TOOS, Tirada dhimashada Nepal oo gaartay 475 qof, iyadoo Shiinuhu joojiyay dedaalada samatabixinta xuduudda Nepal-Tibet

Tebin toos ah

1. 11 Daqiiqadood ka horIiraan oo si adag uga hadashay qorshaha qaarijinta wiilka Trump

   

   Xigashada Sawirka, Getty Images

   Mohsen Rezaei, oo ah Xoghayaha Golaha Sare ee Amniga Qaranka Iran, ayaa sheegay in wararka ku saabsan shirqool la sheegay in Iran ay ku doonaysay inay ku disho Donald Trump, iyo hanjabaad lagu sheegay in lagu dili rabay wiilkiisa yar, ay yihiin “shirqool” uu abaabulay Ra’iisul Wasaaraha Israel, Benjamin Netanyahu.

   Rezaei oo la hadlay kanaalka wararka Carabta ee Al-Manar ayaa sheegay, in Netanyahu uu doonayo inuu Madaxweynaha Mareykanka Donald Trump cabsi geliyo isagoo adeegsanaya wararkan, si Mareykanku uga qayb qaato dagaalka ka dhanka ah Iran.

   Rezaei wuxuu sheegay in Netanyahu uu faafiyay “warar been abuur ah” oo ku saabsan shirqoolka la sheegay ee Iran ay ku doonaysay inay ku disho Trump, taas oo cabsi gelisay madaxweynaha Mareykanka isla markaana saameyn ku yeelatay go’aannadiisa.

   Wuxuu yiri: “Isagoo ka baqaya wararkan, Trump waxaa la arkayay isagoo booqashadiisii Turkiga ku safraya gaari sahay cunto sida shaqaale caadi ah.”

   Rezaei wuxuu intaas ku daray: “Haddii aan go’aan qaadanno, cidina kama hor istaagi karto inaan fulinno. Laakiin wararkani waa hadal aan macno lahayn oo uu Netanyahu sheegay.”

   Warbaahinta Iran, oo ay ku jiraan wakaaladaha wararka, ayaa daabacay qaybo ka mid ah wareysiga Rezaei uu siiyay Al-Manar.

   Si kastaba ha ahaatee, Rezaei ma uusan soo bandhigin wax caddeyn ah oo dadweynaha loo hayo oo taageeraya sheegashadiisa ku saabsan hanjabaadda la sheegay ee lagu doonayo in lagu dilo Trump ama lagu bartilmaameedsado wiilkiisa.

   Sidoo kale akhri;

   Netanyahu oo sheegay in Iiraan ay isku dayday inay disho mid ka mid ah wiilashiisa

   Khasaaraha qarsoon ee Iran u gaystay shabakadda sirdoonka Mareykanka - NBC

   Maxay saxaafadda Faransiisku ku haysataa Maxamed Bin Salman?

2. 20 Daqiiqadood ka horEhelada dadka la la'ayahay oo akhbaar sugaya

   Tirada dhimashada waxay ku dhow dahay 500 oo qof halka 500 oo kalena la la'ayahay

   

   Xigashada Sawirka, Getty Images

   

   Xigashada Sawirka, Getty Images

   

   Xigashada Sawirka, Getty Images

3. 37 Daqiiqadood ka horWar deg deg ah, Tirada dhimashada daadaka dhoobada wata ee Nepal oo aad u korodhay

   

   Xigashada Sawirka, Reuters

   Booliiska dalka Nepal ayaa sheegay in ilaa 09:00 subaxnimo waqtiga maxalliga ah ee Jimcaha maanta ah, in 475 qof ay ku dhinteen daadadkii dhobata watay ee Arbacadi ku dhuftay degmada Rasuwa ee dalkaas.

   In ka badan 550 qof ayaa la la'ayahay, kadib 48 saacadood o ay daadadkaas ku dhufteen dalka, tiradaas oo la filayo inay intaas ka sii badato.

