Ymhlith y rhai a gafodd ganlyniadau bore 'ma mae Bobi Jones sydd wedi bod yn astudio yn Ysgol Bro Teifi yn Llandysul.

Mae wedi bod yn gwneud hynny tra'n ddiffoddwr tân ar alwad i Wasanaeth Tân ac Achub Canolbarth a Gorllewin Cymru.

"Mae lot o bwysau arnon ni ar hyn o bryd gyda'r tanau gwyllt," meddai.

Dywedodd Bobi, 18, o Gastellnewydd Emlyn bod gweithio i'r gwasanaeth tân yn "beth o'm ni wastad isie neud ers pan o'n i'n fach" ac mae ei dad-cu, tad, ewythr a brawd wedi gwneud yr un peth.

Tra'n astudio Safon Uwch Busnes, Chwaraeon a'r Fagloriaeth Gymreig roedd yr ysgol yn caniatáu iddo gymryd galwadau brys.

"Os ma'r bleeper 'di mynd off mae'r athrawon wedi bod yn ddigon hapus i fi jyst adael gwersi a dal lan wedi 'ny," meddai.

Fe fydd Bobi yn gwneud prentisiaeth gyda thrydanwr lleol ar ôl ei ganlyniadau tra'n parhau i weithio i Wasanaeth Tân ac Achub Canolbarth a Gorllewin Cymru.

Cyn iddo dderbyn ei raddau, meddai: "Fi'n eitha relaxed i fod yn onest – bach rhy relaxed 'falle, ond gawn ni weld" a do bu'n llwyddiannus fe gafodd raddau BBC - llongyfarchiadau!

Mae Elliot wedi cael 3A yn ei arholiadau AS mewn Daearyddiaeth, Seicoleg a Sbaeneg yng Ngholeg Caerdydd a'r Fro.

“Dwi wedi gweithio’n galed felly roedd cael gweld tair A ar y papur yn deimlad mor neis," meddai.

"Mae’n sylfaen gref ar gyfer blwyddyn nesa felly dwi’n hapus iawn.”

Ac mae 'na ganlyniadau!

Mae Shane, Lexi a Layla newydd dderbyn eu graddau ar gyfer BTEC Musical Theatre.

Meddai Shane: “Dw i’n mynd i Performer yn Birmingham ym mis Medi a dw i mor gyffrous.

"Mae’r cwrs yma wedi fy mharatoi i’n dda ac wedi helpu fy hyder yn fawr.”

“Dw i’n dod nôl yma ym mis Medi i gwblhau fy ail flwyddyn mewn Musical Theatre ac dw i’n edrych ymlaen," meddai Lexi.

"Mae’n le grêt yma.” meddai Layla.

“Dw i’n dod nôl yma i wneud Lefel 4 mewn perfformio. Mae fan hyn yn le grêt a dw i wedi gwneud ffrindiau newydd.”

Ffynhonnell y llun, Ysgol Bro Preseli

Mae disgyblion chweched dosbarth Ysgol Bro Preseli wedi cael “llwyddiant arbennig” eleni, wrth i 40% o’r graddau Safon Uwch gyrraedd graddau A*-A.

Meddai’r Pennaeth, Mrs Rhonwen Morris:

"Mae canlyniadau eleni yn destun balchder mawr i ni oll. Maent yn adlewyrchu ymroddiad, gwydnwch a phenderfyniad ein disgyblion, yn ogystal â gwaith diflino ein staff a chefnogaeth ein teuluoedd.

“Rydym yn hynod falch o'r hyn sydd wedi ei gyflawni ac yn edrych ymlaen at weld pob un yn ffynnu wrth symud ymlaen i'w cam nesaf."

Ffynhonnell y llun, Ysgol Bro Preseli

Ychwanegodd Mr Carwyn James, Cadeirydd y Corff Llywodraethol:

"Pan sefydlwyd Ysgol Bro Preseli yn 2022, roedd dewis arwyddair a fyddai'n adlewyrchu gweledigaeth a dyheadau'r ysgol yn bwysig iawn.

"Mae canlyniadau rhagorol eleni yn dangos bod yr ysgol yn parhau i wireddu ysbryd 'Gwreiddiau a Gorwelion', gan gyfuno ymdeimlad cryf o berthyn â dyhead uchel."

