'Baw ci ym mhobman' - Sioc landlord ar ôl i denant adael 'llanast llwyr' mewn tŷ

Dywedodd y landlord ei bod mewn "sioc" ar ôl darganfod cyflwr ei chartref
- Cyhoeddwyd
Mae landlord ifanc o Sir Gaerfyrddin wedi cael "sioc" ac "ofn" ar ôl i denant adael ei chartref mewn "llanast llwyr".
Yn ôl Isabelle Williams, 24, doedd hi ddim yn gallu credu'r hyn a welodd wrth agor drws ei heiddo yng Nghastellnewydd Emlyn ddydd Mawrth.
Dywedodd y saer a'r teiliwr hunangyflogedig fod "baw ci ym mhobman" a bod "yr holl ddodrefn" wedi'u difrodi.
Mae hi bellach yn galw am fwy o gefnogaeth i landlordiaid yng Nghymru sy'n wynebu problemau gyda thenantiaid.

Roedd baw ci ym "mhobman" er bod y cytundeb yn nodi nad oedd anifeiliaid i fod yn y tŷ
Ar ôl prynu'r tŷ pan oedd hi'n 19 oed, roedd cartref cyntaf Isabelle Williams yn golygu llawer iddi.
Wedi byw yn yr eiddo am ychydig flynyddoedd, penderfynodd ei roi ar rent eleni, gan ei bod wedi symud i eiddo mwy gyda'i phartner.
Hysbysebodd Isabelle ei thŷ ar-lein, a chysylltodd aelod o'r cyhoedd â hi, gan fynegi diddordeb ynddo.
Er nad oedd hi'n adnabod y person, eglurodd fod pobl yr oedd hi'n eu hadnabod yn adnabod y tenant.

Mae Isabelle yn galw am fwy o gymorth i landloriaid
"Doedd dim pryder", meddai, ac yn ystod y mis cyntaf, "doedd dim problem o gwbl" gyda'r tenant yn talu'r rhent yn brydlon.
Ond ar ôl hynny, dywedodd y tenant ei fod "yn cael trafferth" talu'r rhent, a'i fod "yn mynd i ddatrys y mater".
"Yn sydyn, fe wnaeth [y tenant] ddiflannu. Doedd [y tenant] ddim yn ateb unrhyw alwadau ffôn, negeseuon testun na negeseuon e-bost; felly, bu'n rhaid i mi ddechrau postio llythyrau drwy'r drws i geisio tynnu ei sylw," eglurodd.

Nid yw Isabelle wedi cael unrhyw gyswllt gyda'r tenant ers gadael yr eiddo
"Roeddwn hefyd yn poeni am les [y tenant], gan nad oeddwn wedi clywed gan [y tenant] ers rai misoedd. Roedd y ffaith i'r [tenant] ddiflannu yn achos pryder ynddo'i hun."
Yn y diwedd, llwyddodd ei phartner i gysylltu â'r tenant gan ddefnyddio ei rif ffôn ei hun. Dywedodd y tenant wrtho ei fod yn "cael trafferth cadw i fyny â'r taliadau rhent" a'i fod wedi penderfynu symud allan, gan adael yr allweddi yn y tŷ.
'Erioed wedi gweld unrhyw beth tebyg'
Nos Fawrth, aeth Isabelle i mewn i'r eiddo.
"Agorais i'r drws a mynd i mewn, a dydw i erioed wedi gweld unrhyw beth tebyg," eglurodd.

Daeth Isabelle o hyd i faw ci mewn sawl lle yn y tŷ
"Roedd baw ci ym mhobman; roedd fel pe bai'r ci druan wedi cael ei adael yno ac wedi rhwygo dillad – wedi rhwygo popeth yn ddarnau. Roedd yn llanast llwyr.
"Roeddwn i hyd yn oed yn teimlo ychydig o ofn mynd i fyny'r grisiau, gan nad oeddwn i'n gwybod beth i'w ddisgwyl yno. Roedd yn eithaf brawychus, a dweud y gwir."
Aeth ymlaen i egluro bod y cytundeb yn nodi'n benodol bod 'dim anifeiliaid anwes'.
"Dim ond ddydd Mawrth y gwelais fod anifail anwes yn y tŷ, pan welais y baw ci a'r cawell ci…"

Dywedodd Isabelle bod ganddi ofn mynd i fyny'r grisiau
"Fi ddarparodd y dodrefn yn y tŷ, ac mae'r cyfan wedi'i ddifrodi ac mae angen eu newid", meddai.
Wrth ddisgrifio sut roedd hi'n teimlo wrth weld ei chartref cyntaf mewn cyflwr o'r fath, dywedodd Isabelle:
"Roeddwn i mewn llawer o sioc ac wrth sefyll yn y tŷ roeddwn i'n ofnus ac yn ansicr beth arall oeddwn i'n mynd i'w weld. Roedd yn gwbl syfrdanol…
"Roeddwn i'n teimlo fy mod i'n helpu rhywun oedd eisiau cartref cyntaf – dyna'r argraff a gefais...
"Roeddwn i wedi cael y cyfle hwnnw gyda'r cartref hwnnw, a meddyliais fy mod yn rhoi'r un cyfle i rywun arall oedd yn barod i symud ymlaen i fywyd fel oedolyn."

