Ibyo wamenya ku ndege y'urwego rwo hejuru Trump yahawe na Qatar

Perezida wa Amerika, Donald Trump, yasuye indege nshya ivuguruye ya perezida, yahawe na Qatar mu mwaka ushize, avuga ko ari "indege nziza cyane ku isi." Iyi ndege izasimbura indege ebyiri za perezida zitwa Air Force One ubu zikaba akazi kazo karararangiye.

Air Force One yamye ari ikimenyetso cy'ububasha n'icyubahiro bya Amerika, kandi si uburyo bwo gutwara perezida gusa. Iyi ndege yanabonye umwanya wayo mu muco w'Abanyamerika, aho filime "Air Force One" ivuga ku ifatwa ry'indege na perezida wa Amerika.

Iyo ndege ihora ifite ibimenyetso by'ububasha bwa Amerika n'ishema ry'igihugu, harimo amagambo "United States of America" ibendera rya Amerika, n'ikirango cya Perezida wa Leta Zunze Ubumwe za Amerika.

Donald Trump yagenzuye iyi ndege nshya ya Boeing 747 yahawe na Qatar mu kigo cya Georgetown muri Maryland.Indege igiye mu itsinda ry'indege zakoreshejwe n'abaperezida ba Amerika.

"Iyi ni yo ndege nziza cyane ku isi. Yakozwe ku rugero dushobora kutazongera kubona" Donald Trump yabwiye abari aho ubwo yatangizaga ku mugaragaro ikoreshwa ry'iyi indege nshya muri icyo kigo.

Trump yongeheho ati: "Byose byateguwe neza. Nibyo nshaka kuvuga. Nkunda amabara y'ibendera rya Amerika, wowe bite? Biratanga igisobanuro cyumvikana."

Gahunda yo kuvugurura iyi ndege yo mu bwoko bwa Boeing nini cyane kugirango igiremo ibyangombwa byihariye bigenewe perezida wa Amerika yararangiye. L3 Harris, ikigo cyahawe amasezerano na Minisiteri y'Ingabo ya Amerika, ni cyo cyari gishinzwe kuvugurura.

Kuhagera kw'indege ni ikimenyetso gishya mu ngendo z'indege za perezida. Donald Trump yizeye ko azatwara indege ijya ku musozi wa Rushmore mbere y'itariki ya kane Nyakanga, isabukuru y'imyaka 250 Leta Zunze Ubumwe za Amerika imaze nki gihugu .

Yavuze kandi ko yifuza kubona indege iguruka hejuru y'umutwe wa Capitol ku munsi w'ubwigenge.

Ubushobozi butangaje bw'indege

Perezida wa Leta Zunze Ubumwe za Amerika agomba kuba yiteguye kujya mu gice icyo ari cyo cyose cy'isi igihe icyo ari cyo cyose, kandi mu bihe by'amakuba cyangwa intambara, akaba afite ubushobozi bwo gukurikirana politiki, ndetse n'umutekano by'igihugu aho ari ho hose, ndetse no mu kirere.

Agace ka Airforce One kakaba kagomba kuba gafite umutekano, kandi gafite ibikoresho bihagije kugira ngo gashobore kugenzura ibintu byose, harimo n'intwaro za nikleyeri za Amerika. Aka ni ko kazi Air Force One ishinzwe.

Nk'uko bigaragara ku rubuga rwa interineti rwa White House, mu gice cy'ubutumwa bwa Perezida bwo gutwara abantu n'ibintu, ijambo "Air Force One" ntirivuga indege runaka. Mu buryo bw'ikoranabuhanga, izina ryerekeza ku ndege iyo ari yo yose y'ingabo zirwanira mu kirere za Amerika itwara Perezida wa Leta Zunze Ubumwe za Amerika, Umugaba Mukuru w'Ingabo.

Nk'uko urubuga rubivuga, iyi ndege ihuza ubushobozi budasanzwe, imbaraga, n'ubwiza budasanzwe. Bumwe muri ubwo bushobozi ni ubushobozi bwayo bwo kongeramo lisansi mu kirere, ibyo bikaba biyiha ubushobozi buhambaye, bigatuma itwara perezida aho ari ho hose ku isi ndetse ikanamurinda igitero cya nikleyeri.

Mu buryo bwa tekiniki, iyi ndege ifite ibikoresho na sisitemu by'ikoranabuhanga bigezweho kandi ishobora kwihanganira imivuduko ya electromagnetic iterwa n'ibitero bya misile n'ibisasu bya kirimbuzi.