Ffynhonnell y llun, Ysgol Bro Preseli

"Da ni'n cydnabod bod yna batrwm yna a bod 'na llai o bobol yn mynd mlaen i astudio lefel A, yn enwedig yn y blynyddoedd ers Covid," meddai Bethan Evans, Cyfarwyddwr Rheoleiddio a Dadansoddi Medr.

"Mae gan bobol ifanc heddi mwy o gyfleoedd nag erioed o'r blaen pan maen nhw'n troi 16 a mwy o opsiynau am sut maem nhw'n astudio ac ymhle, a 'dan ni'n gweld bod mwy ohonyn nhw'n dewis mynd mlaen i astudio cyrsiau galwedigaethol mewn colegau addysg bellach er enghraifft.

"O safbwynt Medr, beth sy'n bwysig i ni yw ein bod ni'n canolbwyntio ar ofynion y dysgwyr a bod ni'n parhau i ddarparu pa bynnag fath o addysg a hyfforddiant maen nhw eisiau ei weld lle bynnag mae nhw'n byw yng Nghymru".

Yn sgil pryder bod 17% o bobl ifanc 16 i 24 oed Cymru ddim mewn addysg, gwaith na hyfforddiant neu yn Neet (not in education, employment or training), dywedodd Bethan Evans ei fod "yn her sylweddol".

Ychwanegodd bod Medr yn gweithio ar draws y sector trydyddol - sef prifysgolion, colegau, chweched dosbarth a darparwyr prentisiaethau.

Ehangu rhaglen brentisiaethau iau i blant o 14 oed yw un o'r camau maen nhw wedi ei gymryd, meddai.

Roedd gan Rosa MacGowan, 18, o Abertawe waith jyglo, wrth iddi astudio pedair Lefel A a'r BAC, ar y cyd â swydd ran amser, gyda'r gobaith o fynd ymlaen i fod yn feddyg,

Bore 'ma, deffrodd a gwirio ei safle UCAS, a gweld ei bod wedi cael lle yn astudio meddygaeth ym mhrifysgol Glasgow.

"Dwi'n teimlo gymaint o ryddhad. O'n i mor nerfus yn mynd ar UCAS, ond pan ddaeth y bocs gwyrdd lan yn dweud mod i wedi cael lle, o'n i mor gyffrous ar gyfer y dyfodol."

Ar ôl mynd draw i Ysgol Olchfa i nôl ei chanlyniadau cafodd wybod ei bod hi wedi cael graddau AAA*A*A*.

Dywedodd Rosa ei bod yn teimlo'n "bositf ar gyfer y dyfodol a methu aros am y bennod nesaf".

"Dwi methu credu, mewn llai na mis, bydda i ar y ffordd i Glasgow i astudio meddygaeth! Dwi methu aros am yr holl gyfleoedd newydd fydd yn dod gyda hyn."

Prifysgol Aberystwyth

Os nad ydych chi'n derbyn y graddau oeddech chi'n eu obeithio amdanyn nhw heddiw, "peidiwch â mynd i banig" yw cyngor Elen Roach, sy'n Rheolwr Partneriaethau a Chyswllt gydag Ysgolion ym Mhrifysgol Aberystwyth.

"Mae’r system glirio ar gael i unrhyw un sydd falle wedi newid eu meddwl am y dewis gwreiddiol oedden nhw wedi gwneud neu falle i’r rheiny sydd heb gael y gradde oedden nhw’n dymuno cael."

Ffynhonnell y llun, Elen Roach

"A’r neges bwysica oll yw i ystyried y broses glirio fel cyfle cyffrous. Mae heddi yn ddechrau ar bennod newydd i’r disgyblion ac ry'n ni yma i'w cefnogi nhw ac i gefnogi eu rhieni nhw drwy gydol y broses.

"Yn amlwg, mae’r broses yn un falle na fydde pobl yn dymuno gorfod mynd mewn iddi, ond mae’n broses eitha’ hwyliog hefyd."

Felly beth yw'r camau nesaf, os ydy'r cynllun gwreiddiol wedi gorfod newid?

• Mynd ar wefan y prifysgolion sy'n apelio a ffonio'r rhif ffôn clirio
• O bosib bydd cyfle i fynd i ymweld â'r brifysgol
• Ar ôl 13:00 heddiw, mynd ar Hwb UCAS i ychwanegu dewis clirio
• Bydd cynnig clirio gan unrhyw brifysgol yn sefyll tan bo' penderfyniad yn cael ei wneud

A hithau'n gofalu am ei mam, mae canlyniadau Ffion Haf, 19, o Ysgol Morgan Llwyd, hyd yn oed yn fwy arbennig iddi, meddai.

