သဘောထားကွဲလွဲမှုတွေကြောင့် ကြံ့ခိုင်ရေးပါတီညီလာခံကျင်းပရေး မသေချာဖြစ်နေတယ်လို့ဆို
ဗဟိုအလုပ်အမှုဆောင်အဖွဲ့ဝင်တွေ ရွေးချယ်ရေးနဲ့ပတ်သက်ပြီး သဘောထားကွဲလွဲတာတွေရှိနေတာကြောင့် စက်တင်ဘာလလယ်မှာ ကျင်းပမယ့် ကြံ့ခိုင်ရေးပါတီညီလာခံ မသေမချာဖြစ်နေတယ်လို့ ပါတီတွင်းသတင်းရင်းမြစ်တချို့က ပြောပါတယ်။
ပါတီညီလာခံကို စက်တင်ဘာလဆန်းပိုင်းမှာ ကျင်းပမယ်လို့ အစောပိုင်းက အသံထွက်ပြီးနောက် စက်တင်ဘာလလယ်ပိုင်း ရွှေ့ထားတယ်လို့ ဆိုပါတယ်။
ဒါပေမဲ့ လက်ရှိပါတီရဲ့ဥက္ကဋ္ဌ ဦးခင်ရီနဲ့ သမ္မတရာထူးယူထားတဲ့ ဦးမင်းအောင်လှိုင်တို့ကြား ဗဟိုအလုပ်အမှုဆောင်အဖွဲ့ဝင်တွေ ထည့်သွင်းရေးနဲ့ ပါတီဥက္ကဋ္ဌ နေရာယူရေးတို့ကြားမှာလည်း တင်းမာမှုတွေရှိနေတာလို့ ပါတီတွင်းသတင်းရင်းမြစ်က ပြောပါတယ်။
''ဦးမင်းအောင်လှိုင်က ပါတီ ဥက္ကဋ္ဌယူမယ်လို့ ပထမ အသံထွက်တယ်။ ဒါပေမဲ့ သူတို့ချင်း ညှိပုံရတယ်။ ဦးခင်ရီကပဲ ပါတီဥက္ကဋ္ဌပဲ ဆက်ဖြစ်မယ်။ ဒါပေမဲ့ ဗဟိုအလုပ်အမှုဆောင်အဖွဲ့ဝင်တွေမှာတော့ ဦးမင်းအောင်လှိုင်ဘက်က စိတ်ချ ယုံကြည်ရတဲ့သူတွေနဲ့ အစားထိုးမယ်လို့ ကြားပါတယ်'' လို့ ပါတီတွင်းသတင်းရင်းမြစ်က ဆိုပါတယ်။
ဒီသတင်းတွေနဲ့ပတ်သက်လို့ USDP ပါတီရဲ့နေပြည်တော်၊ ပြည်ထောင်စုနယ်မြေဥက္ကဋ္ဌ ဦးလှဆွေကို ဘီဘီစီကမေးကြည့်တဲ့အခါ ပါတီတွင်း သဘောထားကွဲလွဲမှုတွေ မရှိကြောင်း ပြောပြီး ပြည်ထောင်စုလွှတ်တော်ခေါ် ယူမယ့်ရက်နဲ့ ချိန်ညှိလုပ်ကိုင်တာကြောင့် ပါတီညီလာခံရက်ကိုပြောင်းရွှေ့ဖို့ ဖြစ်လာတာလို့ ဆိုပါတယ်။
ပါတီစည်းမျဥ်းအရ ညီလာခံမှာ ဗဟိုကော်မတီဝင်တွေအဖြစ် ပြန်အရွေးခံပြီးမှ ဗဟိုအလုပ်အမှုဆောင်အဖွဲ့ဝင်တွေအဖြစ် ဆက်လက်ရွေးချယ်ခံရတာဖြစ်ပြီး ဖွဲ့စည်းပုံအရ ဗဟိုကော်မတီဝင် နေရာ ၃၅၀ ရှိပြီး ဗဟိုအလုပ်အမှုဆောင်အဖွဲ့ဝင်နေရာက ၆၀ ဖြစ်ပါတယ်။
ဒါပေမဲ့ လက်ရှိမှာ ဗဟိုအလုပ်အမှုဆောင်အဖွဲ့ဝင် ၄၀ ဝန်းကျင်နဲ့ပဲ လည်ပတ်နေတယ်လို့ ပါတီဝင်တစ်ဦးက ပြောပါတယ်။
ကြံ့ခိုင်ရေးပါတီညီလာခံတွေမှာ အစိုးရအဖွဲ့နဲ့ လွှတ်တော် အားပြိုင်မှုတွေက အမြဲလိုလိုရှိခဲ့ပါတယ်။
ဦးသိန်းစိန်နဲ့ သူရဦးရွှေမန်းတို့ ကာလကလည်း အလားတူ အကွဲအပြဲကြောင့်၂၀၁၅ ရွေးကောက်ပွဲ မတိုင်မီ သြဂုတ်လမှာ သူရဦးရွှေမန်းဖယ်ရှားခံခဲ့ရပြီး အဲဒီဖြစ်စဥ်က သန်းခေါင်ယံအာဏာသိမ်းပွဲဆိုပြီး နာမည်ကြီးပါတယ်။
