Dafydd Owain yn ennill Gwobr Gerddoriaeth Gymreig 2026

Dafydd Owain efo'r tlws

Dyma'r drydedd wobr i Dafydd Owain ennill eleni am yr albym Ymarfer Byw

Dafydd Owain yw enillydd Gwobr Gerddoriaeth Gymreig 2026.

Daeth i'r brig gyda'r albwm Ymarfer Byw, oedd ymhlith 15 a gyrhaeddodd y rhestr fer eleni.

Dyma'r drydedd wobr iddo ennill eleni gyda'r albwm yma ar ôl dod i'r brig yng Ngwobrau'r Selar ddechrau'r flwyddyn ac yna cipio Wobr Albym Cymraeg y Flwyddyn ym mis Awst.

Ar ôl derbyn y wobr gan gyflwynydd y seremoni yng Nghanolfan y Mileniwm Caerdydd, Sian Eleri, dywedodd ei fod yn "od sefyll ar ben dy hun" ar lwyfan i dderbyn wobr pan fod "un teulu mawr" o bobl, gan gynnwys aelodau band, wedi cyfrannu at y lwyddiant.

Mae'n derbyn tlws a gwobr ariannol o £10,000.

Roedd yna wobr arbennig hefyd i'r gantores Mary Hopkin i gydnabod ei chyfraniad i'r byd cerddoriaeth dros sawl degawd.

Merch y gantores o Bontardawe, Jessica Lee Morgan, wnaeth dderbyn y Wobr Ysbrydoliaeth Cerddoriaeth Gymreig ar ei rhan.

Cloriau wyth o'r albyms ar restr fer 2026Gwobr Gerddoriaeth Gymreig

Cloriau wyth o'r 15 albwm oedd ar restr fer Gwobr Gerddoriaeth Gymreig 2026

Rhestr fer 2025 yn llawn:

  1. ADJUA – Everything Is Beautiful

  2. Aleighcia Scott – Taith

  3. Ani Glass – Phantasmagoria

  4. Art School Girlfriend – Lean In

  5. Cerys Hafana – Angel

  6. CHROMA – 25 Forever

  7. Dafydd Owain – Ymarfer Byw

  8. Dewin – Dan y Dderwen

  9. Gruff Rhys – Dim Probs

  10. Gwenifer Raymond – Last Night I Heard the Dog Star Bark

  11. Local – Too Broke to Be This Busy

  12. Mari Mathias – Cyfarwydd

  13. Skindred – You Got This

  14. The Bug Club – Every Single Muscle

  15. The Royston Club – Songs For The Spine

'Mae'r rhestr fer yn cryfhau bob blwyddyn'

Y beirniaid eleni oedd:

  • Tim Jonze, o bapur newydd The Guardian,

  • Sophie Wiliams, newyddiadurwr cerddoriaeth,

  • Helen Weatherhead, BBC Radio 6 Music,

  • Yaw Owusu, ymgynghorydd y diwydiant cerddoriaeth,

  • Molly Palmer, DJ a chyflwynydd BBC Radio Wales,

  • Y cerddor a'r cyflwynydd Ifan Davies, ac

  • Aly Gillani, Aim/First Word Records.

Molly Palmer

Mae'n ddifyr clywed barn cyd-banelwyr di-Gymraeg am yr albyms Cymraeg ar y rhestr fer, medd Molly Palmer

Dywedodd Molly Palmer mai dyma'r trydydd tro iddi fod ar y panel "a pob blwyddyn mae'r rhestr fer yn cryfhau".

"Oedd o'n rili anodd eleni gan fod shwt gyment o albyms gwahanol, genres gwahanol.

"Roedd nhw gyd efo rhywbeth gwahanol i'w gynnig felly roedd o'n penderfyniad anodd eleni."

Dywedodd bod "trafodaeth ddifyr yn digwydd pob blwyddyn" a'i fod yn ddifyr clywed barn panelwyr di-Gymraeg ynghylch yr albyms Cymraeg.

"Mae o wastad mor positif... profiad mor arbennig i fod yn rhan o'r noson."

Betsan yn dal tlws Gwobr Trisgell

Roedd y gantores Betsan ymhlith enillwyr wobr flynyddol ar gyfer talentau newydd mwyaf cyffrous Cymru

Roedd yna glod hefyd i enillwyr Wobr Trisgell eleni, sy'n cael ei rhoi ddathlu talentau newydd mwyaf cyffrous y sîn yng Nghymru.

Enillwyr eleni oedd y bandiau MWSOG a Casual Smart a'r gantores Betsan a ddywedodd bod derbyn yr anrhydedd a pherfformio yn y seremoni yn "anhygoel".

"Sa i'n siŵr sut wnes i cael fy newis ond dwi mor ddiolchgar ac oedd o'n anhygoel i cael chwarae i gymaint o bobl... mae e jest yn freddwyd i perfformio fan hyn."

'Ystod anhygoel o gerddoriaeth' yng Nghymru

Cafodd y Wobr Gerddoriaeth Gymreig, sy'n agored i albymau o bob genre, ei sefydlu yn 2011 ac mae enillwyr y gorffennol yn cynnwys LEMFRECK, Kelly Lee Owens, Rogue Jones, Adwaith, Boy Azooga, Deyah, Gruff Rhys, a Gwenno.

Mae'n rhan o Ŵyl Dinas Gerdd Caerdydd ac yn agor dathliadau gwŷl Llais eleni.

Dywedodd cyd-sylfaenydd y Wobr, y cyflwynydd Huw Stephens: "Am yr 16eg tro, bydd y Wobr Gerddoriaeth Gymreig yn dathlu'r albymau grêt yma mewn noson arbennig.

"Mae'r rhestr hir a'r rhestr fer ddilynol o albymau yn ein hatgoffa'n flynyddol am yr ystod anhygoel o gerddoriaeth sy'n dod o Gymru.

"O hip hop a rap i gerddoriaeth werin, electronica, a roc trwm, mae artistiaid eleni'n dangos y creadigrwydd cyfoethog, amrywiol a bywiog sy'n ffynnu ar draws sîn gerddoriaeth Cymru."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig