లైవ్ , ఒకే ఫ్రేమ్‌లో షీ జిన్‌పింగ్, ట్రంప్, పుతిన్

షెన్‌జెన్‌లో ఈ రాత్రి జరగనున్న విందుకు ముందు, ముగ్గురు నేతలు రెడ్ కార్పెట్‌పై ఉన్న వీడియోను రష్యా అధ్యక్ష కార్యాలయ మీడియా బృందం టెలిగ్రామ్‌లో పోస్ట్ చేసింది.

సారాంశం

  • ట్రంప్, పుతిన్, షీ జిన్‌పింగ్ ముగ్గురూ తొలిసారి ఒకే ఫ్రేమ్‌లో కనిపించారు. ఈ ముగ్గురు నేతలు రేపు మధ్యాహ్నం సమావేశం కానున్నారు.
  • విమానాశ్రయానికి స్వయంగా వెళ్లి ట్రంప్‌ను ఆహ్వానించారు షీ జిన్‌పింగ్.
  • అమెరికా అధ్యక్షుడు డోనల్డ్ ట్రంప్, చైనా అధ్యక్షుడు షీ జిన్‌పింగ్, రష్యా అధ్యక్షుడు వ్లాదిమిర్ పుతిన్ మధ్య సమావేశం జరగనున్న నేపథ్యంలో ట్రంప్ చైనా చేరుకున్నారు.
  • అక్వాన్ తుపాను అతి తీవ్ర తుపాన్‌గా మారి ఆంధ్రప్రశ్‌లో తీరం దాటనుందని వాతావరణశాఖ తెలిపింది.
  • దక్షిణ, పశ్చిమ మధ్య బంగాళాఖాతంలో ఏర్పడిన అక్వాన్ తుపాను గంటకు 8 కిలోమీటర్ల వేగంతో కదులుతోందని వాతావరణశాఖ తెలిపింది.
  • అమెరికా అధ్యక్షుడు డోనల్డ్ ట్రంప్, చైనా అధ్యక్షుడు షీ జిన్‌పింగ్, రష్యా అధ్యక్షుడు వ్లాదిమిర్ పుతిన్ మధ్య చారిత్రక సమావేశం రేపు(నవంబర్ 19)జరగనుంది.
  • రష్యాలోని సైబీరియాలో సైనిక కార్గో విమానం కూలిపోవడంతో అందులో ప్రయాణిస్తున్న 19 మంది మరణించారు.

లైవ్ కవరేజీ

  1. గుడ్‌నైట్

    ఈ లైవ్ పేజీని ఇంతటితో ముగిస్తున్నాం.

    ఈరోజు ముఖ్యమైన కథనాలను చదవడానికి ఇక్కడ క్లిక్ చేయండి.

    ధన్యవాదాలు.

  2. మీ శ్వాసలో పండ్ల వాసన వస్తోందా? - డయాబెటిస్ గురించి ఈ 6 లక్షణాలు తెలుసుకోండి

    డయాబెటిక్ కీటోఅసిడోసిస్ అనేది మధుమేహం వల్ల వచ్చే తీవ్రమైన సమస్యల్లో ఒకటిగా పరిగణిస్తారు.
    ఫొటో క్యాప్షన్, డయాబెటిక్ కీటోఅసిడోసిస్ అనేది మధుమేహం వల్ల వచ్చే తీవ్రమైన సమస్యల్లో ఒకటిగా పరిగణిస్తారు.

    "డయాబెటిస్ ఉన్నవారిలో దాదాపు 50 శాతం మందికి ఎలాంటి లక్షణాలూ కనిపించకపోవచ్చు. అందుకే ప్రతి ఆరు నెలలకోసారి తప్పనిసరిగా డయాబెటిస్ టెస్ట్‌లు చేయించుకోవాలి. ఎలాంటి లక్షణాలు లేకపోయినా, కొన్నిసార్లు టెస్ట్‌ చేయించినప్పుడు రక్తంలో చక్కెర స్థాయులు 300-400 వరకు ఉండొచ్చు. లక్షణాలు కనిపించాలనే నిబంధన ఏమీ లేదు’’ మరింత చదవండి

  3. జార్ఖండ్: ఎన్టీపీసీ ప్రాజెక్ట్‌లో ప్రమాదం, ముగ్గురు కార్మికులు మృతి

    ఎన్టీపీసీ ఎక్స్‌టర్నల్ సీహెచ్‌పీ ప్రాజెక్టు పనులు, ప్రమాదం
    ఫొటో క్యాప్షన్, ఎన్టీపీసీ ఎక్స్‌టర్నల్ సీహెచ్‌పీ ప్రాజెక్ట్‌ పనులు జరుగుతున్న సమయంలో ఈ ప్రమాదం జరిగింది.

    జార్ఖండ్‌లోని ఎన్టీపీసీ ఎక్స్‌టర్నల్ సీహెచ్‌పీ ప్రాజెక్ట్‌లో టేకప్ ట్రాలీ కిందపడటంతో అక్కడ పనిచేస్తున్న ముగ్గురు కార్మికులు మృతి చెందారు.

