ko amavuriro yo mu gihugu yari amaze kwakira abantu barenga 500 bayagannye kubera ibibazo bifitanye isano n'izo nzoga n'ibindi binyobwa.
Benshi bakomeje kwibaza ukuntu izo nganda zashoboye kumara imyaka zikora zifite ibyangombwa byemewe n'ubutegetsi, bagacyeka ko hashobora kuba hari izindi mpamvu zishobora kuba zihishe inyuma y'ifungwa ryazo.
