Ким Ву Чунгни маҳкамага ногиронлар аравасида келтиришган

Қамоқ жазосига ҳукм этилган Жанубий Кореянинг "ДЭУ" ширкати асосчисb ва собиқ раҳбари Ким Ву Чунг янги йил авфига мувофиқ озод этилган.

71 ёшли Ким Ву Чунг 2006 йилнинг май ойида ҳужжатларни сохталаштириш, ноқонуний молиялаш ва фирибгарлик сингари қатор жиноий бандларда айбланиб, 10 йиллик қамоққа ҳукм этилган эди.

Бироқ бир ойдан сўнг маҳкама Ким Ву Чунг устидан чиқарилган ҳукмни унинг соғлиги боис тўхтатиш тўғрисида қарор чиқарган.

Daewoo 1999 йилда молиявий инқирозга учради, корпорациянинг жами қарзлари 82 миллиард долларини ташкил этиши маълум бўлди.

Жанубий Корея ҳукуматининг "ДЭУ"ни тўлиқ банкротликдан қутқаришнинг имкони бўлмаганидан унинг тасарруфидаги айрим ширкатларни қўллаб-қувватлашига тўғри келди.

Ким Ву Чунг мамлакатни ташлаб кетишга мажбур бўлди.

Унинг устидан жиноий иш қўзғатилди, Ким Ву Чунгни қўли остидагиларга кредит олиш мақсадида ҳужжатларни сохталаштириш буйруғини берганликда айблашди, ундан сўнг маблағни мамлакатдан четга олиб чиқиш сингари бир неча айблар қўйилди.

2005 йилда Ким Ву Чунг Жанубий Кореяга қайтишга аҳд қилади.

Ундан "ДЭУ"га келтирилган 22 миллиард доллардан ортиқ молиявий зарар ва жаримани тўлаш талаб қилинди.

Кичик тўқимачилик ширкати бўлган Daewooни Ким Ву Чунг 1967 йилда 5000 АҚШ долларига сотиб олган.

Ким Ву Чунг тўқимачилик ширкатини Жанубий Кореянинг йирик қудратли саноат корпорациясига айлантиришга муваффақ бўлди.

"ДЭУ"нинг маиший техника, автомобиль ва кемасозлик сингари қатор соҳаларда фаолият юритган 110 мамлакатдаги корхоналари 320 минг кишини иш билан таъминлаган.

Daewoo 1992 йилда Ўзбекистон раҳбарияти билан автомобиль ишлаб чиқариш бўйича қўшма корхона ташкил этиш тўғрисида шартнома имзолаган.

Асакадаги "ЎзДЭУавто" қўшма корхонаси 1996 йилдан автомобиллар ишлаб чиқаришни бошлаган.

"ДЭУ"инқирозидан кейин 2002 йилда ширкат акцияларини General Motors сотиб олди.