KALLATTIIN, ''Kan waliigalle mariin osoo hin taane misaa'elota kiyyaani'' - Iraan

Haguuggii Tamsaasa Kallattii

1. Sa'aatii 3 duraArteettaan Timber deebiyuufi dhiisuu isaa, akkasumas qophii taasisaa jiranirratti dubbate

   Tapha waancaa Shaampiyoons Liigii Awurooppaa bor galgala Budapestitti Arsenaal fi PSG gidduutti gaggeeffamu ilaalchisee leenjisaan Arsenaal Mikeel Arteettaa ibsa kenneera.

   Tapha murteessaa kanarratti taphataan sarara ittisaa Juuriyaan Timber miidhamarra waan tureef deebiyamoo hin deebiyu kan jedhu gaaffii deeggartootaati.

   Arteettaan Timber tapha kanaaf fayyee deebiyee qophaa’aa akka ture ibseera. Noonii Maaduweekeenis miidhama isa mudaterraa fayyee kan deebiye yoo ta’u Been Waayit garuu tapha Sambata borii kanarraa hafeera.

   Kan asirra geenye Sababa hiree ittiin as geenyu filannee irratti hojjenneef kan jedhe Arteettaan, shaampiyoonaa bara darbeerraa waancaa fudhachuuf qophaa’uu dubbate.

   Taphataan sarara fuula duraa Arsenaal Bukaayoo Saakaa, waancaa Shaampiyoons Liigii borii kana mo’annee ammas carraa irra deebiin gammaduu qabnda jedha.

2. Sa'aatii 4 dura'Waliigalteerra kan geenye mariidhaan osoo hin taane, misaayiloota keenyani' -Iraan

   Mariin Ameerikaa fi Iraan torbanootaaf gaggeessaa turan gara waliigalteetti dhiyaachuu isaa wayita dubatamaa jirutti, qondaalli Olaanaan biyyattii "Iraan fedhiin ishee fudhatama kan argate mariidhaan osoo hin taane, misaayiloota isheetini" jedhan.

   Af-yaa'iin paarlaamaa Iraan, siyaasaa Rippaabilika Islaamummaa Iraan keessatti dhiibbaa guddaa qaban, akkasumas marii Ameerikaa waliin taasifamu kan dursan Mohaammad Baagir Gaaliibaaf, barruu fuula X isaanirratti barreessaniin dandeettiin waraana Iraan dhiibbaa uumuu isaa ibsaniiru.

   Gaaliibaaf marii Ameerikaa waliin taasifamaa jiru ilaalchisee qabxiiwwan sadii kaa'aniiru.

   Inni jalqabaa: "Waliigaltee irra kan gahamu haasaadhaan osoo hin taane, misaayiloota keenyaani. Haala mariiwwan sana keessatti nuti gochaa turres kana kan ibsuu dha" jedhan.

   Qabxiin isaanii lammaffaan immoo, marii sana keessatti wal-amantaa dhabuu gama lamaan gidduu jiru kaasuun: "Wabii fi jechoota hin amannu; madaallii tokkichi gocha dha. Gamni sun waan irraa eegamu utuu hin raawwatin tarkaanfiin kamiyyuu hin fudhatamu" jechuun, tarkaanfiin jalqabaa gama Ameerikaatiin ta'uu akka qabu akeekan.

   Qondaalli ol’aanaan Iraan qabxii sadaffaa irratti yaadni kaa'an: "Mo'ataan waliigaltee kamiyyuu, isa waraana fuuldura dhufuuf haala fooyya'aadhaan of qopheesse dha" kan jedhu yoo ta'u, waliigaltee boodas Iraan lola kamiyyuu keessummeessuuf qophii ta'uu ishee ibsaniiru.

   Waraana dhuma ji'a Gurraandhalaa irratti jalqabamee ji'oota afur fudhate kanaan, Ameerikaa fi Israa'el Iraan irratti miidhaa jabaa yoo geessisanis; Iraanis gama isheetiin Israa'el fi naannawa ishee, akkasumas biyyoota Galoo Galaanaa waraana Ameerikaa qubsiisanii jiran irratti miidhaan geessifte laayyoo miti.

