Moja kwa moja, Walioambukizwa Ebola Kenya wafikia wanane

Moja kwa moja

Na Beldeen Waliaula

1. Dakika 15 zilizopitaMarekani yaonya kuhusu uwezekano wa vita kati ya Ethiopia na Eritrea

   Waziri wa Mambo ya Nje wa Marekani, Marco Rubio, amewataka viongozi wa Ethiopia na Eritrea kujizuia na kuepuka hatua zinazoweza kuongeza mvutano wa kijeshi mpakani mwa nchi hizo, akionya kuwa hali hiyo inaweza kusababisha vita.

   Rubio amesema ana wasiwasi mkubwa kuhusu taarifa za kuongezeka kwa harakati za wanajeshi katika mpaka wa Ethiopia na Eritrea. Ameonya kuwa kuendelea kupeleka na kukusanya wanajeshi mpakani kunaongeza hatari ya kuzuka kwa vita.

   Wakati wa vita vya mwaka 2020 hadi 2022 kati ya jeshi la serikali ya Ethiopia na vikosi vya Tigray, jeshi la Eritrea liliunga mkono jeshi la serikali ya shirikisho na kushiriki katika mapigano dhidi ya vikosi vya Tigray.

   Hata hivyo, baada ya vita hivyo kumalizika kupitia Mkataba wa Pretoria, tofauti zilianza kujitokeza kati ya serikali za Ethiopia na Eritrea.

   Maafisa kadhaa waandamizi wa Ethiopia, akiwemo Waziri Mkuu Abiy Ahmed, wamekuwa wakisema wazi kuwa nchi hiyo inahitaji bandari. Abiy amesisitiza kuwa Ethiopia, yenye wakazi takribani milioni 130 na uchumi unaokua, haiwezi kuendelea kukosa njia ya moja kwa moja ya kufikia bahari.

   Kwa upande wa Ethiopia, Eritrea inatuhumiwa kushirikiana na chama cha TPLF na makundi mengine yenye silaha nchini humo kwa lengo la kuigawa Ethiopia.

   Nchi hizo mbili zimekuwa katika mvutano wa kidiplomasia huku hali ya kijeshi mpakani ikiendelea kuibua wasiwasi.

   Baada ya vikosi vya Tigray vilivyokuwa vimeelekea kusini mwa eneo hilo kurejea upande wa mpaka wa Eritrea, kumekuwa na ongezeko la wanajeshi wa Eritrea na wa serikali ya shirikisho la Ethiopia katika maeneo ya mpakani.

   Akizungumza na waandishi wa habari, Rubio alisema:

   “Unaona wanajeshi wakielekea mpakani kutoka pande zote mbili. Katika hali kama hii, unapowaona wanajeshi wa pande zote mbili wakikusanyika mpakani, huwa na wasiwasi kwamba hali hiyo inaweza kugeuka na kuwa mzozo mkubwa zaidi.”

   Aliongeza kuwa dunia haihitaji vita nyingine kwa sasa.

   Soma pia:

   Serikali ya Ethiopia yaweka Tigray chini ya utawala wa mpito wa miezi sita

2. Dakika 23 zilizopitaMashabiki wa muziki wa Reggae wamkumbuka Lucky Dube

   Mashabiki wa mwanamuziki Lucky Dube wameingia mtandaoni na kucheza baadhi ya nyimbo zake huku wakieleza kuwa atazidi kuishi mioyoni mwao.

   Haya yanajiri wakati zikitimia miaka 19 tangu kuuawa kwa Lucky Philip Dube, mwanamuziki mashuhuri wa reggae kutoka Afrika Kusini, aliyepigwa risasi na kufariki dunia Oktoba 18, 2007.

   Dube aliuawa Oktoba 18, 2007, mjini Johannesburg, akiwa na umri wa miaka 43.

   Wakati huo, alikuwa miongoni mwa wanamuziki wa reggae waliofanikiwa zaidi nchini Afrika Kusini, akiwa ameuza idadi kubwa ya albamu. Alipata umaarufu mkubwa nchini humo na kimataifa kupitia nyimbo zilizoangazia ukandamizaji na dhuluma walizokumbana nazo Waafrika Kusini wakati wa utawala wa ubaguzi wa rangi, uliokuwa ukijulikana kama apartheid.

