ஞானேஷ் குமார் பதவி விலக கோரி 3 நாட்களாக போராட்டம் - டெல்லி, மும்பையில் என்ன நடந்தது?

தலைமைத் தேர்தல் ஆணையர் ஞானேஷ் குமார் பதவி விலகக் கோரி நடைபெற்ற போராட்டங்கள் தொடர்ந்து மூன்று நாட்களாக நீடித்தன. காந்தி ஜெயந்தியான அக்டோபர் 2-ஆம் தேதி தொடங்கிய இந்தப் போராட்டங்கள் சனி மற்றும் ஞாயிற்றுக்கிழமைகளிலும் தொடர்ந்தன.

ஆனால், இந்த முறை டெல்லியில் காவல்துறையினர் கூடுதல் கண்காணிப்புடன் செயல்பட்டதாகத் தெரிந்தது. போராட்டக்காரர்கள் யாரும் ஜந்தர் மந்தரை அடைய அனுமதிக்கப்படவில்லை.

ஞாயிற்றுக்கிழமை டெல்லியைச் சேர்ந்த பொதுமக்கள், சமூக ஆர்வலர்கள் மற்றும் மாணவர் அமைப்புகள் இணைந்து இந்தியா கேட் முதல் ஜந்தர் மந்தர் வரை "குடிமக்கள் பேரணி"யை நடத்தினர். இதில் ஏராளமானோர் பங்கேற்றனர்.

பேரணியின்போது அகில இந்திய மாணவர் சங்க தலைவர் நேஹா போரா உள்ளிட்ட பல தலைவர்கள் காவல்துறையினரால் தடுப்புக் காவலில் வைக்கப்பட்டனர். தங்களை அழைத்துச் சென்ற காவல்துறை வாகனத்தில் ஒரு பெண் காவலர் கூட இல்லை என்று நேஹா போரா குற்றம்சாட்டினார்.

'குடிமக்கள் பேரணி''யின்போது டெல்லி காவல்துறையினர் தங்களிடம் தவறாக நடந்துகொண்டதாக மேலும் பல தலைவர்கள் குற்றம்சாட்டினர்.

இந்தப் போராட்டத்திற்காக ஆம் ஆத்மி கட்சித் தொண்டர்கள் ஏராளமானோர் இந்தியா கேட் பகுதியில் திரண்டனர். போராட்டத்தின்போது ஆம் ஆத்மி கட்சியின் டெல்லி மாநிலத் தலைவர் சவுரப் பரத்வாஜையும் டெல்லி காவல்துறையினர் தடுப்புக் காவலில் வைத்தனர்.

ஞாயிற்றுக்கிழமை மாலை இளைஞர் காங்கிரசும் ஞானேஷ் குமாருக்கு எதிராக பேரணி நடத்தி போராட்டத்தில் ஈடுபட்டது.

இளைஞர் காங்கிரஸ் தனது சமூக ஊடக பதிவில், "ஜந்தர் மந்தர் சாலையை பொதுமக்களுக்குத் திறந்துவிட வேண்டும் என்றும், ஞானேஷ் குமாரை கைது செய்ய வேண்டும் என்றும் கோரி, இந்திய இளைஞர் காங்கிரஸ் தொண்டர்கள் ஜந்தர் மந்தர் சாலையில் அமர்ந்து போராட்டம் நடத்தினர்" என்று தெரிவித்தது.

இதனிடையே, உத்தவ் தாக்கரே தலைமையிலான சிவசேனாவும் (உத்தவ் பாலாசாகேப் தாக்கரே), ராஜ் தாக்கரே தலைமையிலான மகாராஷ்டிர நவநிர்மாண் சேனாவும் ஞாயிற்றுக்கிழமை மும்பையில் "கர்ஜனா மோர்ச்சா" என்ற பெயரில் பேரணி நடத்தின. ஞானேஷ் குமார் பதவி விலக வேண்டும் என்று கோரி நடைபெற்ற இந்தப் பேரணியில் உத்தவ் தாக்கரேவும் ராஜ் தாக்கரேவும் பங்கேற்றனர்.

சனிக்கிழமை என்ன நடந்தது?