   Kana malees, Ulaa Hoormuuz kan dhiyeessii boba'aa fi gaazii addunyaatiif murteessaa ta'e cufuudhaan, guutuu addunyaa irratti dhiibbaa guddaa uumteetti.

3. Sa'aatii 5 duraJoosee Moorinhoo leenjisaa Riyaaal Maadrid ta'uuf waliigaltee mallatteesseera.

   Joosee Moorinhoo leenjisaa Riyaaal Maadrid itti aanu ta'uuf waliigaltee mallatteesseera.

   Namni ganna 63 Moorinhoon torban dabre waliigaltee isaa kan mallatteesse yoo ta'u, waliigaltee hanga Waxabajjii 2029tti magaalaa guddoo Ispeenitti deebi'uun dinqii hojjechuuf qophaa'eera jedha gabaasni Newyork Times.

   Moorinhoon filannoo pirezidantii Maadrid Florentino Perez jedhameera ti.

   Leenjisaan lammii Poortugaal Joosee Moorinhoon kanaan dura bara 2010 hanga 2013tti Riyaal Maadrid leenjisaa turuun ni yaadatama.

   Joosee Moriiniho: Leenjisaa jabaa addunyaa duuba haadha warraa jabduu

4. Sa'aatii 6 duraBalaa ibidda mana barumsaa Keeniyaatti mudateen barattoonni 8 shakkamanii to'ataman

   Balaan ibiddaa doormii barattoota dubaraa keessatti ka'een barattoonni 16 erga du'anii booda, aangawoonni Keeniyaa barattoota saddeet to'annoo jala oolchuu beeksisan.

   Qorattoonni akka jedhanitti, barattoonni saddeettan kan qabaman sababa balaa kanaa baruuf qorannoo jalqabaa taasifameen ibiddichi ta'e jedhamee akka kaafame ragaaleen agarsiisan waan argamaniifi.

   Halkan Roobii Kamisatti barii, mana jireenyaa barattootaa keessatti ibidda ka'een barattoonni 16 yoo du'an, 70 ol ammoo miidhamaniiru.

   Poolisiin akka beeksisetti, barattoonni shakkaman to'annoo jala kan oolan erga gara mana isaanii deemanii booda hordoffii taasifameen yoo ta'u, warri kaan ammoo naannoo mana barumsaa dhokatanii osoo jiraniiyi.

   Balaa ibiddaa hamaa kanaan walqabatee barattoonni saddeet amma harka poolisii jiran, jalqaba irratti barattoota 13 qabaman keessaa kanneen adda baafamani.

   Qorattoonni balaa ibiddaa mana namoota dhibba tokkoo ol keessa jiraatan irratti qaqqabe kana, ta'e jedhamee kaafame shakki jedhu irratti xiyyeeffatanii qorachaa jiru.

   Haaluma kanaan, barattoota balaa kanaan du'an adda baasuun waan tureef maatiin gadda jabaa keessa kan jiru yoo ta'u, barattoonni miidhaman ammoo yaalii fayyaa argachaa jiru.

   Boordiin bulchiinsa mana barumsaa sanaa dambiiwwan nageenya barattootaa eegsisan hojiirra oolchuu dhabuu isaatiin akka diigamu yoo taasifamu, daayirektara mana barumsichaa irratti ammoo qorannoon naamusaa godhamaa jira.

5. Sa'aatii 6 duraYugaandatti lakkoofsi namoota vaayirasii Iboolaan qabamanii dabale

   Ministeerri Fayyaa Yugaandaa magaalaa guddoo Kaampaalaatti namootni dabalataa lama vaayirasii IboOlaan qabamuu isaanii mirkaneesseera.