   Cabsi kale ayaa jirta oo adda waxay ka cabsi qabaan in, kadib saacado badan oo roob culus ah, harada ka samaysantay burburka dhexdiisa ay qararka jabsato, taasina ay maalmaha soo socda ay sababto dhimasho hor leh.

   Booliisku waxay intaas ku dareen in howlgallada samatabbixinta iyo baadi-goobka dadka ay weli socdaan, iyadoo sidoo kale dadaallo lagu doonayo in “waddooyinka xanniban laga furo” ay ka socdaan goobaha ay daadadku saameeyeen.

   Samatabbixiyeyaasha ku sugan aaggaas ayaa lagu amray inay hadda joojiyaan hawlgallada, sida ay sheegayaan wararka ka soo baxaya warbaahinta dowladda Shiinaha.

   In ka badan 550 qof ayaa la soo sheegay inay ku maqan yihiin dhinaca Tibet ee xadka — 260 ka mid ah waa ajaanib, oo ay ku jiraan dalxiiseyaal u socday buurta barakaysan ee Kailash ee Tibet.

   Sidoo kale akhri

   Maxaa sababay daadadkii ay dadka badan ku dhinteen ee Nepal, maxayse saynisyahanadu ka yiraahdeen

4. 2 Saacadood ka horFaa'iidada muhiimka ah ee quraacda

   

   Xigashada Sawirka, Getty Images

   Cunista quraac badan iyo casho yar ayaa kaa caawin karta dhimista miisaankaaga, ayay yiraahdeen cilmi-baareyaashu.

   Markii ay saynisyahannadu sameynayeen cilmi-baarista waxay si sax ah u xakameeyeen cuntada dadka, si ay isu barbar dhigaan saamaynta quraacda culus iyo cashada culus.

   Kooxda Jaamacadda Aberdeen waxay dadkii ay tijaabiyeen ka heleen dad dhimay kalooris, si isku mid ah mar kasta oo ay cunaan cuntadooda ugu culus ee maalinta.

   Laakiin, rabitaankooda cuntada ayaa si aad ah hoos ugu dhacay kaddib markii ay billaabeen cunista quraacda culus, taas oo sahlaysa in uu qofka ka taxaddaro dheelitirka cuntadiisa.

   Cilmi-baareyaashu waxaa kale oo u soo baxday hal fikrad oo ah in habeenku uu yahay wakhtiga ugu xun ee cunto la cuno, sababtoo ah saacaddaas dheef-shiidka ayaa cuntada u beddelaya kiimiko, gaar ahaan marka uu qofku hurdo.

   Dadka cilmi barista ka qeyb qaatay oo 30 qof ahaa ayaa dhammaan loo diyaarinayay quraac, qado iyo casho in ka badan labo bil, iyadoo maalintii loogu dararay 1,700 oo kaloori.

   Waxay hal bil cunayeen quraac aad culus iyagoo isticmaalaya ku dhawaad ​​kala bar kalooriga maalinlaha ah, kaddibna waxaa xigay qado iyo casho fudud, halka bisha kalena ay cunayeen cunto culus fiidkii beddelkii subaxdii.

   Sii akhri

5. 3 Saacadood ka horMuxuu Laftagareen ka yiri eedeynta ah in ciidamadiisa iyo al-Shabaab ay isku milmeen?

   Madaxweynihii hore ee maamulka Koonfur Glabeed Soomaaliya Cabdicasiis Xasan Maxamed Laftagreen balse isagu sheegay inuu weli yahay madaxweynaha saxda ah ee maamulkaasi, ayaa beeniyay in xiriir uu kala dhaxeeyo al-Shabaab kadib markii dowadda federaalka ah iyo maamulka cusub ee Koonfur galbeed ay ku eedeeyeen wada shaqeyn in ay kala dhaxeyso Shabaab iyo ciidamo isaga taabacsan oo ku sugun duuleedka Baydhabo.