Nubwo sisitemu nyinshi zo kuyirinda zishyirwa mu byiciro, iyi ndege ifite uruhererekane rw'asisitemu zo kwirinda za infrarouge no kwirinda ibisasu birashwa mu kirere no ku butaka.

Bakoresha kandi ubwoko bwa jammer yohereza imirasire yahinduwe kugira ngo ihagarike ibyuma by'ubuhanga bya misile, bikuraho ubushobozi bwo kumenya ubushyuhe buturuka kuri moteri y'indege.

Indege kandi ifite ibikoresho by'itumanaho bigezweho kandi by'umutekano, birimo sisitemu za radiyo nyinshi zo gutumanaho hagati y'ikirere n'ikirere, itumanaho hagati y'ikirere n'ubutaka, hamwe n'itumanaho rya satelite.

Inafite imirongo 87 ya telefoni y'imiyoboro itatu itandukanye.

Kubera iyo mpamvu, ishobora guhindurwa itumanaho ryayo rya telefoni mu gihe cy'intambara cyangwa ibitero bya nikleyeri kuri Leta Zunze Ubumwe za Amerika, kandi perezida ashobora kuvugana n'abaturage akoresheje indege igihe icyo ari cyo cyose.

Ku bijyanye n'ubuso bw'imbere, perezida n'abamufasha be bafite ubuso bwa metero kare 372 mu magorofa atatu. Harimo icyumba kinini cya perezida gifite ibiro, ubwiherero n'icyumba cy'inama.

Indege ifite kandi icyumba cy'ubuvuzi gishobora guhindurwamo icyumba cyo kubaga, umuganga ahoramo.

Air Force One ifite ibikoni bibiri byuzuye bishobora guteka amafunguro y'abantu barenga 100 icyarimwe, kandi inatanga amacumbi ku bafasha ba perezida, barimo abajyanama bakuru, abajenerali, abakozi burwego rurindi umukuru w'igihugu ( Secret Service), abanyamakuru n'abandi bashyitsi.

Uruhare rwa Qatar

Mu mwaka ushize, igikorwa cyo gutegura indege nshya ya perezida cyakomeje gusuzumwa no gukemangwa n'abadepite b'impande zombi, ndetse na bamwe mu bashinzwe umutekano.

Abayinenga bashidikanyije ku cyemezo cya Donald Trump cyo kwakira impano ihenze yatanzwe na Qatar ndetse bagaragaza impungenge ku ngaruka zishobora guterwa n'umutekano.

Byasabaga impinduka zikomeye kugira ngo iyi ndege isimbure indege ya perezida. Ingabo zirwanira mu kirere zavuze ko ikiguzi cy'izo mpinduka kizaba kiri munsi ya miliyoni 400 z'amadolari.

Ariko, hari impungenge mu mpuguke zimwe na zimwe ko ishobora kuba idafite umutekano nk'indege za perezida zisanzweho.

Minisitiri w'Ingabo zirwanira mu kirere, Troy Mink, yagize ati: "Umutekano w'Umugaba Mukuru w'Ingabo ni wo dushyira imbere cyane." Kuva mu ntangiriro, twasuzumye twitonze ibisabwa byose.

Umuyobozi mu biro bya Perezida w'Amerika White House yirengagije ibibazo bijyane no kunenga agaciro, amategeko n'umutekano ku mpano y'indege ya Qatar, harimo n'impamvu impano ya miliyoni 400 z'amadolari yatanzwe n'igihugu cy'amahanga yemewe.

Mu kiganiro n'abanyamakuru cyabereye muri White House, Donald Trump yibasiye cyane umunyamakuru wabajije agaciro k'indege ya Qatar n'impamvu yayemeye.

'Guhagarikwa burundu'

Indege ya kabiri ya Boeing ya perezida yahinduwe yahagaritse ingendo zayo ku mugaragaro kuwa kane tariki ya 19 Kamena(6), nyuma y'uko Donald Trump agarutse avuye mu nama ya G7 mu Bufaransa.

Iyo ndege yari imaze igihe ikora nka Air Force One kuva mu 1990.

Leta Zunze Ubumwe za Amerika zari zifite indege ebyiri zidasanzwe za perezida zahinduwe by'umwihariko kuri ubu butumwa, zifite imibare 28000 na 29000. Izi ndege ebyiri zizwi mu Ngabo zirwanira mu kirere za Leta Zunze Ubumwe za Amerika nka VC-25A.

Izi ndege zombi ubu zifite imyaka irenga 35 kandi Donald Trump yakunze gushinyagurira abavuga ko zigomba gusimbuzwa izindi ndege nshya.