   Kanaanis, lakkoofsi namoota Yugaandaa keessatti vaayirasichaan qabamuun isaanii mirkanaa’e sagal (9) ga’eera.Ibsa Ministeerri Fayyaa Ugandaa baaseen, namoonni haaraan qabaman lammiilee Rippaabiliika Dimokiraatawaa Koongoo (DRC) yoo ta’an, yeroo ammaa kana hordoffiin yaalaa godhamaafii jira.Roobii darbe aangawoonni Yugandaa babal’ina vaayirasichaa to’achuuf tarkaanfii fudhataniin, daangaa biyyattii fi Rippaabiliika Dimokiraatawa Koongoo gidduu jiru cufaniiru.Yugaandaan dabalataan walga’iiwwan uummataa gurguddoo kan dhorkite yoo ta’u, babal’ina vaayirasii IbOola ittisuuf sakatta’iinsa daangaa irratti taasifamu cimsiteetti.

6. Sa'aatii 9 duraIsraa'el Gaazaa keessatti ajajaa waraanaa Hamaas ajjeesuu himte

   Waraanni Israa'el kaaba sulula Gaazaa keessatti tarkaanfii fudhateen ajajaa loltoota Hamaas, Imaad Hasan Huseen Asliim ajjeesuu beeksise.

   Waraanni Israa'el ergaa X irratti maxxanseen, tajaajila nageenya keessoo Israa'eel 'Shin Beet' jedhamu waliin ta'uun tarkaanfii Roobii darbe fudhataniin Asliim "ajjeefamuu" isaa ibseera.

   Itti dabaluunis, Imaad Hasan Huseen Asliim ajajaa kutaa waraanaa Hamaas kan Zayituun jedhamuu fi itti aanaa ajajaa humna Birgeedii Magaalaa Gaazaa ta'uu ibseera.

   Ajajaan kun Gaazaa keessatti loltoota Israa'el irratti "haleellaa shororkaa hedduu kan hogganee" fi "yaaddoo qabatamaa kan uumedha" jechuun himateera.

   Ajjeefamuu Imaad Hasan Huseen Asliim ilaalchisee ibsa waraanni Israa'eel baaseerratti gama Hamaasiin hanga ammaatti wanti mirkanaaye hin jiru.

   Haa ta'uu malee, ajjeefamuun ajajaa kanaa yoo mirkanaa'e, Asliim hogganoota waraanaa Hamaas sadarkaa olaanaa torbaan lamaan darban keessatti ajjeefaman keessaa isa sadaffaa ta'a.

   Torban kana keessa hogganaan garee kanaa kan biraan sadarkaa hoggansaa olaanaarra ture Mohammad Oodeeh haleellaa Israa'eeliin haadha warraa fi ijoollee isaa lama waliin ajjeefameera.

   Kana malees, ajajaan muummee Birgeedii Qasam kan garee waraanaa Falasxiin, Iiz Al-diin Al-Hadaad, torbanoota dura haleellaa raawwatameen ajjeefameera.

7. 29 Caamsaa 2026Mana aanga’aa duraanii CIA keessatti amooleen warqee dolaara miliyoona 40 baasu argame

   Aanga’aan duraanii dhaabbata basaasaa Ameerikaa (CIA) tokko manni isaa sakatta’amee amooleen warqii dolaara miliyoona 40 baasu argamee to’annoo jala oolfamuu isaa miidiyaaleen gabaasaniiru.

   Qorattoonni FBI nama kana kann to’atan waa’ee barnootaa isaafi seenaa loltummaa isaa yoo sobeera ta’eef jecha qulqulleeffachuuf hojjechaa wayita jiranitti ture amoolee warqee erga arganii booda.

   Sanadoonni mana-murtiifi maddeen dhimmicha beekan akka jedhanitti, aanga’aan duraanii CIA Deeviid Raash yeroo ammaa kana mana-hidhaatti argama.

   CBS TVn akka gabaasetti, namni kun yakka qabeenya hawaasaa hatuun shakkamee himanni irratti banameera.

   FBI amoolee warqee seeraan ala qabatee, miindaa isaaf maluun ol fudhachuufi yaada soba ta’e baayyee kennuu isaatiin himatameera.