   Laftagareen oo waraysi siiyay BBC-da ayaa sheegay in dadka reer Koonfur Galbeed ay u adkeysan la'yihin dhibaatada lagu hayo shacabka deegaannadaasi, isla markaana ay doonayaan in ay ka dulqaadaan wax uu ku tilmaamay ciidamo ku soo duulay oo deegaanno kale laga keenay. Lifaaqa kore ka dhegeyso wareysi gaar ah oo uu siiyay BBC:

   Halkan ka dhageyso wareysiga

6. 6 Saacadood ka horQatar iyo Iran oo ka wada hadlay xaalka Hormuz iyo xiisadda gobolka

   

   Xigashada Sawirka, Wasaaradda Arrimaha Dibedda ee Qatar

   Ra’iisul Wasaaraha iyo Wasiirka Arrimaha Dibadda Qatar, Sheekh Mohammed bin Abdulrahman Al Thani, ayaa booqday caasimadda Iran ee Tehran, halkaas oo uu kula kulmay madaxda Iran.

   Kulamadu waxay diiradda saareen mustaqbalka marin-biyoodka Strait of Hormuz, gaar ahaan qorshe lagu sameynayo marin ku-meel-gaar ah oo maraakiibtu isticmaali karaan. Waxaa sida oo kale laga hadlay qorshe wadajir ah oo lagu nadiifinayo miinooyinka lagu sheegay in lagu aasay marin-biyoodka xilligii dagaalka.

   Labada dhinac waxay sidoo kale ka wada hadleen sidii loo yareyn lahaa xiisadda gobolka loona abuuri lahaa xaalad ku habboon in wada-hadallada Iran iyo Mareykanka dib loo bilaabo, si loo gaaro xasillooni iyo amni gobolka.

   Sheekh Mohammed wuxuu sidoo kale si gaar ah ula kulmay Madaxweynaha Iran Masoud Pezeshkian iyo Guddoomiyaha Baarlamaanka Iran Mohammad Bagher Ghalibaf, oo ah wadaxaajoodaha ugu sarreeya Iran.

7. 7 Saacadood ka horTaliyihii ciidankii SDF la kala diray ee Suuriya oo loo magacaabay La-taliyaha Madaxweyne

   Madaxweynaha Suuriya Axmed Al-Sharaa ayaa Mazloum Abdi, hoggaamiyihii hore ee Ciidamada Dimuqraadiga Suuriya (SDF), u magacaabay la-taliye ka tirsan Madaxtooyada.

   Mazloum Abdi ayaa horey ugu dhawaaqay in SDF la kala dirayo ciidan madax-bannaan ahaantii ahaayeen, isla markaana ciidamadeeda iyo hay’adahooda amni iyo rayid lagu biirinayo dowladda Suuriya.

   Go’aankan ayaa qeyb ka ah heshiis u dhexeeya maamulka cusub ee Suuriya iyo hoggaanka Kurdiyiinta.

8. 8 Saacadood ka horMuxuu Laftagareen ka yiri eedeynta ah in ciidamadiisa iyo al-Shabaab ay isku milmeen?

   Madaxweynihii hore ee maamulka Koonfur Glabeed Soomaaliya Cabdicasiis Xasan Maxamed Laftagreen balse isagu sheegay inuu weli yahay madaxweynaha saxda ah ee maamulkaasi, ayaa beeniyay in xiriir uu kala dhaxeeyo al-Shabaab kadib markii dowadda federaalka ah iyo maamulka cusub ee Koonfur galbeed ay ku eedeeyeen wada shaqeyn in ay kala dhaxeyso Shabaab iyo ciidamo isaga taabacsan oo ku sugun duuleedka Baydhabo.