Mae Isabelle wedi derbyn ymateb "anhygoel" gan y gymuned ers rhannu lluniau ar-lein
Mae Isabelle yn honni nad yw hi wedi cael unrhyw gysylltiad â'r tenant ers iddo adael yr eiddo.
Er iddi ystyried cymryd camau cyfreithiol, mae hi'n cwestiynu a fyddai hynny'n gwneud gwahaniaeth.
"Dwi'n teimlo braidd ar fy mhen fy hun.
"Pe bawn i'n mynd â'r tenant i'r llys neu i'r llys hawliadau bach, neu'n cymryd y mater ymhellach, rwy'n teimlo y byddwn i'n gwario gormod o arian wrth geisio sicrhau cyfiawnder, mewn ffordd.
"Pan fyddai popeth drosodd, fyddwn i ddim yn cael llawer yn ôl, ac yn y pen draw, fyddai ddim gwerth gwneud hynny."

Dywedodd Isabelle ei bod wedi gorfod taflu'r rhan fwyaf o ddodrefn y cartref
Mae hi'n dweud nad yw hi'n credu bod digon o gefnogaeth ar gael i landlordiaid sy'n cael profiadau gwael.
"Does dim llawer o gefnogaeth i landlordiaid pan fyddan nhw'n mynd trwy bethau fel hyn.
"Dydych chi ddim yn gweld hyn yn aml – nid yw'n cael ei ddangos yn aml bod cymaint o landlordiaid allan yna yn profi hyn, a faint o amser, ymdrech ac arian rydyn ni'n ei roi i greu cartref i rywun.
"Mae yna bobl allan yna sy'n eich siomi, fel y digwyddodd i mi."
Cefnogaeth 'anhygoel'
Gan ei bod hi bellach yn y cam o glirio'r eiddo, mae Isabelle yn dweud ei bod hi'n "lwcus" fel saer a theiliwr ei bod hi'n gallu gwneud llawer o'r gwaith ei hun.
"Rydyn ni wedi clirio popeth allan nawr, felly mae'n gynfas gwag, ond roedd rhaid i ni dynnu mwy allan nag yr oedden ni wedi'i ddisgwyl, fel y lloriau a'r cladin o amgylch y grisiau…
"Roedd llawer mwy o waith i'w wneud nag yr oeddwn i wedi'i ragweld."
Mae'n diolch i'w theulu am eu cymorth i glirio'r eiddo, ac i'r cyhoedd a'r cyfryngau cymdeithasol am y gefnogaeth "anhygoel" ers iddi rannu lluniau o'r eiddo ar-lein.
Er ei bod yn dweud nad yw hyn wedi dylanwadu ar ei hawydd i rentu yn y dyfodol, mae dweud ei bod bellach yn teimlo'n "fwy gwyliadwrus ac yn fwy gofalus" ynglŷn â'r sefyllfa.
Fe wnaeth BBC Cymru geisio cysylltu gyda'r tenant gan ddefnyddio'r rhif ffôn a gafodd ei ddarparu gan y landlord. Nid yw'r rhif yn bodoli bellach.
Dywedodd Chris Norris, sy'n gyfrifol am bolisi Cymdeithas Landlordiaid Preswyl (NRLA): "Er bod y mwyafrif helaeth o bobl sy'n rhentu yn y sector preifat yn denantiaid cyfrifol, mae achosion fel hyn yn dangos yr effaith ariannol ac emosiynol ar landlordiaid pan fydd pethau'n mynd o chwith.
"Gall rhent heb ei dalu, diffyg cyfathrebu a difrod i eiddo olygu colledion sylweddol i landlordiaid, heb fawr o obaith o gael yr arian hwnnw'n ôl."
Dywedodd Llywodraeth Cymru: "O dan Ddeddf Rhentu Cartrefi (Cymru) 2016, rydym wedi cynhyrchu canllawiau ymarferol i landlordiaid ar adennill meddiant eiddo pan fo deiliad contract wedi torri eu contract meddiannaeth.
"Mae'r canllawiau hyn yn helpu landlordiaid i ddeall eu hawliau, llywio'r broses gyfreithiol a chymryd y camau angenrheidiol i adennill meddiant cyn gynted â phosib o fewn ffiniau'r gyfraith."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol .
Lawrlwythwch yr ap am y diweddaraf o Gymru ar eich dyfais symudol.