"Dw i'n ofalwr... ers o'n i'n bedair 'dw i wedi bod yn ofalwr ifanc, yn gofalu am Mam ers dw i'n cofio.

"Mae 'di bod yn eithaf anodd ac roedd 'neud Lefel A yn fwy anodd, felly dyna pam 'dw i'n fwy chuffed nag o'n i am fod gyda chanlyniad gwych."

Mynd i Brifysgol De Cymru i astudio hyfforddi pêl-droed yw'r bwriad i Ffion nawr, eglurai.

"Dwi bach yn nerfus, ond dwi'n hapus ac yn lwcus."

Mae Awel, 17, o Lansannan yn mynd i astudio newyddiaduriaeth yng Nghaerdydd ym mis Medi ar ôl derbyn A*A*AA mewn Cymraeg, Drama, Troseddeg a'r BAC.

Doedd Awel ddim yn sicr ar y dechrau a oedd hi am fynd i brifysgol ond "rwan bo fi'n hollol sicr ac yn edrych mlaen i fynd i brifysgol dwi'n meddwl bod y pwysau wedi dechrau taro fi 'chydig bach," meddai.

Roedd ei amheuon gwreiddiol am "y pres".

"Mae gymaint o bobl yn sôn am y ddyled sy'n gallu adeiladu fyny o brifysgol felly o'dd hynny yn sicr yn rhywbeth yn fy meddwl i drwy'r amser.

"Ond rwan bo fi wedi edrych bach mwy i fewn i Cyllid Myfyrwyr Cymru a sut mae'r system yna'n gweithio mae wedi ysgafnhau'r ofn yna chydig bach."

“Mae’r canlyniadau heddiw yn benllanw gwaith caled y disgyblion dros y saith mlynedd diwethaf, ac rydym yn ymfalchïo’n fawr yn eu llwyddiant,” meddai Mrs Nia Land, pennaeth chweched Ysgol Bro Edern.

Roedd Harri ac Ela ymhlith y myfyrwyr oedd wedi dod draw i'r ysgol i gasglu eu canlyniadau AS y bore 'ma.

Astudiodd Eryn Williams, 18, o Brestatyn Mathemateg, Ffiseg, Bioleg a'r Bac yn Ysgol Glan Clwyd, gan ennill 3 A a B.

Mae hi am gymryd o leiaf un flwyddyn allan i weithio a theithio, gyda'r bwriad yn y pendraw i ddilyn gyrfa mewn peirianneg mecanyddol, un ai drwy fynd i'r brifysgol neu drwy wneud prentisiaeth.

Mae William Hopkins wedi bod yn astudio tuag at BTEC mewn Gwasanaethau Amddiffyn mewn Lifrai (Uniformed Protective Services) yn Ysgol Olchfa, ochr-yn-ochr â Lefelau A mewn Daearyddiaeth a Gwleidyddiaeth.

Mae wedi derbyn beth roedd ei angen er mwyn ymuno â'r fyddin, sef 70 pwynt UCAS.

"Dwi wedi ei fwynhau, ond dwi erioed wedi bod yn academaidd iawn a 'nes i erioed fwynhau'r ysgol rhyw lawer," meddai.

"Dwi wastad wedi mwynhau pethau newydd a gwthio fy hun i'r eithaf."

Yn ôl Elan Gwyn o Gyrfa Cymru, mae yna lawer o opsiynau ar gael i bobl ifanc sy'n derbyn eu canlyniadau Safon Uwch heddiw, nid dim ond prifysgol:

• Prentisiaeth
• Gwaith
• Dechrau eu busnes eu hunain
• Hyfforddi/aros mewn addysg

Ffynhonnell y llun, Elan Gwyn

"Beth ydyn ni’n ei wneud fel cynghorwyr," eglurai Elan, "ydy sôn efo pobl ifanc, gweld beth ydy’r opsiwn gorau iddyn nhw, a ‘nawn ni sbio ar bethau fel dyledion a beth sy’n bwysig iddyn nhw o ran hynny hefyd.

"Os oes ganddyn nhw gynllun, ac mae’r cynllun yn newid, mae hynny yn hollol fine; allwn ni fynd drwy’r opsiynau i gyd a’u helpu nhw i wneud y penderfyniad gorau iddyn nhw, a rhoi cynllun at ei gilydd."