8. 29 Caamsaa 2026Raashiyaan Romaaniyaatti gamoo mana jireenyaa haleeluu NATOn balaaleffate

   Raashiyaan dirooniin Romaaniyaatti gamoon mana jireenyaa waloo haleelte. Aanga’oonni Waliigaltee Waraanaa Atilaantikii Kaabaa (NATO) fi Gamtaan Awurooppaa gocha kana balaaleffataniiru.

   Dirooniin Raashiyaa erga gamoo mana jireenyaa rukkuteen booda abiddi dhalachuufi namoonni lama madaa’uun ibsameera.

   Taateen kun magaalaa Romaaniyaa gama bahaan jirtu daangaa Yukireeniifi Moldooviyaatti dhiyootti argamutti raawwatme kana booda pirezidantiin mana-maree Gamtaa Awurooppaa Arsulaa Voon Dar Leeyin “of tuulmaan waraana Raashiyaa ammas sarara isaa darbeera,” jette.

   NATO’n ammoo Raashiyaa “maal na dhibdeen socho’a” jechuun balaaleffateera.

   Waraana wagga fur guute kana keessatti dirooniin Raashiyaa daangaa Romaaniyarratti mul’atullee, lammilee biyyoota miseensa NATO irraan miidhaa yeroo geessisu kun kan jalqabaati.

   Waa’ee taatee kanaa Raashiyaan hanga ammaa yaada hin kennine.

   Dhaabbanni ittisa balaa Romaaniyaa akka jedhetti, gamoo mana jireenyaa darbii 10ffaa irratti abiddi ka’eera. Namoonni 70 gamoo sana keessaa akka ba’an yoo taasifaman, namoonni miidhaan irra gahe lama wallaansa argataniiru.

   Pirezidant Nikusoor Daan mana-maree ittisaa olaanaa biyyattii waliin marii hatattamaa taasiseeera.

9. 29 Caamsaa 2026Iraan fi US turtii dhukaasa dhaabuu dheeressuuf waliigalan

   Iraan fi Yunaayitid Isteetis (US) turtii waliigaltee dhukaasa dhaabuu dheeressuuf, akkasumas dhorkaa imala dooniiwwanii karaa Ulaa Hormuuz ture kaasuuf waliigaluu Rooyitars maddeen eeruun gabaaseera.

   Dhimma kana Pirezidantiin US Doonaald Tiraamp ammatti kan hin mirkaneessine yoo yoo ta’u, miidiyaan Iraan ammoo waliigalteen kun ammallee hin xumuramne jechaa jiru.

   Akka maddeen afur dhimmicha keessa beekan jedhanitti, waliigalteen amma akun dhukaasa dhaabuu guyyoota 60f akka dheeratuufi imala doonii karaa Ulaa Hormuuz dorkamee ture kaasuun deemsi galaanaa akka hayyamamu godha. Yeroo kana keessatti ammoo dhimmoota wal xaxoo ta’an akka sagantaa gabbisa nukilaraa Iraan ilaalchisuun jiranirratti fala barbaaduuf mariyachuun itti fufa.

   Aanga’oota Waashingiten fi Teehiraaniin mirkanoofnaan, tarkaanfiin kun erga waraanni Iraan Guraandhala 28 jalqabee as nagaa buusuu keessatti isa baayyee murteessaa ta’edha.

   Oduun carraan waliigalteen jiraachuu mala jedhu kun kan dhaga’ame biyyoota lamaan gidduutti haleellaan haaloo walirratti bahuu walitti aansee gaggeeffamuun booda yoo ta’u, kunis taatee waliigaltee dhukaasa dhaabuu jalqaba Eblaa keessa jalqabee dhiyeenya kana mudatedha.

   Maddeen akka jedhanitti, Tiraamp ammatti waliigaltee kana hin mirkaneessiin jira.

   Iraan ammoo yaada waliigaltee dhiyaate kanarratti ammaaf yada hin kenniin jirti akka Aksiyoos gabaasetti.

   Maddi oduu Iraan Tasnim jedhamu ammoo warra garee marii nagaa keessa jiranitti dhiyaatan waabeffachuun akka gabaasetti, barreeffamni waliigaltee kanaa hin xumuramne ykn hin mirkanoofne.