   Laftagareen oo waraysi siiyay BBC-da ayaa sheegay in dadka reer Koonfur Galbeed ay u adkeysan la'yihin dhibaatada lagu hayo shacabka deegaannadaasi, isla markaana ay doonayaan in ay ka dulqaadaan wax uu ku tilmaamay ciidamo ku soo duulay oo deegaanno kale laga keenay. Lifaaqa kore ka dhegeyso wareysi gaar ah oo uu siiyay BBC:

   Halkan ka dhegayso waraysiga

9. 9 Saacadood ka horChelsea oo sii wadda guulaheedii tan iyo intii Alonso tababaraha noqday

   Danny Welbeck ayaa gool dhaliyay kulankiisii ugu horreeyay, iyada oo Chelsea ay 2-0 kaga adkaatay Luton Town wareegga 3-aad ee Carabao Cup.

   Welbeck oo 35 jir ah, xagaagan kaga soo biiray Brighton, ayaa qeybtii hore madaxa ku dhaliyay goolka koowaad. Goolka labaad waxaa iska dhaliyay Hakeem Odoffin, kaddib markii uu si khaldan u leexiyay kubbad uu soo tuuray Estevao Willian.

   Enzo Fernandez laguma darin kooxda Chelsea, inkasta oo uu beddel ku soo galay kulankii ay Isniintii 3-2 kaga adkaadeen Fulham. Warar ka yimid Argentina ayaa sheegaya inuu doonayo inuu u wareego Manchester City, iyadoo wakiilladiisuna ay wadahadallo la yeesheen kooxdaas.

   Chelsea ayaa inta badan maamushay qeybtii hore, balse goolhayaha Luton, Josh Keeley, ayaa sameeyay badbaadino muhiim ah, gaar ahaan labo badbaadin oo isku xigta oo uu ku hor istaagay Cole Palmer daqiiqaddii 11-aad.

10. 9 Saacadood ka horTrump oo amar madaxweyne 'haro' caan ah magaca kaga beddelay

    

    Xigashada Sawirka, Reuters

    Madaxweyne Donald Trump ayaa saxiixay amar fulineed oo lagu doonayo in Harada Ontario (Lake Ontario) loogu beddelo magaca Harada Ameerika (Lake America).

    Go’aankan ayaa yimid xilli uu sii xoogeysanayo khilaafka ganacsi ee u dhexeeya Mareykanka iyo Canada. Mareykanku wuxuu Canada ku soo rogay canshuur 50% ah oo lagu qaadayo badeecooyin Canadian ah oo qiimahoodu yahay ku dhowaad $20 bilyan, halka Canada ay sheegtay inay ka jawaabi doonto canshuur la mid ah.

    Trump ayaa horey dhowr jeer ugu hanjabay inuu magaca harada beddeli doono. Ra’iisul Wasaaraha Canada Mark Carney ayaa diiday tallaabadaas, isagoo sheegay in magaca Lake Ontario uu leeyahay taariikh ka badan 400 sano, isla markaana haradu ay tahay meel ay labada dal wadaagaan.

    Trump wuxuu horey, markii uu xafiiska qabtay 2025, u saxiixay amar lagu beddelay magaca Gulf of Mexico loona bixiyay Gulf of America, balse Mexico ayaa diiday magacaas.

11. 27 Agoosto 2026Nepal: Boqollaal qof oo la soo badbaadiyey

    Xafiiska Ra’iisul Wasaaraha Nepal ayaa sheegay in 350 qof laga soo badbaadiyey hog dheer oo ku dhow Webiga Trishuli.

    Dadka laga soo badbaadiyey aaggaas, oo qayb ka ah warshad korontada ka dhalisa biyaha, waxay ahaayeen shaqaale iyo dad deegaanka ah, sida lagu sheegay warbixinta.

    Ciidanka Nepal ayaa weli wada dadaallada lagu soo badbaadinayo 100 qof oo kale oo ku jira gudaha tunnel-ka.

12. 27 Agoosto 2026Waa kuma Khaalid Maxamed, ninkii "qorsheeyay" weerarkii ugu xumaa ee ka dhacay Maraykanka?