   Albamu yake ya kwanza iliitwa Rasta Never Die. Hata hivyo, kutokana na sera za utawala wa wazungu wakati huo, albamu hiyo ilipigwa marufuku katika vituo mbalimbali vya redio nchini Afrika Kusini.

   Kwa wengi, urithi wa Lucky Dube unaenda mbali zaidi ya muziki na uimbaji. Anakumbukwa kama mmoja wa wanamuziki wakubwa wa reggae barani Afrika, aliyetumia nyimbo zake kuwasilisha ujumbe kuhusu uhuru, usawa mbele ya sheria, ubaguzi wa rangi, ukosefu wa haki na utu wa binadamu.

3. Dakika 31 zilizopitaMacky Sall ajiondoa katika kinyang’anyiro cha ukatibu mkuu wa Umoja wa Mataifa

   Aliyekuwa rais wa Senegal, Macky Sall, amejiondoa katika kinyang’anyiro cha kuwania nafasi ya Katibu Mkuu wa Umoja wa Mataifa.

   Katika taarifa iliyotolewa Jumamosi mjini Marrakesh, Morocco, Sall alisema amefikia uamuzi huo kufuatia kura ya maoni isiyo rasmi iliyofanyika katika Baraza la Usalama la Umoja wa Mataifa tarehe 16 Oktoba, pamoja na mazungumzo aliyofanya na marais wawili waliounga mkono azma yake: Évariste Ndayishimiye wa Burundi na Bassirou Diomaye Faye wa Senegal.

   Rais wa Burundi, Évariste Ndayishimiye, ambaye kwa sasa anaongoza Umoja wa Afrika (AU), ndiye aliyependekeza jina la Sall kwa nafasi hiyo.

   Sall alisema ameamua kujiondoa kwa kuzingatia misingi ya haki na usawa, ili kusaidia kuhakikisha kuwa mgombea atakayechaguliwa anapata uungwaji mkono mpana kutoka kwa pande mbalimbali.

   Alisema kura ya majaribio iliyofanyika kwa siri katika Baraza la Usalama la Umoja wa Mataifa ilionyesha kuwa nchi nyingi zinaunga mkono nafasi hiyo kupewa mgombea kutoka Amerika ya Kusini na Karibiani.

   “Matokeo ya kura mbalimbali za majaribio yanaonyesha kuwa kuna uungwaji mkono kwa mgombea kutoka eneo la Amerika ya Kusini na Karibiani, ambaye pia anaweza kuwa mwanamke,” alisema Sall.

   Alisisitiza kuwa ataendelea kuunga mkono juhudi za kuimarisha amani, usalama, maendeleo na mazungumzo baina ya nchi.

   Pia alitoa wito wa kufanyika kwa mageuzi makubwa ndani ya Umoja wa Mataifa ili kuipa Afrika nafasi kubwa zaidi katika kufanya maamuzi yanayohusu masuala ya kimataifa.

   “Afrika, ambayo inakabiliwa na changamoto za amani, usalama na maendeleo, lazima iendelee kutoa sauti yake na kufanya kila linalowezekana ili kupata nafasi inayostahili katika maamuzi ya kimataifa,” alisema.

4. Dakika 45 zilizopitaUN kupunguza msaada wa chakula kwa wakazi wa Gaza

   Shirika la Umoja wa Mataifa la Mpango wa Chakula Duniani (WFP) linasema litalazimika kupunguza msaada wa chakula kwa wakazi wa Gaza kutokana na ukosefu wa fedha.

   Hatua hiyo inatarajiwa kupunguza idadi ya watu wanaonufaika na mpango huo katika maeneo ya Palestina kwa takriban watu 500,000.

   Kupunguzwa kwa msaada huo kunakuja wakati majira ya baridi yakikaribia, huku familia nyingi zinazoishi katika mahema ya muda zikiendelea kukabiliwa na uhaba wa chakula licha ya makubaliano ya kusitisha mapigano kufikiwa.