   Odeeffannoo biraa:

   Dirooniiwwan xixiqqoo Hezbollaa waraana Israa'el qoraa jiran

   Waliigalteen Abirahaam Tiraamp biyyoonni akka mallatteessan barbaadan maali?

10. 29 Caamsaa 2026Keeniyaatti abidda mana barumsaatti qabateen barattoonni 16 du'an

    Keeniyaa mana baruumsa bultii dubartootaa keessatti balaa abiddaa mudateen barattoonni 16 du'an.

    Bakki balaan itti mudate magaalaa Naayiroobii irraa gara kaabatti faageenya 120km irratti argamu Mana Baruumsaa Utumuushii jedhamutti yoo ta'u, mana baruumsaa bultii kan dubartootati.

    Sababa ka'uumsa balaa abiddaa kana ammayyuu qoratamaa akka jiru ibsan qondaalonni mootummaa.

    Haa ta'u garuu, maatiin barattootaafi lammiileen biyyattii miidiyaa hawaasaa irratti akkaataa qabiinsaafi nageenyaa manneen barnootaa bultii ulaagaa irraa eegamu kan hin guunne jechuun gaaffii kaasaa jiru.

    Barattoota 16 du'aniin alatti 79 ammoo madaa'anii hospitaala galanis hedduunsaanii waldhaansa argatanii bahaniiru.

    Yeroo abiddi ka'u barattoota 800 ol mana baruumsichaa keessa turan.

    Keeniyaatti mana baruumsa bultii keessatti abiddi ka'uun kun kan jalqabaa miti- kanaan dura si'a heddu abidda ka'een lubbuun namootaa gaaga'ameera.

    Waggaa lama dura giddu gala Keeniyaatti mana baruumsa bultii keessatti kutaa ciisichaa barattootaa keessatti abidda ka'een namoonni 21 du'uunsaanii ni yaadatama.

11. 29 Caamsaa 2026Isra'el humni waraana biyyattii Gaazaa harka 70 akka to'atu ajajje

    Ministiirri Muummee Israa'el Beeniyaamiin Netaaniyaahuu Gaazaa dhibbeentaa 70 akka to'atuuf humna waraana biyyattiif ajaja kennuu ibse.

    Kamisa, Caamsaa 29, haasaa taasiseen: "Yeroo ammaa Hamaas kokkee qabnee jirra. Daangaa [Gaazaa] dhibbeentaa 60 to'annee jirra," jechuun yeroo dubbatu namoonni itti wal-gahiirratti haasaa taasisaafii ture keessaa "parsantaa 100 godhi" jedhanii sagalee kan dhageessisan turan.

    "Gulantaa gulantaan itti haa deemnu. Ammaaf dhibbeentaa 70 [haa to'annu]. Sanaan haa eegallu. Kallattii hundarraa haleelaa jirra," jechuun dubbate.

    Tarkaanfiin mootummaan Israa'el fudhate kun waliigaltee dhukaasa dhaabuu dhiibbaa Tiraampin waliigalame kan faallessuudha.

    Waliigalteen dhukaasa dhaabuu jiraatus Israa'el Gaazaa keessatti haleellaa guutummaan hin dhaabne.

    Onkoloolessa darbe erga waliigalteen dhukaasa dhaabuu mallattaa'e haleellaa Israa'el gaggeessituun Gaazaa keessatti yoo xiqqaate namoonni 738 ajjeefamaniiru.

12. 29 Caamsaa 2026Ashamaa!

    Tamsaasi kallattii keenya har'aa jalqabeera.

    Israa'el Libaanosifi Gaazaa irratti duula haaraa eegalteetti. Beeniyaamiin Netaaniyaahuu waraanni Israa'el Gaazaa parsantaa 70 akka to'atu ajajuu hime.

    Muddamni US-Iraanis akkuma itti fufetti jira.

    Odeessaalee biyya keessaafi idiladdunyaa isin biraan geenya. Karaa marsariitii, facebook, YouTube fi WhatsApp BBC Afaan Oromoo argachuu dandeessu!