    ఈ ప్రమాదం చత్రా జిల్లాలో, టండ్వా పోలీస్ స్టేషన్ పరిధిలో ఉన్న ఎన్టీపీసీ ఎక్స్‌టర్నల్ సీహెచ్‌పీ ప్రాజెక్ట్ ప్రాంగణంలో జరిగింది.

    ఈ ప్రమాదంలో ముగ్గురు కార్మికులు మృతి చెందిన విషయాన్ని చత్రా జిల్లా పోలీసు సూపరింటెండెంట్ అనిమేష్ నైథానీ ధ్రువీకరించారు.

    “ప్రాజెక్ట్‌లోని కోల్ కన్వేయర్ బెల్ట్ జంక్షన్ నంబర్‌-1 వద్ద జరిగిన ఈ ప్రమాదంలో ముగ్గురు కార్మికులు అక్కడికక్కడే మృతి చెందారు. తీవ్రంగా గాయపడిన మరో కార్మికుడు ఆసుపత్రిలో చికిత్స పొందుతున్నాడు” అని ఆయన తెలిపారు.

    చత్రా, జార్ఖండ్, ప్రమాదం
    ఫొటో క్యాప్షన్, సహాయ చర్యలు కొనసాగుతున్నాయని చత్రా ఎస్పీ అనిమేష్ నైథానీ తెలిపారు.

    “సహాయ, రక్షణ చర్యలు వేగంగా కొనసాగుతున్నాయి. ఇంకా ఎవరైనా కార్మికులు చిక్కుకుని ఉంటే వారిని వెంటనే బయటకు తీసుకొచ్చేందుకు కూడా ప్రయత్నిస్తున్నాం” అని చత్రా ఎస్పీ అనిమేష్ నైథానీ బీబీసీకి చెప్పారు.

    ఈ ప్లాంట్‌లో నిర్మాణ పనులను సింప్లెక్స్ అనే కంపెనీ చేపట్టింది. ఆ పనులు జరుగుతున్న సమయంలోనే ఈ ప్రమాదం జరిగింది.

    దీనిపై ఎక్స్‌లో స్పందించిన జార్ఖండ్ ముఖ్యమంత్రి హేమంత్ సోరెన్ మృతులకు సంతాపం తెలిపారు.

    గాయపడిన వారికి సరైన చికిత్స అందేలా చూడాలని, బాధిత కుటుంబాలకు అన్ని విధాలా సాయం అందించాలని జిల్లా అధికారులను ఆదేశించారు.

  4. ట్రంప్, పుతిన్, షీ జిన్‌పింగ్ తొలిసారి ఒకే ఫ్రేమ్‌లో...

    అమెరికా, చైనా, రష్యా
    ఫొటో క్యాప్షన్, ట్రంప్, పుతిన్, షీ జిన్‌పింగ్ పరస్పరం పలకరించుకున్నారు.

    ట్రంప్, పుతిన్, షీ జిన్‌పింగ్ తొలిసారి ఒకే ఫ్రేమ్‌లో కనిపించారు.

    షెన్‌జెన్‌లో ఈ రాత్రి జరగనున్న విందుకు ముందు, ముగ్గురు నేతలు రెడ్ కార్పెట్‌పై ఉన్న వీడియోను రష్యా అధ్యక్ష కార్యాలయ మీడియా బృందం టెలిగ్రామ్‌లో పోస్ట్ చేసింది.

    ఆ వీడియోలో ట్రంప్, షీ జిన్‌పింగ్, ఆయన భార్య పక్కపక్కనే నిలబడి ఉండగా పుతిన్ అక్కడికి వచ్చారు.

    2025 ఆగస్ట్‌లో అలాస్కాలో జరిగిన రష్యా-అమెరికా శిఖరాగ్ర సమావేశం తర్వాత ట్రంప్, పుతిన్ మళ్లీ కలుసుకోవడం ఇదే తొలిసారి. వారిద్దరూ ఆప్యాయంగా పలకరించుకున్నట్లు కనిపించారు. మొదట కరచాలనం చేసుకుని, తర్వాత ఒకరి భుజంపై మరొకరు తట్టుకున్నారు.

    ఈ ముగ్గురు నేతలు రేపు మధ్యాహ్నం సమావేశం కానున్నారు.

    ఎపెక్ సదస్సు
    ఫొటో క్యాప్షన్, ఎపెక్ సభ్య దేశాల నాయకుల గ్రూప్ ఫోటో
  5. చైనా చేరుకున్న ట్రంప్, ఘనస్వాగతం పలికిన షీ జిన్‌పింగ్

    చైనా, అమెరికా
    ఫొటో క్యాప్షన్, అమెరికా అధ్యక్షుడు ట్రంప్‌కు స్వాగతం పలికేందుకు చైనా అధ్యక్షుడు షీ జిన్‌పింగ్ స్వయంగా షెన్‌జెన్ బావాన్ అంతర్జాతీయ విమానాశ్రయానికి చేరుకున్నారు.

