Ким Ву Чунг олти йил қочиб юрганидан сўнг ўз ихтиёри билан ватанига қайтган

Сеул маҳкамаси ДЭУ ширкатининг асосчиси ва раҳбари Ким Ву Чунгни ўн йиллик қамоқ жазосига ҳукм этган. Бундан ташқари у 22 миллиард АҚШ доллари миқдоридаги маблағни давлатга қайтариши ва 10 миллион долларлик жарима тўлаши шарт.

Ким Ву Чунг ДЭУга раҳбарлик қилган йиллари бухгалтерия ҳужжатларини сохталаштириш, ноқонуний молиялаш ва маблағни мамлакатдан четга чиқариш каби бандларда айбдор, деб топилган.

69 ёшли, Сеулдаги маҳкамага ногиронлар аравасида келтирилган Ким Ву Чунгга қўйилаётган асосий айб - у узоқ йиллар мобайнида ДЭУ ширкатининг ҳақиқий иқтисодий аҳволини яшириб келганликдир.

Кейин аниқланишича, ДЭУ йилдан йилга даромад кўрмасдан фаолият юритган, унинг ишлаб чиқариш корхоналари йилни молиявий зарар билан якунлайверган. Бироқ компанияга асос солган ва уни бошқариб келган Ким Ву Чунг ширкатнинг молиявий аҳволини ҳужжатларда кўнгилдагидек қилиб кўрсатиб келган ҳамда давлатдан, банклардан кредитлар олишни давом эттирган.

1998 йилдаги Осиё мамлакатларидаги молиявий инқироздан кейин ДЭУ ҳам касодга учради, ширкатнинг 80 миллиард АҚШ долларилик қарзи мавжудлиги аниқ бўлди. Кредиторлар ўз маблағларини талаб қила бошладилар. Можародан сўнг Ким Ву Чунг Жанубий Кореядан қочишга мажбур бўлди.

Ким Ву Чунг қочиб кетганидан кейин қарзлардан қутилиш учун ДЭУга тегишли маиший техника жиҳозлари ишлаб чиқарадиган, кемасозлик сингари заводларини сотиб юборишга тўғри келди. ДЭУнинг Дунёнинг қатор мамлакатларидаги автомобилсозлик заводлари Американинг "Женерал Моторс" ширкати ихтиёрига ўтди.

Олти йил мобайнида Ким Ву Чунг асосан Францияда яшириниб юрган. Бир йил олдин у Кореяга қайтишга қарор қилган, аэропортда у ҳибсга олинганди.

ДЭУ инқирози Ўзбекистондаги корхоналарига қандай таъсир қилди?

	Асакадаги "УзДЭУавто" заводи Ўзбекистон фахри бўлган корхоналардан

Жанубий Кореяда ДЭУнинг асосий ширкати банкротга учраган пайтда Ўзбекистонда фақат автомобиль заводи фаолият юритаётганди, орада бирмунча вақт "УзДЭУавто" ҳам Кореядан эҳтиёт қисмларни етказиб бериш мушкулликларига дуч келди.

"Женерал Моторс" 2002 йилда ДЭУнинг автомобилсозлик заводларини сотиб олганидан кейин Ўзбекистон ҳукумати "Женерал Моторс" раҳбарияти билан "УзДЭУавто" қўшма корхонаси келажагини муҳокама этдилар. Ҳукуматнинг тўла кафолати олинганидан кейин заводнинг фаолият йўналиши ва чиқарилаётган автомобиллар русумларини ўзгартирмасликка қарор қилинди.

"УзДЭУавто"нинг бошланғич қиймати 650 миллион долларга баҳоланган бўлиб, ўтган йили Ўзбекистон ҳукумати қўшма корхонанинг корейс ҳамкорларга тегишли бўлган улушларини ҳам сотиб олиб, заводнинг тўла хўжайинига айланди.

Ўзбекистон расмийлари Жанубий Кореядаги инқироз "УзДЭУавто"га сезиларли салбий таъсир кўрсатмаганини айтишган, буни завод учун эҳтиёт қисмларнинг аскарини Ўзбекистоннинг ўзида ишлаб чиқариш йўлга қўйилгани билан тушунтиришган. Ҳозир "УзДЭУавто"ни автомобиль ойналари, ғилдираклар, бўёқлар ва электр симлари билан 30 тача корхона таъминлаб туради.