Opera newydd gan Gruff Rhys am Hedd Wyn yn 'ddigwyddiad pwysig'

Mae opera newydd gan Gruff Rhys am Hedd Wyn, sydd wedi ei lleoli yn Nhrawsfynydd wedi damwain niwclear ddychmygol, yn "ddigwyddiad pwysig" a "hanesyddol".

Yn ôl Iwan Teifion Davies, fydd yn arwain Opera Genedlaethol Cymru yn y cynhyrchiad yng Nghanolfan y Mileniwm flwyddyn nesaf: "Os dw i wedi deall yn iawn, hon yw'r opera Gymraeg gyntaf i'r cwmni opera berfformio ar y prif lwyfan erioed yn ei hanes felly mae'n dipyn o beth.

"Mae'n hanesyddol mewn ffordd."

Mae'r libreto - y stori a'r geiriau - wedi ei ysgrifennu gan y cerddor Gruff Rhys, sydd ar daith gyda'i grŵp Super Furry Animals ar hyn o bryd.

Ar ei dudalennau cyfryngau cymdeithasol fe wnaeth o ddiolch i'r cwmni opera am wneud "dewisiadau dewr" gyda'r opera.

Meddai: "Wedi bod yn cydweithio am ddegawd ar hwn... Ddiolchgar iawn i bawb sydd wedi helpu i'w wireddu a'i wella. Mi fydd o'n boncars."

Mae'r opera Hedd Wyn: Eisteddfod Atomig wedi ei lleoli yn Nhrawsfynydd yn y flwyddyn 2117 pan mae'n ardal waharddedig yn dilyn damwain mewn gorsaf niwclear gyfagos.

Mae grŵp yn mynd ar bererindod i gartref Bardd y Gadair Ddu, 200 mlynedd wedi iddo gael ei ladd yn y Rhyfel Byd Cyntaf.

Mae'n gynhyrchiad newydd gan Opera Cenedlaethol Cymru a Theatr Cymru ac wedi ei gyfarwyddo gan Steffan Donnelly.

Dywedodd Iwan Teifion Davies bod yr ymateb i'r newyddion am y cynhyrchiad, fydd yn digwydd fis Mai 2027, wedi bod yn siomedig.

"Mae'n rhaid i mi ddweud, o'n i 'di synnu o weld rhai o'r ymateb yn y wasg sy'n trafod opera lle o'n nhw bron fel fasen nhw wedi anwybyddu bod e'n mynd i ddigwydd o gwbl," meddai ar raglen Beti a'i Phobol ar BBC Radio Cymru.

"Roedd rhai o'r cynyrchiadau eraill yn y tymor yn cael sylw bod nhw'n mynd i neud hwn a hwn - ac wedyn oedd dim sôn am yr opera newydd 'ma.

"A pan rydych chi'n gwneud rhywbeth am y tro cyntaf, mae'n ddigwyddiad o bwys.

"Mae Stephen McNeff yn gyfansoddwr o bwys mawr ac wrth gwrs mae Gruff Rhys ynghlwm wrtho fe hefyd - mae'n ddigwyddiad pwysig. Mae Rebecca Evans, Paul Ceri Jones, Steffan Lloyd Owen, rhai o'n prif gantorion ni, yn mynd i fod ynddo fe.

"Felly bydde fe wedi bod yn neis falle bod e 'di cael bach mwy o sylw, ond gobeithio gaiff e fwy o sylw pan fydd ar y llwyfan blwyddyn nesa."

Yn wreiddiol o Landudoch, ger Aberteifi, mae Iwan Teifion Davies yn Gyfarwyddwr Cerddoriaeth Prifysgol Aberystwyth ers 2021, ac yn arwain cerddorfa Philomusica yn y dref.

Fo hefyd yw Cyfarwyddwr Artistig Musicfest Aberystwyth ac mae'n Bennaeth Cerdd ar Ŵyl Ryngwladol Buxton.

Cyn hynny bu'n gweithio fel arweinydd a phianydd yn y byd opera yn Salzburg, Awstria.

Gallwch wrando ar y cyfweliad llawn ar Beti a'i Phobol ar Radio Cymru am 18:00 ar 17 Mai ac ar BBC Sounds.

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.