    చైనా అధ్యక్షుడు షీ జిన్‌పింగ్ విమానాశ్రయానికి వెళ్లి ట్రంప్‌కు స్వాగతం పలకడం కేవలం మర్యాదపూర్వక కార్యక్రమమే కాదు. దీని వెనుక ఎంతో ఆలోచించి రూపొందించిన దౌత్య వ్యూహం ఉంది.

    ఇలాంటి స్వాగతానికి ఉన్న ప్రాధాన్యాన్ని షీ జిన్‌పింగ్ అర్థం చేసుకున్నారు.

    షీ జిన్‌పింగ్ అధ్యక్షుడైన తర్వాత తొలిసారి స్వయంగా విమానాశ్రయానికి వెళ్లి ఒక విదేశీ అధ్యక్షుడికి స్వాగతం పలికినట్లు భావిస్తున్నారు.

    అమెరికా అధ్యక్షుడు ట్రంప్ గతంలో చేసిన పనినే షీ జిన్‌పింగ్ ఇప్పుడు చేస్తున్నారు.

    ఈ ఏడాది అమెరికాలో షీ జిన్‌పింగ్‌కు స్వాగతం పలికేందుకు ట్రంప్ స్వయంగా వాషింగ్టన్ విమానాశ్రయానికి వెళ్లారు. ఇప్పుడు చైనా అధ్యక్షుడు కూడా ట్రంప్‌కు స్వాగతం పలకడానికి విమానాశ్రయానికి వెళ్లారు.

    అయితే వ్యక్తిగత గౌరవం, మర్యాద, హోదాకు ట్రంప్ ఎంతో ప్రాధాన్యం ఇస్తారని షీ జిన్‌పింగ్‌కు తెలుసు.

    ఈ బాధ్యతను మరొకరికి అప్పగించకుండా స్వయంగా స్వాగతం పలకడం ద్వారా ట్రంప్‌కు ప్రత్యేక గౌరవం ఇచ్చారు జిన్ పింగ్. ఆయన స్వయంగా వెళ్లి స్వాగతించడం ద్వారా ట్రంప్ తనకు ఎంతో ముఖ్యమైన వ్యక్తి అని తెలియజేస్తున్నారు.

    వాణిజ్యం, తైవాన్, సాంకేతికత వంటి అంశాలపై జరగనున్న చర్చలు ఈ సానుకూల సంకేతంతో సులభతరం అవుతాయని షీ జిన్‌పింగ్ ఆశించవచ్చు.

    తన ప్రతిష్ఠకు ఎలాంటి నష్టం కలగకుండా జిన్ పింగ్ ఈ పని చేయగలరు. ఎందుకంటే ట్రంప్, షీ జిన్‌పింగ్, పుతిన్ మధ్య జరగనున్న ఈ అసాధారణ శిఖరాగ్ర సమావేశానికి సంబంధించిన మొత్తం ప్రణాళిక, ఏర్పాట్లు ఇప్పటికే చైనా నియంత్రణలో ఉన్నాయి.

    ట్రంప్, షీ జిన్‌పింగ్
    ఫొటో క్యాప్షన్, విమానం దిగిన డోనల్డ్ ట్రంప్‌ను ఆలింగనం చేసుకుంటున్న చైనా అధ్యక్షుడు షీ జిన్‌పింగ్.
    సమావేశం
    ఫొటో క్యాప్షన్, అమెరికా అధ్యక్షుడి ఎయిర్ ఫోర్స్1 విమానం చైనాలోని షెన్‌జెన్ బావాన్ అంతర్జాతీయ విమానాశ్రయంలో దిగింది.
    గౌరవ వందనం
    ఫొటో క్యాప్షన్, రన్‌వేపై రెడ్ కార్పెట్‌తో ట్రంప్‌కు స్వాగతం పలికారు చైనా అధ్యక్షుడు షీ జిన్‌పింగ్.
    ట్రంప్, అమెరికా, చైనా
    ఫొటో క్యాప్షన్, స్వాగతం పలికేందుకు వచ్చిన కళాకారులను చప్పట్లతో అభినందిస్తున్న ట్రంప్.
    షెన్‌జెన్‌
    ఫొటో క్యాప్షన్, చైనాలోని షెన్‌జెన్‌లో ట్రంప్‌ను చూసేందుకు వచ్చిన స్థానికులు.
  6. అక్వాన్ తుపాను ఎటు కదులుతోంది?

    అక్వాన్ తుపాను
    ఫొటో క్యాప్షన్, విశాఖపట్నానికి 580 కిలోమీటర్ల దూరంలో కేంద్రీకృతమైన అక్వాన్ తుపాను.

    బంగాళాఖాతంలో ఏర్పడిన అక్వాన్ తుపాను గడిచిన 6 గంటల్లో గంటకు 8 కిమీ వేగంతో కదులుతోందని ఆంధ్రప్రదేశ్ విపత్తు నిర్వహణా సంస్థ తెలిపింది.

    ఈ తుపాన్ ప్రస్తుతానికి చెన్నైకి 570 కి.మీ, మచిలీపట్నానికి 590 కి.మీ, విశాఖపట్నానికి 580 కి.మీ, పూరీకు 770 కి.మీ దూరంలో కేంద్రీకృతమైనట్టు ఏపీఎస్‌డీఎంఏ తన తాజా సమాచారంలో తెలిపింది.

    రేపు మధ్యాహ్నం నర్సాపూర్‌ నుంచి పూరీ మధ్య తీరం దాటే అవకాశం ఉందని ఏపీఎస్‌డీఎంఏ చెప్పింది.

  7. గుడ్ ఆఫ్టర్‌నూన్, నేను షేక్ అన్సారి,బీబీసీ ప్రతినిధిని. ఇప్పటినుంచి రాత్రి పదిగంటలవరకు లైవ్ పేజ్ వార్తలను అందిస్తాను.

  8. ఎనిమిదేళ్ల నాటి బాల్ ట్యాంపరింగ్ వివాదంపై క్రికెట్ ఆస్ట్రేలియా కీలక నిర్ణయం

    బాల్ ట్యాంపరింగ్
    ఫొటో క్యాప్షన్, క్రికెట్ ఆస్ట్రేలియా

    బాల్ ట్యాంపరింగ్ వివాదంలో ఆరోపణలు ఎదుర్కొన్న ఆటగాళ్లు, సిబ్బంది తమ వాదనను వినిపించేందుకు క్రికెట్ ఆస్ట్రేలియా ఒక వేదికను ఏర్పాటు చేసింది. 2018లో ఈ వివాదం నెలకొంది.

    అయితే ఇది కేసు పునర్విచారణ కాదని, ఎవరినీ శిక్షించే ఉద్దేశం కూడా లేదని క్రికెట్ ఆస్ట్రేలియా స్పష్టం చేసింది. ఇందులో పాల్గొనడం పూర్తిగా స్వచ్ఛందమని పేర్కొంది.

    2018లో దక్షిణాఫ్రికాతో జరిగిన టెస్ట్ సిరీస్ సమయంలో బంతి ఆకారాన్ని మార్చేందుకు శాండ్‌పేపర్‌ను ఉపయోగించిన విషయం ఆస్ట్రేలియా జట్టు మొత్తానికి తెలుసని మాజీ క్రికెటర్ ఉస్మాన్ ఖవాజా చేసిన వ్యాఖ్యల నేపథ్యంలో క్రికెట్ ఆస్ట్రేలియా ఈ నిర్ణయం తీసుకుంది.

    "ఆ సమయంలో కొంతమంది ఆటగాళ్ల అభిప్రాయాలను పరిగణనలోకి తీసుకోలేదని తెలిసింది. ఇప్పుడు వారు ఎలాంటి తీర్పు లేదా శిక్షల భయం లేకుండా తమ అభిప్రాయాలను వ్యక్తపరిచే అవకాశం కల్పిస్తున్నాం’’ అని క్రికెట్ ఆస్ట్రేలియా చీఫ్ ఎగ్జిక్యూటివ్ ఆఫీసర్ టాడ్ గ్రీన్‌బర్గ్ చెప్పారు.

    2018లో ఈ వివాదం వెలుగులోకివచ్చిన తర్వాత అప్పటి ఆస్ట్రేలియా కెప్టెన్ స్టీవ్ స్మిత్, వైస్ కెప్టెన్ డేవిడ్ వార్నర్, బ్యాట్స్‌మెన్ కామెరాన్ బాన్‌క్రాఫ్ట్‌పై నిషేధం విధించారు.

  9. పుతిన్, జిన్‌‌పింగ్ భేటీ, 50వసారి సమావేశమైన నేతలు

    రష్యా, చైనా
    ఫొటో క్యాప్షన్, పుతిన్, జిన్‌పింగ్

    రష్యా అధ్యక్షుడు పుతిన్, చైనా అధ్యక్షుడు జిన్‌పింగ్ 50వసారి సమావేశమయ్యారు. ఆసియా-పసిఫిక్ ఎకనామిక్ కోఆపరేషన్ సదస్సు సందర్భంగా పుతిన్, జిన్‌పింగ్‌, ట్రంప్ మధ్య కీలక సమావేశం గురువారం(నవంబర్ 19) జరగనుంది.

    ఆ సమావేశానికి ముందు పుతిన్, జిన్‌పింగ్ భేటీ అయ్యారు. తమ ప్రతినిధి బృందాలతో కలిసి సమావేశంలో పాల్గొన్నారు.

    ఇలాంటి సమావేశాలు వాళ్లిద్దరి మధ్య గతంలో చాలా సార్లు జరిగాయి.

    "నా చిరకాల మిత్రమా...మనం 50వసారి వ్యక్తిగతంగా సమావేశం కావడం ప్రత్యేకమైన విషయం" అని పుతిన్‌తో జిన్‌పింగ్ అన్నారు.

    అంతర్జాతీయంగా గందరగోళం, సంక్షోభ పరిస్థితులు నెలకొన్న ప్రస్తుత సమయంలో రష్యా, చైనా మధ్య సంబంధాలు మరింత స్థిరత్వాన్ని, నమ్మకాన్ని తీసుకొస్తున్నాయని ఆయన అన్నారు.

    యుక్రెయిన్‌పై యుద్ధం ద్వారా ప్రపంచంలో అస్థిరత, ఉద్రిక్తతలకు రష్యా కారణమవుతోందని పాశ్చాత్య దేశాల నాయకులు ఆరోపిస్తున్నారు. కానీ రష్యా కీలక మిత్రదేశమైన చైనా నుంచి మాత్రం ఇలాంటి విమర్శలు వినిపించలేదు.

  10. అక్వాన్ తీవ్ర తుపాన్ మచిలీపట్నం- పూరీ మధ్య తీరం దాటే అవకాశం

    అక్వాన్ తీవ్ర తుపాన్ గడిచిన 6 గంటల్లో గంటకు 7 కిమీ వేగంతో కదులుతోంది. ప్రస్తుతానికి ఇది చెన్నైకి 570 కి.మీ, మచిలీపట్నానికి 590 కి.మీ, విశాఖపట్నానికి 580 కి.మీ, ఒడిశాలోని గోపాల్‌పూర్‌కు 710 కి.మీ దూరంలో కేంద్రీకృతమై ఉంది.

    ఇది ఎల్లుండి(నవంబర్ 20) మధ్యాహ్నానికి మచిలీపట్నం- పూరీ మధ్య తీరం దాటవచ్చని అంచనా వేస్తున్నారు.

    ఉత్తరాంధ్ర జిల్లాల ప్రజలు అప్రమత్తంగా ఉండాలని ఆర్టీజిఎస్ - విపత్తుల నిర్వహణ సంస్థ అధికారులు సూచించారు.

    అక్వాన్ తీవ్ర తుపాన్ మచిలీపట్నం- పూరీ మధ్య తీరం దాటే అవకాశం
    ఫొటో క్యాప్షన్, అక్వాన్ తీవ్ర తుపాన్ మచిలీపట్నం- పూరీ మధ్య తీరం దాటే అవకాశం
  11. కుల్గాం ఎన్‌కౌంటర్‌లో ఒక ఉగ్రవాది హతం: పోలీసులు

    కుల్గాం
    ఫొటో క్యాప్షన్, జమ్మూకశ్మీర్‌లో ఒక ఉగ్రవాది మృతి

    జమ్మూకశ్మీర్‌లోని కుల్గామ్‌లో జరిగిన ఎదురుకాల్పుల్లో ఒక ఉగ్రవాది హతమయ్యాడని భద్రతా దళాలు తెలిపాయి. ఎన్‌కౌంటర్ జరిగిన ప్రదేశం నుంచి కశ్మీర్ జోన్ పోలీసులు ఒక మృతదేహాన్ని, ఒక ఆయుధాన్ని స్వాధీనం చేసుకున్నారని న్యూస్ ఏజెన్సీ పీటీఐ తెలిపింది. మృతుణ్ని లష్కర్-ఏ-తోయిబా అగ్రశ్రేణి ఉగ్రవాది లతీఫ్ భట్‌గా పేర్కొంది.

    "ఒక ఉగ్రవాది మసీదులో తలదాచుకున్నాడు. భద్రతా దళాలు అత్యంత సంయమనం పాటిస్తూ, ఆ పుణ్యక్షేత్రం పవిత్రతను గౌరవిస్తూ, ఆ ఉగ్రవాదిని మసీదు ప్రాంగణం నుంచి తరిమికొట్టాయి. ఆ తర్వాత అతను హతమయ్యాడు" అని భారత్ ఆర్మీ ‘ఎక్స్’లో పోస్ట్ చేసింది.

    జమ్మూకశ్మీర్ పోలీసులు, భద్రతా దళాలు సంయుక్తంగా ఈ ఆపరేషన్ నిర్వహించాయని తెలిపింది. పోలీసులకు అందిన విశ్వసనీయ సమాచారం ఆధారంగా ఆ ప్రాంతాన్ని దిగ్బంధించామని కుల్గాం ఎస్‌ఎస్‌పి అనాయత్ అలీ తెలిపారు.

    లతీఫ్ అనే స్థానిక ఉగ్రవాది అక్కడ ఉన్నాడని, లొంగిపోవడానికి నిరాకరించి, ఒక మసీదులోకి వెళ్లాడని, అర్ధరాత్రి సుమారు 2:45 గంటలకు కాల్పులు ప్రారంభించాడని అనాయత్ అలీ వెల్లడించారు. లతీఫ్ 2025 నవంబర్ 18న లష్కర్-ఏ-తోయిబాలో చేరాడని తెలిపారు.

    కుల్గాం
    ఫొటో క్యాప్షన్, జమ్మూకశ్మీర్‌లో ఒక ఉగ్రవాది మృతి
  12. యూపీలో ముసాయిదా ఓటర్ల జాబితా విడుదల తర్వాత అఖిలేష్ యాదవ్ ఏమన్నారు?

    అఖిలేష్ యాదవ్
    ఫొటో క్యాప్షన్, బీజేపీ ఓట్ల అవకతవకలకు పాల్పడిందని అఖిలేష్ యాదవ్ ఆరోపించారు

    ఉత్తరప్రదేశ్‌లో స్పెషల్ సమ్మరీ రివిజన్ (ఎస్ఎస్ఆర్) 2027 కింద ఉత్తరప్రదేశ్ చీఫ్ ఎలక్టోరల్ ఆఫీసర్ నవదీప్ రిన్వా ముసాయిదా ఓటర్ల జాబితాను విడుదల చేశారు.

    2026 ఏప్రిల్ 10 నుంచి 2026 నవంబర్ 17 మధ్య కాలంలో రాష్ట్రంలో మొత్తం 18 లక్షల 84 వేల 113 మంది ఓటర్లు పెరిగారని ఉత్తరప్రదేశ్ నవ్‌దీప్ రిన్వా చెప్పారు.

    కొత్త పేర్లను చేర్చడం, పాత పేర్లను తొలగించడం చేపట్టిన తర్వాత.. రెండింటిన్నీ పరిగణనలోకి తీసుకున్నాక ఈ పెరుగుదల కనిపించిందని ఆయన స్పష్టం చేశారు.

    ఓటర్ల జాబితాలో పేర్లను కేవలం సవరణ ప్రక్రియ సమయంలోనే చేర్చవచ్చని లేదా తొలగించవచ్చని భావించడం తప్పని ఆయన అన్నారు.

    ఓటర్ల జాబితాను ఏడాదంతా నవీకరించవచ్చని రిన్వా అన్నారు. తుది జాబితా విడుదల చేసిన తర్వాత రోజు నుంచి ప్రజలు ఫామ్ 6, 7, 8‌లను సమర్పించవచ్చన్నారు.

    ప్రస్తుత స్పెషల్ సమ్మరీ రివిజన్‌లో అర్హులైన కొత్త యువ ఓటర్లను చేరుస్తున్నట్లు ఆయన చెప్పారు.

    ఉత్తరప్రదేశ్ ప్రధాన ఎన్నికల అధికారి నిర్వహించిన విలేకరుల సమావేశం తర్వాత, సమాజ్‌వాదీ పార్టీ అధ్యక్షుడు అఖిలేష్ యాదవ్ ట్వీట్ చేస్తూ.. 'ఫామ్ 6'లో ఏవైనా అక్రమాలు జరిగితే, ప్రజలు బీజేపీకి, అవినీతిపరులైన అధికారులకు ‘ఛఠీ కా దూద్’’ (తగిన గుణపాఠం) గుర్తు చేస్తారని పేర్కొన్నారు.

    ‘‘అవినీతిపరులైన అధికారులకు తదుపరి గమ్యస్థానం జైలే అవుతుంది. ఉత్తరప్రదేశ్‌లో తమ ఓటమి ఖాయమని గ్రహించిన బీజేపీ, దాని కుట్రపూరిత మిత్రపక్షాలు ప్రత్యేక నిఘా కార్యక్రమం పేరుతో ఏఎస్‌డీడీ (అంటే గైర్హాజరైనవారు, బదిలీ అయినవారు, మరణించినవారు లేదా నకిలీ/ఒకటి కంటే ఎక్కువసార్లు నమోదైన ఓటర్లు) పేరుతో నకిలీ ఓట్లను చేర్చేందుకు కుట్రలు పన్నుతున్నాయి. అధికారులపై ఒత్తిడి తెచ్చి పేర్లను చేర్చే అక్రమ చర్యకు వ్యతిరేకంగా ప్రతి సాక్ష్యాధారాన్ని సేకరిస్తాం, అలాగే ఎఫ్‌ఐఆర్ కూడా నమోదు చేస్తాం.

    విచారణ పూర్తయ్యాక, చట్టం వారి అక్రమ సంపాదనను జప్తు చేస్తుంది. ఇది స్పష్టమైన హెచ్చరిక: ఏ అవినీతిపరుడినీ వదిలిపెట్టబోం, ఎట్టి పరిస్థితుల్లోనూ ఎవరూ తప్పించుకోలేరు’’ అని ట్వీట్ చేశారు.

  13. అత్యవసరమైతే తప్ప బయటకు రావద్దు: తీరప్రాంత ప్రజలకు అధికారుల సూచన

    తుపాను
    ఫొటో క్యాప్షన్, అక్వాన్ పశ్చిమ మధ్య బంగాళాఖాతంలో నెమ్మదిగా కదులుతోంది.

    పశ్చిమ మధ్య బంగాళాఖాతంలో తీవ్ర తుపానుగా బలపడిన అక్వాన్ నెమ్మదిగా కదులుతోందని ఆంధ్రప్రదేశ్ ఆర్టీజీఎస్, ఏపీ విపత్తుల నిర్వహణ సంస్థ తెలిపింది.

    గడిచిన 6 గంటల్లో గంటకు 3 కిలోమీటర్ల వేగంతో తుపాను కదులుతోందని వెల్లడించింది. ప్రస్తుతానికి ఇది చెన్నైకి 580 కిలోమీటర్లు, మచిలీపట్నానికి 610 కిలోమీటర్లు, విశాఖపట్నానికి 610 కిలోమీటర్లు, ఒడిశాలోని గోపాల్‌పూర్‌కు 730 కిలోమీటర్ల దూరంలో కేంద్రీకృతమై ఉన్నట్టు పేర్కొంది.

    ఎల్లుండి మధ్యాహ్నానికి నెల్లూరు- విశాఖ మధ్య తీవ్ర తుపాన్‌గా తీరం దాటే అవకాశం ఉందని కూడా ప్రకటించింది. తీరం దాటే సమయంలో గంటకు 100-110 కిలోమీటర్లు, గరిష్ఠంగా 120 వేగంతో ఈదురుగాలులు వీస్తాయని వాతావరణ శాఖాధికారులు అంచనా వేస్తున్నారు.

    తుపాన్ గమనంపై ఎప్పటికప్పుడూ జిల్లా యంత్రాంగానికి ఆర్టీజిఎస్ - విపత్తుల నిర్వహణ సంస్థ తగిన సూచనలు చేస్తోందని తెలిపారు. అత్యవసర సహాయక చర్యల కోసం 13 ఎన్డీఆర్ఎఫ్, 11 ఎస్డీఆర్ఎఫ్, స్థానిక అగ్నిమాపక బృందాలు సిద్ధంగా ఉంచినట్టు ఏపీ రాష్ట్ర విపత్తుల నిర్వహణ సంస్థ ఎండీ, ఆర్టీజీఎస్ సీఈవో ప్రఖర్ జైన్ చెప్పారు.

    తుపాను ప్రభావంతో కోస్తా జిల్లాల్లో రేపు, ఎల్లుండి కొన్నిచోట్ల అత్యంత భారీ వర్షాలు కురుస్తాయని, ఇతర ప్రాంతాల్లో అక్కడక్కడ భారీ నుంచి అతిభారీ వర్షాలు కురిసే అవకాశం ఉందన్నారు. తీర ప్రాంత ప్రజలు అత్యవసరమైతే తప్ప బయటకు రావొద్దని విజ్ఞప్తి చేశారు. రైతులు వ్యవసాయ పనుల్లో ముందస్తు జాగ్రత్తలు తీసుకోవాలని ప్రఖర్ జైన్ సూచించారు.

  14. తొలిసారి సమావేశం కానున్న ట్రంప్, జిన్‌పింగ్, పుతిన్

    చైనా, అమెరికా, రష్యా
    ఫొటో క్యాప్షన్, జిన్‌పింగ్, ట్రంప్, పుతిన్

    అమెరికా అధ్యక్షుడు డోనల్డ్ ట్రంప్, చైనా అధ్యక్షుడు షీ జిన్‌పింగ్, రష్యా అధ్యక్షుడు వ్లాదిమిర్ పుతిన్ మధ్య చారిత్రక సమావేశం రేపు(గురువారం, నవంబర్ 19)జరగనుంది. ఆసియా-పసిఫిక్ ఎకనామిక్ కోఆపరేషన్ సదస్సు సందర్భంగా ఈ సమావేశం జరగనుంది.

    సమావేశంపై వైట్ హౌస్, క్రెమ్లిన్ ప్రకటనల తర్వాత చైనా విదేశాంగ మంత్రిత్వ శాఖ ధ్రువీకరించింది.

    ప్రపంచంలోని శక్తిమంతమైన దేశాలకు చెందిన ఈ ముగ్గురు నాయకులు ఒకే వేదికపై కలుసుకోవడం ఇదే తొలిసారి. రష్యా-యుక్రెయిన్ యుద్ధానికి ముగింపు పలికే అంశంపై చర్చలు జరిపే ప్రయత్నంలో భాగంగా ఈ సమావేశాన్ని పుతిన్ ప్రతిపాదించారని ది వాల్ స్ట్రీట్ జర్నల్ పేర్కొంది.

    అణ్వాయుధ నిరాయుధీకరణపై త్రైపాక్షిక చర్చలను తాను స్వాగతిస్తానని అక్టోబర్‌లో ట్రంప్ చెప్పారు. ఈ ముగ్గురు నేతలు అనేక అంశాలపై చర్చిస్తారని ఈ నెల ప్రారంభంలో కూడా ఆయన అన్నారు.

    ఇరాన్‌లో జరుగుతున్న యుద్ధాన్ని ముగించేందుకు ప్రయత్నిస్తున్నామని అప్పట్లో ట్రంప్ వ్యాఖ్యానించారు. అయితే ఈ సమావేశం అజెండాపై చైనా విదేశాంగ మంత్రిత్వ శాఖ ఎలాంటి అదనపు వివరాలు వెల్లడించలేదు.

  15. రష్యాలో కూలిపోయిన సైనిక కార్గో విమానం, 19 మంది మృతి

    కార్గో విమానం
    ఫొటో క్యాప్షన్, రష్యాలో సైనిక కార్గో విమాన ప్రమాదంలో 19 మంది చనిపోయారు.

    రష్యాలోని సైబీరియాలో సైనిక కార్గో విమానం కూలిపోవడంతో అందులో ప్రయాణిస్తున్న 19 మంది మరణించారని రక్షణ మంత్రిత్వ శాఖ పేరుతో రష్యా ప్రభుత్వ మీడియా రిపోర్ట్ చేసింది.

    మంగళవారం కెమెరోవో ప్రాంతంలోని నిర్మానుష్య ప్రదేశంలో ఏఎన్-12 విమానం కూలిపోయిందని తెలిపింది. ప్రమాదంపై రష్యా విమానయాన అధికారులు దర్యాప్తు ప్రారంభించారు. సాంకేతిక లోపమే ప్రమాదానికి కారణమై ఉండవచ్చని ప్రాథమికంగా భావిస్తున్నారు.

    యాగునోవో గ్రామం సమీపంలో విమానం కూలిపోయిందని స్థానిక గవర్నర్ ఇల్యా సెరెడ్యూక్ తెలిపారు. అత్యవసర బృందాలు ఘటనా స్థలంలో మంటలను త్వరగా ఆర్పివేశాయి.

    ఒక హెలికాప్టర్, వైద్య సదుపాయాలు సిద్ధంగా ఉన్నాయని ఘటనా స్థలాన్ని సందర్శించిన సెరెడ్యుక్ చెప్పారు. ఇప్పుడు దర్యాప్తు అధికారులకు సహకరించడమే ప్రధాన కర్తవ్యం అని ఆయన అన్నారు. ఆయన షేర్ చేసిన ఓ వీడియోలో సహాయకచర్యలు కొనసాగుతున్నట్టు కనిపిస్తోంది.

    సోషల్ మీడియాలో షేర్ అయిన సీసీటీవీ ఫుటేజ్‌లో దూరంగా ఆకాశం నుంచి ఒక వస్తువు కింద పడడం కనిపించింది. ఆ ఫుటేజ్ తేదీ, సమయాన్ని బీబీసీ, రాయిటర్స్ వార్తా సంస్థ ధృవీకరించాయి. చుట్టుపక్కల చిత్రాలను ఉపగ్రహ చిత్రాలతో పోల్చి ఆ ప్రదేశాన్ని కూడా రాయిటర్స్ నిర్ధరించింది. విమానంలో ఉన్న సరుకు ఏంటనేదానిపై స్పష్టత లేదు.

    ఆయుధాలు, సిబ్బంది రవాణాకు, గాలింపు, సహాయక చర్యల కోసం రష్యా సైన్యం ఏఎన్-12విమానాలను ఉపయోగిస్తుంది.

  16. బంగాళాఖాతంలో తీవ్ర తుపానుగా అక్వాన్

    తుపాను, వర్షాలు, గాలులు
    ఫొటో క్యాప్షన్, వాతావరణ శాఖ

    దక్షిణ, పశ్చిమ మధ్య బంగాళాఖాతంలో ఏర్పడిన అక్వాన్ తుపాను గంటకు 3 కిలోమీటర్ల వేగంతో కదులుతోందని వాతావరణశాఖ తెలిపింది.

    ప్రస్తుతానికి ఈ తుపాను చెన్నైకి 590 కిలోమీటర్లు, మచిలీపట్నానికి 620 కిలోమీటర్లు, విశాఖపట్నానికి 620 కిలోమీటర్లు, ఒడిశాలోని గోపాల్‌పూర్‌కు 750 కిలోమీటర్ల దూరంలో ఉందని వాతావరణ శాఖ వివరించింది.

    తుపాను నెమ్మదిగా ఉత్తర వాయువ్యదిశగా కదులుతూ మరింత బలపడే అవకాశముందని ఈ తెల్లవారుజామున పశ్చిమ మధ్య బంగాళాఖాతంలో తీవ్ర తుపానుగా మారిందని తెలిపింది. ఉత్తర వాయువ్యదిశగానే కదులుతూ రేపు సాయంత్రం(నవంబర్ 19)5.30 గంటల సమయానికి అతి తీవ్ర తుపానుగా బలపడే అవకాశముందని తెలిపింది.

    నవంబర్ 20న మధ్యాహ్నం సమయంలో నెల్లూరు, విశాఖపట్టణం మధ్య తీరాన్ని దాటే అవకాశముందని ఆ సమయంలో గంటకు 120 నుంచి 130కిలోమీటర్ల వేగంతో గాలులు వీచే అవకాశముందని, గాలుల తీవ్రత 145కిలోమీటర్ల వరకు పెరగొచ్చని అంచనావేసింది.

    తుపాను ప్రబావంతో రేపు, ఎల్లుండి(నవంబర్ 19,20) కోస్తాంధ్ర, యానాంలో అక్కడక్కడా భారీ నుంచి అతి భారీ వర్షాలు కురిసే అవకాశముందని తెలిపింది.

    నవంబర్ 20,21 తేదీల్లో తెలంగాణలో అక్కడక్కడా భారీ నుంచి అతి భారీ వర్షాలు కురిసే అవకాశముందని వెల్లడించింది.

  17. గుడ్ మార్నింగ్

    బీబీసీ తెలుగు లైవ్ పేజ్‌కు స్వాగతం

    నేను బీబీసీ ప్రతినిధి కమలాదేవి నల్లపనేని.

    ఇప్పటి నుంచి మధ్యాహ్నం 3.00గంటలవరకు ముఖ్యమైన వార్తలను అందిస్తాను.

    నిన్నటి లైవ్ పేజ్ కోసం ఇక్కడ క్లిక్ చేయండి.