   Soma Pia;

   Kwa nini awamu ya pili ya usitishaji mapigano Gaza imekwama?

5. Dakika 58 zilizopitaMzozo wa Iran: IRGC yatoa vitisho dhidi ya Trump na Netanyahu

   Vikosi vya Ulinzi wa Mapinduzi ya Kiislam nchini Iran (IRGC) vimeonya kuwa vitatekeleza hatua kali za kulipiza kisasi iwapo miundombinu ya nishati ya nchi hiyo itashambuliwa, kufuatia kauli za Rais wa Marekani Donald Trump na Waziri Mkuu wa Israel Benjamin Netanyahu kuhusu ushirikiano wao dhidi ya Tehran.

   Msemaji wa Walinzi hao, Hossein Mohebi, alitoa onyo hilo Jumapili, akisema shambulio lolote dhidi ya miundombinu ya nishati ya Iran lingekuwa na madhara makubwa kwa Israel.

   “Shambulio lolote dhidi ya miundombinu ya nishati ya Iran, hata kama wanasayansi wetu vijana watairekebisha haraka, litageuza milele ardhi inayokaliwa kwa mabavu kuwa jangwa lililoteketezwa na kuwalazimisha wakazi wake kukimbilia jangwa la Sinai. Dunia itaona kitakachotokea,” alisema.

   Kauli hiyo ilitolewa takriban saa moja baada ya Netanyahu kuchapisha ujumbe kwenye mitandao ya kijamii, akisema Israel na Marekani zitakamilisha kazi yao kwa pamoja katika miaka ijayo.

   Awali, Trump alikuwa ameeleza tena uungaji mkono wake kwa Netanyahu kupitia mtandao wake wa Truth Social, akisema Iran imekuwa ikitoa kauli mbiu za “Kifo kwa Israel, Kifo kwa Marekani” kwa miaka 51.

   “Tutawaangamiza mashetani wakubwa na wadogo,” Trump aliandika.

   Rais huyo wa Marekani aliongeza kuwa ni suala la muda tu kabla Iran haijageuza matamshi yake makali kuwa vitendo.

   Pia alidai kuwa uwezo wa Iran kijeshi na kiuchumi umeharibiwa kwa kiasi kikubwa, na kuonya kuwa Marekani itachukua hatua za kumaliza suala hilo hivi karibuni ikiwa Tehran haitabadilisha mwenendo wake.

   Pia unaweza Kusoma:

   Jinsi ujasusi wa Marekani na Uingereza ulivyopindua serikali ya Iran mwaka wa 1953

   Nchi zipi zinaweza kufaidika kwa vita dhidi ya Iran - na ni zipi zitakazopata hasara kubwa zaidi?

   Urusi inanufaika vipi na vita vya Iran?

6. Saa 1 iliyopitaSaudi Arabia yawanyonga Wabangladesh wawili kwa tuhuma za vitendo visivyo vya maadili msikitini Makka

   Wizara ya Mambo ya Ndani ya Saudi Arabia imesema imetekeleza hukumu ya kifo dhidi ya raia wawili wa Bangladesh, mwanamume na mwanamke, waliokamatwa kwa tuhuma za kufanya vitendo visivyo vya maadili ndani ya mmoja wa misikiti katika mji mtakatifu wa Makka.

   Shirika la habari la serikali ya Saudi Arabia, SPA, limeripoti kuwa mwanamume huyo, Nazarul Islam Abdul Basir, na mwanamke, Siti Akter, walituhumiwa kutenda kile kilichoelezwa na mamlaka kuwa ni kitendo kisicho cha maadili ndani ya msikiti.

   Kwa mujibu wa mamlaka za Saudi Arabia, vikosi vya usalama viliwakamata wawili hao na kuwafikisha katika mahakama husika kwa ajili ya kusikilizwa kwa kesi yao.

   Wizara hiyo imesema mahakama iliwatia hatiani wawili hao, ikizingatia uzito wa kosa, kukiukwa kwa utakatifu wa msikiti na mazingira ambayo tukio hilo lilidaiwa kutokea. Mahakama iliwaadhibu kwa hukumu ya kifo.

   Mamlaka zimesema hukumu hiyo ilithibitishwa na mahakama ya juu baada ya kukata rufaa. Baadaye, amri ya kifalme ilitolewa kuidhinisha utekelezaji wa hukumu hiyo, ambao ulifanyika Jumatano, Oktoba 14.

   Hata hivyo, mamlaka za Saudi Arabia hazijaeleza kwa kina aina ya vitendo walivyotuhumiwa kufanya, tarehe ya tukio, lini hukumu ya kifo ilitolewa au lini rufaa yao ilikataliwa.

   Vyombo vya habari vya ndani nchini Saudi Arabia pia havijatoa maelezo zaidi kuhusu kesi hiyo, na vimeripoti tu taarifa iliyotolewa na Wizara ya Mambo ya Ndani.

   Upande wa serikali ya Bangladesh umeeleza haukufahamishwa kuhusu hukumu hiyo na kudokeza itafuatilia kiundani.

7. Saa 3 zilizopitaRais Macron apinga kujiuzulu kwa waziri wa usalama wa ndani baada ya ghasia

   Rais wa Ufaransa Emmanuel Macron amekataa ombi la kujiuzulu kwa Waziri wa Usalama wa Ndani, kufuatia ghasia zilizozuka nchini humo.

   Macron amesema waziri Laurent Nunez, anapaswa kuendelea kuhudumu katika wadhfa wake na kutafuta suluhisho za kukabiliana na waandamanaji waliohusika na ghasia haraka iwezekanavyo.

   Macron ameilaumu idara ya usalama kwa kushindwa kukusanya taarifa za kijasusi mapema, hali iliyochangia kuzuka kwa vurugu hizo.

   Ghasia hizo zilitokea baada ya maandamano makubwa kufanyika, kupinga kupanda kwa gharama za maisha na kudorora kwa huduma za umma.

   Mkutano wa dharura wa serikali unatarajiwa kufanyika hii leo kujadili yaliyotokea.

   Macron ameonya kuwa wote waliohusika na ghasia hizo watawajibishwa kwa mujibu wa sheria.

   Soma pia:

   Ufaransa inataka nini kipya Afrika?

   Kwa nini viongozi wa Ulaya wameshindwa kuzungumza kwa sauti moja kuhusu Iran?

8. Saa 3 zilizopitaHuman Rights Watch yaishtumu jeshi la Mali na Urusi kwa mauaji ya raia

   Jeshi la Mali na washirika wake wa Urusi walitumia mashambulizi ya ndege zisizo na rubani Pamoja na mashambulizi mengine yenye mateso kuwashambulia waasi, hatua iliyosababisha vifo vya raia. Hii ni kulingana na ripoti iliyochapishwa na shirika la kutetea haki za kibanadamu la Human Rights Watch (HRW)

   Ripoti hiyo imesema vifo vya raia kutokana na mashambulizi ya ndege zisizo na rubani viliongezeka zaidi ya mara mbili kati ya mwezi Aprili na Agosti, ikilinganishwa na kipindi kama hicho mwaka uliopita.

   Ripoti hiyo ilinukuu takwimu za ACLED, shirika linalofuatilia migogoro, baada ya mashambulizi ya kitaifa yaliyotekelezwa na kundi la JNIM, lenye uhusiano na Al-Qaeda, pamoja na waasi wa Tuaureg.

   Mashambulizi hayo ya waasi yaliyoanza tarehe 25 mwezi Aprili, yalisababisha kifo cha waziri wa ulinzi wa Mali na pia yalilenga miji na maeneo kadhaa, pamoja na uwanja mkuu wa ndege mjini Bamako.

   Viongozi wa kijeshi wa Mali, waliochukua mamlaka kupitia mapinduzi ya kijeshi mwaka 2020 na 2021, wamegeukia Urusi kupata msaada katika mapambano ya kudhibiti waasi.

   Wanajeshi wa Urusi wa kikosi cha Africa Corps, walihusika pia katika kukabiliana na mashambulizi ya mwezi Aprili.

   Takwimu za ACLED yenye makao yake nchini Marekani zinaonyesha kuwa vikosi vya Mali na Africa Corps vilifanya mashambulizi 47 kwa kutumia ndege zisizo na rubani kati ya mwezi Aprili na Agosti, na kusababisha vifo vya raia 94. Hii ni ongezeko kutoka mashambulizi 22 yaliyosababisha vifo vya raia 44 katika kipindi kama hicho mwaka uliopita.

   Soma pia:

   Rais Goïta kujiteua waziri wa ulinzi waiweka Mali njia panda

   Hatima ya utawala wa kijeshi Mali baada ya shambulio la waasi ni ipi?

9. Saa 4 zilizopitaDRC yamshutumu Kabila kwa kuunga mkono kundi la waasi

   Serikali ya Jamhuri ya Kidemokrasia ya Congo (DRC) imemtuhumu rais wa zamani wa taifa hilo, Joseph Kabila,kwa kujaribu kuipindua serikali ya sasa ili kurejea madarakani.

   Waziri wa Habari wa DRC, Patrick Muyaya, ambaye pia ni msemaji wa serikali, amesema uamuzi wa Kabila kutumia nguvu na silaha unaashiria nia yake ya kutaka kuwaangamiza raia wa DRC na kukiuka katiba.

   Katika taarifa yake kuhusu vuguvugu jipya la waasi linalohusishwa na Kabila, Muyaya amesema kuwa “ingawa kundi hilo linajaribu kubadilisha sura yake, nia yake, mipango yake na mbinu zake zinafahamika.”

   Waziri huyo amedai kuwa kundi hilo ni muungano wa waasi wanaoshirikiana na Rwanda, tuhuma ambazo hazijathibitishwa.

   Muyaya amesema serikali ya DRC bado imejitolea kutafuta suluhu ya mzozo wa usalama unaoikumba taifa hilo,kupitia michakato ya kidiplomasia ya Washington na Doha.

   Soma pia:

   Joseph Kabila azindua FRN: Je, malengo yake ni yapi mbele ya mamlaka ya Tshisekedi?

   Joseph Kabila: Kutoka urais hadi kuongoza muungano unaojumuisha M23

10. Saa 5 zilizopitaRais Macron atoa wito wa utulivu Ufaransa, baada ya maandamano kugeuka ghasia

    Rais wa Ufaransa Emmanuel Macron ametoa wito wa utulivu na amani kudumishwa, siku moja tu baada ya nchi hiyo kushuhudia mojawapo ya siku mbaya zaidi za ghasia katika miaka ya hivi karibuni, huku maelfu ya watu wakikamatwa na maduka kuporwa, kufuatia maandamano kuhusu kupanda kwa gharama za maisha na kudorora kwa huduma za umma.

    Mapigano mapya yalizuka mjini Paris na Marseille, ambapo polisi wa kutuliza ghasia waliingilia kati kuzuia majaribio ya kuvamia na kupora sehemu za biashara.

    “Tunapotazama picha hizi, sote tumejiuliza: Ni nini kilikuwa kikipita akilini mwao? Inawezekanaje Wafaransa kuifanyia hivi kwa Ufaransa?” Macron alisema katika hotuba yake kwa taifa.

    Kwanini watu wanaandamana Ufaransa?

    Vurugu hizo zimetokana na mambo matatu: vuguvugu la wanafunzi wanaotaka kuboreshwa kwa mazingira ya shule, vuguvugu linalochipuka linalopinga gharama kubwa za maisha, na wahalifu waliotumia maandamano hayo kama kisingizio cha kupora mali.

    Ghasia zilizoshuhudiwa siku ya Jumamosi zimefichua uwepo wa hasira na kutoridhishwa na utawala wa Macron, ambaye anatarajiwa kuondoka madarakani mwaka 2027 baada ya kuwa madarakani kwa Zaidi ya muongo mmoja.

    Maandamano hayo yamezidisha hali ya wasiwasi kuhusu mgogoro wa kifedha na kijamii nchini Ufaransa, ambayo ni nchi ya pili kwa ukubwa wa uchumi katika Umoja wa Ulaya.

    Soma pia:

    Ufaransa inataka nini kipya Afrika?

    Upweke wa Rais: Je, muda wa Emmanuel Macron umefikia kikomo?

11. Saa 6 zilizopitaTetesi za Soka Ulaya: Beki huyu wa Hispania kutua Getafe?

    Beki mkongwe wa Hispania na Real Madrid, Sergio Ramos (40), huenda akajiunga na klabu ya Getafe ya Madrid baada ya kuwa mchezaji huru. (Sport)

    Bournemouth imeweka dau la zaidi ya pauni milioni 100 kwa kiungo wa England Alex Scott (23), anayewaniwa na Chelsea na Liverpool. (Football Insider)

    Kiungo wa Ujerumani Florian Wirtz (23) hana mpango wa kuondoka Liverpool, licha ya taarifa zinazomhusisha na Chelsea, inayofundishwa na kocha wake wa zamani wa Bayer Leverkusen, Xabi Alonso. (CaughtOffside)

    Tottenham Hotspur inaendelea kumfuatilia kwa karibu mshambuliaji wa Eintracht Frankfurt, Younes Ebnoutalib (23). (TeamTalk)

    Newcastle United imeimarisha ufuatiliaji wake kwa kiungo chipukizi wa Valencia, David Otorbi (19). (Marca)

    Tottenham pia inamwania kiungo wa Japan Yuito Suzuki (24) wa Freiburg, huku kocha Roberto De Zerbi akilenga kuongeza nguvu kikosini. (Fussball News kupitia CaughtOffside)

    Barcelona inamfuatilia beki wa Benfica, Daniel Banjaqui (18), lakini inakabiliwa na ushindani kutoka Newcastle United na Manchester United. (Ekrem Konur)Barcelona na Real Madrid zinachuana kuwania saini ya beki wa Stuttgart, Finn Jeltsch (20), huku Liverpool nayo ikifuatilia maendeleo yake. (Sport)Arsenal na Tottenham zinaendelea kumfuatilia beki chipukizi wa Barcelona, Xavi Espart (19), ingawa kipengele chake kikubwa cha kuachiliwa kinaweza kufanya uhamisho wake kuwa mgumu. (CaughtOffside)

    Soma zaidi:

    Je, Baleba mwenye thamani ya £70m yuko tayari kwa mtihani wake Man Utd?

    Messi anavyojiandaa kwa maisha baada ya soka

    Fainali ya AFCON kuamuliwa mahakamani – ni lini Morocco au Senegal watatawazwa kuwa mabingwa?

12. Saa 6 zilizopitaMisri kutoa msaada wa kijeshi kwa Saudi Arabia kudhibiti Wahouthi

    Misri imesema iko tayari kuipa Saudi Arabia msaada unaohitaji, ili kulinda usalama na kudumisha amani.

    Hatua hiyo huenda ikachochea mvutano zaidi, katika vita vinavyoendelea Mashariki ya Kati, huku waasi wa Kihouthi wanaoungwa mkono na Iran nchini Yemen wakizidisha mashambulizi dhidi ya Saudi Arabia.

    Rais wa Misri, Abdel Fattah al-Sisi, ameliomba bunge la taifa hilo kuitisha kikao cha dharura ili kuidhinisha jeshi la nchi hiyo, ambalo ni miongoni mwa majeshi makubwa zaidi katika ulimwengu wa Kiarabu, kusaidia kulinda mshirika wake wa karibu, iwapo Saudi Arabia itaomba msaada huo.

    Bunge hilo litapiga kura kuhusu ombi hilo siku ya Jumapili, huku majadiliano yakitarajiwa kuendelea.

    Msaada wowote wa kijeshi kutoka Misri kwa Saudi Arabia unaweza kuashiria kuongezeka kwa kiwango cha majeshi yanayopigana vita hivyo vinavyoendelea kati ya waasi wa Kihouthi na Saudi Arabia.

    Katika siku za hivi karibuni, waasi wa Kihouthi wameishambulia uwanja wa ndege wa kimataifa wa Riyadh pamoja na kampuni ya mafuta inayomilikiwa na serikali ya Saudi Arabia, Saudi Aramco, huku mapigano mapya yakizuka kati ya Wahouthi na vikosi vinavyoungwa mkono na Saudi Arabia.

    Soma pia:

    Mashambulizi ya Houthi dhidi ya Saudi Arabia yataathiri ibada ya Umrah?

    Kwa nini ni vigumu sana kuwashinda Wahouthi wa Yemen?

13. Saa 6 zilizopitaNdege ya Austrian Airlines yatua kwa dharura Bulgaria baada ya tishio la bomu

    Ndege ya shirika la Austrian Airlines iliyokuwa ikisafiri kutoka Israel kuelekea Austria, imelazimika kubadili njia na kutua nchini Bulgaria ghafla, baada ya taarifa za tishio la bomu ndani ya ndege hiyo kutolewa.

    Ndege hiyo aina ya Airbus A320, ilikuwa ikisafiri kutoka Tel Aviv nchini Israel, kuelekea Vienna jana usiku, lakini ilitua kwa dharura katika mji wa Sofia, ambako abiria walitolewa ndani ya ndege hiyo, hii ni kulingana na taarifa iliyotolewa na Wizara ya Uchukuzi ya Bulgaria.

    Jeshi la anga la Bulgaria lilituma ndege ya kivita aina ya MiG-29 kuisindikiza ndege hiyo, hadi ilipotua.

    Hakuna majeruhi walioripotiwa, na uchunguzi umeanzishwa kuhusu tukio hilo.

    Tukio hilo linajiri mwezi mmoja tu, baada ya rubani mmoja kujaribu kuteka nyara ndege ya Flydubai, iliyokuwa ikielekea Tel Aviv kwa kumshambulia rubani mkuu. Hata hivyo, wafanyakazi wa ndege hiyo pamoja na abiria walifanikiwa kumdhibiti mshambuliaji huyo, na ndege hiyo ikatua salama nchini Saudi Arabia.

    Vyombo vya habari vya Bulgaria na Israel viliripoti kuwa kulikuwa na tishio la bomu kwa ndege hiyo.

    Shirika la Austrian Airlines limethibitisha kuwa tishio hili liliondolewa, bila kutoa maelezo zaidi. Msemaji wa shirika hilo aliliambia shirika la habari la AFP kuwa kulikuwa na abiria 51 na wahudumu sita ndani ya ndege hiyo.

    Soma pia:

    'Nilivuta usukani': Abiria asimulia Jinsi alivyoinusuru ndege rubani alipochomwa kisu

    Mfahamu rubani Smit Machhar, aliyeinusuru ndege ya Dubai kuelekea Israel

14. Saa 7 zilizopitaMchungaji Paul Mackenzie kusomewa hukumu katika mauaji ya Shakahola

    Mchungaji mwenye utata kutoka nchini Kenya, anayekabiliwa na mashtaka ya mauaji ya watoto 191, katika mojawapo ya matukio mabaya zaidi yanayohusishwa na madhehebu ya kidini katika historia, anatarajiwa kusomewa hukumu yake hii leo.

    Mchungaji Paul Mackenzie anadaiwa kuwaongoza mamia ya wafuasi wake katika msitu mmoja pwani ya Kenya, na kuwashawishi kufunga hadi kufa ili wakutane na Yesu.

    Aidha mchungaji huyo pia aliwashawishi wafuasi wake kukataa matibabu ya kisasa na hata elimu.

    Katika mahubiri yake, mara nyingi alionya kuwa mwisho wa dunia ulikuwa umekaribia na kwamba shetani alikuwa ameingia katika maisha ya kisasa.

    Mwaka wa 2023, polisi waligundua miili iliyokuwa imeoza ya wafuasi wake zaidi ya 400 katika msitu wa Shakahola, pwani ya Kenya, hali iliyochochea uchunguzi kufanywa na kufunguliwa kwa kesi mahakamani.

    Mackenzie amekanusha mashtaka yote dhidi yake, akidai kuwa hakuwalazimisha wafuasi wake kufunga hadi kufa.

    Polisi bado wanafanya vipimo vya vinasaba vya DNA ili kutambua mabaki ya waliofariki kabla ya familia zao kuruhusiwa kuyazika.

    Soma pia:

    Paul Mackenzie: Ni kipi kinachojulikana kuhusu kiongozi wa dhehebu la kufa njaa nchini Kenya?

    Kufunga mpaka kufa: 'Mke wangu na watoto sita walimfuata Mchungaji Mackenzie'

15. Saa 7 zilizopitaVisa vya Ebola vyaongezeka nchini Kenya na kufikia nane

    Kenya imethibitisha kisa kipya cha ugonjwa wa Ebola, na kupelekea jumla ya visa vya maambukizi kufikia nane.

    Mkurugenzi Mkuu wa Afya nchini Kenya, Dkt. Patrick Amoth, aliambia kituo cha televisheni cha Citizen TV hapo jana kuwa Wizara ya Afya iliwapima watu 38 na mmoja hapo jana na mmoja wao akapatikana na virusi vya Ebola vya aina ya Bundibugyo.

    Kisa hiki kipya ni cha mhudumu anayewahudumia wagonjwa waliokuwa wamewekwa karantini.

    Amoth amesema mgonjwa huyo ametengwa na anapokea matibabu maalumu, ambayo yametolewa kwa wagonjwa wengine saba waliopatikana na virusi hivyo.

    Wagonjwa waliothibitishwa kuwa na maambukizi ya virusi vya Ebola, wamekuwa wakipokea matibabu aina ya ‘Monoclonal Antibodies’, ambayo kitaalamu ni aina yap rotini ambayo husaidia mwili kuwa na kinga Zaidi ya kupambana na maambukizi. Kulingana na Dkt Amoth, wagonjwa hao wanaopokea aina hiyo ya matibabu wamekuwa wakiendelea vyema na kupata nafuu.

    Kisa hicho kipya kinajiri siku tu moja baada ya Kenya kutangaza visa vingine vinne vipya vya Ebola, vikiwemo vya mwanaume aliyekuwa na uhusiano wa karibu wa kifamilia na mgonjwa wa kwanza nchini humo, pamoja na wahudumu watatu wa afya waliomhudumia alipokuwa hospitalini.

    Amoth pia ametuliza hofu kuhusu kuenea kwa ugonjwa huo katika jamii, akisema uwezekano wa watu waliowekwa karantini kueneza virusi hivyo kabla ya kutengwa ulikuwa mdogo.

    “Walianza kuonyesha dalili baadaye sana, siku ya tisa au ya kumi. Kwa hiyo, wakati walipokuwa katika jamii, hawakuwa na dalili zozote. Hivyo, uwezekano wa kumwambukiza mtu mwingine ulikuwa mdogo sana,” alisema Amoth.

    Kenya ilithibitisha kisa chake cha kwanza cha Ebola tarehe sita mwezi Oktoba. Mgonjwa wa kwanza alikuwa mwanaume aliyekuwa akiishi katika Jamhuri ya Kidemokrasia ya Congo (DRC).

    Aidha, kutokana na kuongezeka kwa maambukizi ya Ebola nchini Kenya, mkutano mkuu wa Kilimo wa Africa International Agricultural Expo 2026 (AIAE), uliokuwa ufanyike katika jumba la KICC nchini Nairobi, umehairishwa hadi mwaka ujao.

    Soma pia:

    Jinsi taarifa za milipuko ya magonjwa zinavyoathiri afya ya akili na namna tunavyofikiri

    Wakati mila za mazishi zinapokutana na tishio la Ebola

16. Saa 7 zilizopitaHujambo na karibu katika matangazo yetu ya moja kwa moja Jumatatu ya leo