சனிக்கிழமை டெல்லியில் ஜந்தர் மந்தரை நோக்கிச் செல்ல முயன்ற பல சமூக ஆர்வலர்களை கேரளா ஹவுஸ் அருகே டெல்லி காவல்துறையினர் தடுப்புக் காவலில் வைத்தனர்.

களத்தில் இருந்த பிபிசி செய்தியாளர் தில்னவாஸ் பாஷா கூறுகையில், போராட்டக்காரர்களால் ஜந்தர் மந்தருக்குள் செல்ல முடியவில்லை. அங்கு குவிக்கப்பட்டிருந்த ஏராளமான காவல்துறையினர், அவர்களை கேரளா ஹவுஸ் அருகே தடுத்து நிறுத்தினர்.

அக்டோபர் 2-ஆம் தேதி நடைபெற்ற போராட்டத்தைத் தொடர்ந்து, சனிக்கிழமையும் ஜந்தர் மந்தரை நோக்கி வருமாறு அகில இந்திய மாணவர் சங்கம் அழைப்பு விடுத்திருந்தது.

அகில இந்திய மாணவர் சங்கத்தை சேர்ந்தவர்கள் தவிர, சமூக ஆர்வலர் யோகேந்திர யாதவ், மூத்த வழக்கறிஞர் கபில் சிபல், பிரசாந்த் பூஷண் உள்ளிட்டோரும் இந்தப் போராட்டத்தில் பங்கேற்றனர். அவர்களும் மற்றவர்களுடன் சேர்த்து தடுப்புக் காவலில் வைக்கப்பட்டனர்.

அகில இந்திய மாணவர் சங்க தலைவர் நேஹா போராவும் தடுப்புக் காவலில் வைக்கப்பட்டார். அப்போது ஒரு பெண் காவலர் தனது முழங்கையால் தன்னைத் தாக்கியதாகவும், நகங்களால் காயப்படுத்தியதாகவும் அவர் குற்றம்சாட்டினார்.

சனிக்கிழமை நடைபெற்ற போராட்டத்தின்போது, இரண்டு பெண் செய்தியாளர்களும் போராட்டத்தில் பங்கேற்ற இளம் பெண் ஒருவரும் ஒரு காவல்துறை அதிகாரி மற்றும் காவல்துறையினர் மீது பாலியல் துன்புறுத்தல் குற்றச்சாட்டுகளை முன்வைத்தனர்.

இதையடுத்து, சனி மற்றும் ஞாயிற்றுக்கிழமைகளில் செய்தியாளர்கள் பார்லிமென்ட் ஸ்ட்ரீட் காவல் நிலையம் முன்பு போராட்டத்தில் ஈடுபட்டனர்.

வெள்ளிக்கிழமை மும்பையில் போராட்டம்

ஆங்கில நாளிதழான 'தி இந்தியன் எக்ஸ்பிரஸ்' வெளியிட்ட புலனாய்வு செய்தியைத் தொடர்ந்து, அக்டோபர் 2-ஆம் தேதி வெள்ளிக்கிழமை மும்பையில் போராட்டம் நடத்த காக்ரோச் ஜனதா கட்சி அழைப்பு விடுத்திருந்தது.

மும்பையில், காக்ரோச் ஜனதா கட்சி விடுத்த அழைப்பைத் தொடர்ந்து சிவாஜி பூங்காவில் ஏராளமானோர் திரண்டனர். போராட்டத்துக்கு காவல்துறையினர் அனுமதி மறுத்திருந்தபோதிலும், போராட்டக்காரர்கள் அங்கு வந்து ஞானேஷ் குமார் பதவி விலக வேண்டும் என்று கோரிக்கை விடுத்தனர்.

"அரசு திறனற்றதாக இருப்பதால், கடந்த இரண்டு மாதங்களில் நாங்கள் இரண்டாவது முறையாகப் போராட்டம் நடத்த வேண்டிய நிலை ஏற்பட்டுள்ளது," என்று மும்பையில் காக்ரோச் ஜனதா கட்சி நிறுவனர் அபிஜீத் தீப்கே கூறினார்.

