Cymru yn sicrhau buddugoliaeth gyntaf yn 2026 yn erbyn Norwy

Mae Cymru wedi curo Norwy 2-1 yn Stadiwm Dinas Caerdydd, gan sicrhau eu buddugoliaeth gyntaf yng Nghynghrair y Cenhedloedd A.

Roedd goliau gan Dan James a Neco Williams yn ddigon i sicrhau'r fuddugoliaeth, ar ôl i Oscar Bobb roi'r ymwelwyr ar y blaen yn gynnar.

Cafodd amddiffynnwr Norwy, Torbjorn Heggem, ei anfon o'r cae o fewn 30 eiliad i ddechrau'r ail hanner, cyn i Williams sgorio o'r gic rydd ddilynol.

Dyma fuddugoliaeth gyntaf Cymru ers Tachwedd 2025, gan ddod â rhediad o chwe gêm ryngwladol heb fuddugoliaeth i ben, ac mae'n rhoi hwb i dîm Craig Bellamy cyn wynebu Denmarc ddydd Sul.

Dechreuodd Norwy'n gryf, gydag Oscar Bobb yn rhoi'r ymwelwyr ar y blaen ar ôl 11 munud, gan orffen symudiad a ddechreuodd gyda phas gan Martin Ødegaard.

Er bod y gôl gynnar yn ergyd i Gymru, ymatebodd tîm Bellamy drwy gymryd rheolaeth o'r gêm, gyda Sorba Thomas yn creu problemau i amddiffyniad Norwy ar yr asgell chwith.

Daeth y cyfle i gyfartalu ar ôl i Liam Cullen gipio'r bêl gan Fredrik Aursnes, cyn i Lewis Koumas ei chwarae allan i Thomas, a groesodd y bêl i James sgorio ei 11 gôl dros Gymru ar ôl 38 munud.

Cafodd Torbjorn Heggem gerdyn coch am dynnu Dan James i lawr ychydig y tu allan i'r cwrt cosbi, cyn i Neco Williams daro'r gic rydd i gefn y rhwyd ar ôl 48 munud.

Roedd gan Gymru gyfle i ychwanegu at y sgôr, ond arbedodd Orjan Nyland ymdrech Josh Sheehan, cyn i Norwy bwyso'n galed yn y munudau olaf.

Peniodd Erling Haaland bêl Marcus Pedersen yn syth at Danny Ward, cyn i Jørgen Strand Larsen fethu'r targed yn hwyr yn y gêm.

Llwyddodd tîm Craig Bellamy i ddal eu gafael ar y fantais tan y chwiban olaf, gan sicrhau buddugoliaeth bwysig o flaen torf yng Nghaerdydd.

Roedd Norwy wedi dechrau'r gêm yn safle 18 yn y byd, 20 safle'n uwch na Chymru, ac mae'r canlyniad yn dod ar ôl cyfnod o bwysau ar Bellamy i gael ymateb gan ei dîm.

Bydd Cymru nawr yn paratoi ar gyfer gêm gartref arall yn erbyn Denmarc ddydd Sul, gan obeithio adeiladu ar y canlyniad hwn.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.