Bethan Lewis
Gohebydd Addysg a Theulu BBC Cymru

Am y drydedd flwyddyn yn olynol, mae canlyniadau Safon Uwch yn dangos darlun digon sefydlog yn dilyn blynyddoedd y pandemig.

Mae graddau Safon Uwch ychydig yn uwch ac Uwch Gyfrannol (AS) ychydig yn is, a miloedd hefyd wedi derbyn canlyniadau am gymwysterau galwedigaethol.

Mae chweched Dosbarth Ysgol Olchfa yn Abertawe ymhlith y mwyaf yng Nghymru gyda tua 550 o fyfyrwyr ac yma bore ‘ma roedd na gymysgedd o emosiynau.

Roedd rhai o’r rheini oedd wedi cael graddau yn is na’r disgwyl dal wedi cael eu lle yn y brifysgol - eraill nawr yn ystyried opsiynau.

Ac roedd sawl un yn dilyn trywydd gwahanol – siaradais i gyda ddau myfyriwr sydd nawr yn ymuno â’r lluoedd arfog.

O ran y sefyllfa ar draws Cymru gyfan, un gwahaniaeth amlwg eleni yw mai gweinidog Plaid Cymru sy'n llongyfarch myfyrwyr.

Dim ond ychydig fisoedd sy ‘na ers i'r llywodraeth newydd gael ei hethol, felly fydd 'na fawr o ddylanwad ar y canlyniadau hyn.

Ond mae heriau sylweddol o'u blaenau, gan gynnwys mynd i'r afael â phroblemau prifysgolion Cymru.

Mae Dion a Teagan o Ysgol Morgan Llwyd yn ddau gariad ac yn mynd gyda'i gilydd i'r brifysgol yn Aberystwyth.

Dywedodd Teagan: "'Da ni'n mynd i aros yn neuadd Pantycelyn; aethon ni draw i'r brifysgol i weld a rili rili hoffi fo."

Roedd Angharad o Ysgol Morgan Llwyd yn Wrecsam, sy'n 18 oed, yn llawn dagrau o lawenydd y bore 'ma wrth agor ei chanlyniadau - ABB yn ei phynciau, a derbyn lle i astudio ym mhrifysgol Durham.

Dywedodd: "Oedd o'n complete disbelief, doeddwn i'm yn disgwyl hyn o gwbl a rhyddhad mawr.

"Dw i'n hapus i orffen a mynd allan gyda ffrindiau i ddathlu."

Cymryd saib o arholiadau am ychydig yw bwriad Osian o Ysgol Morgan Llwyd, sydd yn "hapus" ei fod wedi derbyn AAB yn ei Lefel A.

"Doeddwn i ddim yn gwybod beth i'w ddisgwyl; 'nes i'n well na'r disgwyl.

"Dw i am gymryd blwyddyn allan achos dw i ddim eisiau arholiadau ar ddiwedd blwyddyn - dwi am ddychwelyd fel cymhorthydd yn yr ysgol am y tro ac yna mynd i'r brifysgol i ddod yn athro."

Mae Ella Buck hefyd wedi penderfynu cymryd blwyddyn allan, a mynd i deithio'r byd, cyn meddwl am ei chynllun ar gyfer y dyfodol.

"Dw i wedi cael mewn i John Moores i wneud marchnata, ond 'dw i ddim yn meddwl mod i am fynd.

"Dw i am gymryd blwyddyn allan, meddwl beth ydw i am ei wneud a falla mynd i Awstralia ac o gwmpas Ewrop."

Llywodraeth Cymru

Dywedodd y Dirprwy Weinidog dros Sgiliau ac Addysg Drydyddol, Cefin Campbell, y dylai dysgwyr fod yn "hynod falch o'r hyn rydych chi wedi'i gyflawni".

"Os nad yw eich canlyniadau'n hollol fel yr oeddech wedi gobeithio, cofiwch dydyn nhw ddim yn diffinio eich dyfodol ac nad dyma ddiwedd y ffordd.

"Mae llawer o opsiynau ar gael i chi, ac mae cymorth ar gael trwy Cymru'n Gweithio, eich ysgol neu'ch coleg, i'ch helpu i ddod o hyd i'r llwybr sy'n iawn i chi."

Mae Katie, 18, o Ysgol Gymraeg Bro Edern yn hapus iawn.

“Dw i’n mynd i Gaerdydd i astudio radiograffeg. Dw i’n rili hapus efo’r canlyniadau – ges i ABA, a dw i’n rili, rili hapus.”