அவர் மேலும் கூறுகையில், "காந்தி இந்த நாட்டின் ஆன்மா என்றால், அம்பேத்கர் இந்த நாட்டின் முதுகெலும்பு. டாக்டர் பாபாசாகேப் அம்பேத்கரும் நேருவும் நமக்கு வாக்களிக்கும் உரிமையை வழங்கினர்," என்றார்.

பாலிவுட் நடிகர்கள் நசீருதீன் ஷா, ஷபானா ஆஸ்மி மற்றும் பாடகரும் இசையமைப்பாளருமான விஷால் தத்லானியும் போராட்டத்தில் பங்கேற்பதற்காக வந்தனர்.

இதனிடையே, சிறப்பு தீவிர வாக்காளர் பட்டியல் திருத்தப் பணியின்போது விடுபட்டுள்ள வாக்காளர்களின் பெயர்களைச் சேர்ப்பதற்காக சிறப்பு நடவடிக்கை மேற்கொள்ளப்படும் என்று தேர்தல் ஆணையம் வெள்ளிக்கிழமை காலை எக்ஸ் தளத்தில் பதிவிட்டது.

வாக்காளர் பட்டியல்களைச் சரிபார்த்தல், விடுபட்ட வாக்காளர்களைக் கண்டறிதல் மற்றும் படிவம் 6-ஐ பூர்த்தி செய்வதற்கான நடவடிக்கைகளை மேற்கொள்ள தேர்தல் ஆணையம் அறிவுறுத்தியுள்ளது. இந்தச் சிறப்பு நடவடிக்கையின்போது, இளம் வாக்காளர்களுக்கு முக்கியத்துவம் அளித்து வாக்குச்சாவடி நிலை அலுவலர்கள் வீடு வீடாகச் சென்று பணிகளை மேற்கொள்வார்கள். மேலும், வாக்குச்சாவடி அளவில் சிறப்பு முகாம்களும் நடத்தப்படும் என்று தேர்தல் ஆணையம் தெரிவித்துள்ளது.

ஆங்கில நாளிதழான தி இந்தியன் எக்ஸ்பிரஸ் வெளியிட்ட புலனாய்வு செய்தியில், தேர்தல் ஆணையத்தின் செயல்பாடுகள் தொடர்பாக இரண்டு தேர்தல் ஆணையர்கள் 10 மாதங்களில் 14 முறை ஆட்சேபனை தெரிவித்ததாகக் கூறப்பட்டுள்ளது.

கடந்த ஆண்டு நடைபெற்ற சிறப்பு தீவிர வாக்காளர் பட்டியல் திருத்தப் பணியின்போது, எடுக்கப்பட்ட பல முடிவுகள் குறித்து தேர்தல் ஆணையர்களுக்கு தகவல் தெரிவிக்கப்படவில்லை என்றும், அந்த முடிவுகளுக்கு இரு தேர்தல் ஆணையர்களும் மீண்டும் மீண்டும் எதிர்ப்பு தெரிவித்ததாகவும் அந்தச் செய்தியில் குறிப்பிடப்பட்டுள்ளது.

அந்த செய்தியின்படி, "தேர்தல் ஆணையர்கள் சுக்பீர் சிங் சந்து மற்றும் விவேக் ஜோஷி ஆகியோர் பல்வேறு ஆட்சேபனைகளைப் பதிவு செய்துள்ளனர். தங்களைத் தகவலறியாமல் வைத்திருப்பது முதல், புதிய வாக்காளர்களைச் சேர்ப்பது, பெயர்களை நீக்குவது, அங்கீகாரம் பெறாத மற்றும் சட்டவிரோதமான நடவடிக்கைகள் குறித்து கேள்வி எழுப்புவது வரை அவர்களின் ஆட்சேபனைகள் இருந்தன" என்று கூறப்பட்டுள்ளது.

இந்தச் செய்தி வெளியானதைத் தொடர்ந்து, எதிர்க்கட்சிகளும் காக்ரோச் ஜனதா கட்சியும் தலைமைத் தேர்தல் ஆணையர் ஞானேஷ் குமார் பதவி விலக வேண்டும் என்று வலியுறுத்தி வருகின்றன.

- இது, பிபிசிக்காக கலெக்டிவ் நியூஸ்ரூம் வெளியீடு