    Ninka lagu eedeeyay inuu qorsheeyay weerarkii 11-kii Sebtembar 2001 ee ka dhacay Maraykanka, Khaalid Sheekh Maxamed, ayaa maxkamad la horgeyn doonaa bisha Juun 2028, in ka badan 25 sano kaddib weerarkii ay dowladda Maraykanku ku tilmaantay "weerarkii argagixiso ee ugu xumaa ee abid ka dhaca gudaha dalka."

    Garsooraha maxkamadda ciidamada milatariga ayaa go'aamiyay in dacwaddu bilaabato labo sano gudahood, isagoo sheegay in codsiga xeer-ilaalintu ku doonaysay in maxkamaddu bilaabato 2027 uu ahaa mid xilli hore ah.

    Khaalid ayaa dalbaday in la gaaro heshiis u oggolaanaya inuu qirto dambiyada lagu soo oogay, iyadoo loo ballanqaadayo in aan lagu xukumin dil. Hase yeeshee, maxkamad federaali ah oo racfaan qaadda ayaa diidday codsigaas. Waxaa la qabtay sanadkii 2003, waxaana lagu hayaa xabsiga Guantanamo Bay tan iyo Sebtembar 2006.

    Khaalid Sheekh Maxamed ayaa hore u qirtay inuu isagu qorsheeyay weerarkii 11-kii Sebtembar 2001, laga bilaabo billowgiisii ilaa dhammaadkiisii.

    Halkan ka sii akhri sheekada

13. 27 Agoosto 2026Booliska Nepal oo shaaciyey dhimasho hor leh

    Tirada dadka ku dhintay Nepal kadib fatahaadihii degdegga ahaa ayaa kor ugu kacday 389 qof, sida ay sheegeen booliiska Nepal.

    Tani waa koror marka loo eego tiradii hore ee 359 qof ee ay mas’uuliyiintu sheegeen dhowr saacadood ka hor.

    Wararkii ugu dambeeyay waxay sidoo kale sheegayaan in ay jirto cabsi laga qabo fatahaad kale, kadib markii biyo ku xannibmeen meel sare oo ay sameeyeen haro weyn oo laga yaabo inay karkaarada jabsato.

14. 27 Agoosto 2026Xiriirka kubada cagta Yurub oo wada dacwad ka dhana madaxweynaha FIFA

    

    Xigashada Sawirka, Getty Images

    UEFA waxay waddaa dacwad dambiyeed sharci oo ka dhan ah madaxweynaha FIFA, Gianni Infantino, taas oo la xiriirta qorshihii hadda la joojiyay ee ahaa in saamiyo laga iibiyo Koobka Adduunka iyo tartamada kale ee FIFA maal-gashadayaal gaar loo leeyahay.

    Dukumentiyo ay aragtay BBC Sport ayaa muujinaya in hay’adda maamusha kubadda cagta Yurub ay gudbisay codsi ay ku doonayso in loo oggolaado helitaanka caddaymo iyo dukumentiyo loo adeegsan doono dacwad ka socota Switzerland oo ka dhan ah madaxweynaha cadaadiska badan wajahaya. UEFA waxay Infantino ku eedaynaysaa “maamul-xumo dambiyeed”.

    Wax yar kaddib Koobka Adduunka ee xagaagan, Infantino wuxuu soo jeediyay in la abuuro shirkad cusub oo lagu magacaabo Fifa Forward Enterprise (FFE), taas oo saamiyo ka iibin lahayd tartamada kubadda cagta ee FIFA maal-gashadayaal gaar loo leeyahay.

    Qorshahaas ayaa la joojiyay kaddib markii uu si weyn uga dhashay cambaareyn iyo mucaaradad.

    Codsiga caddaymaha, UEFA waxay ku andacoonaysaa in Infantino uu qorshahan u sameeyay si uu isaga iyo maal-gashadayaasha suurtagalka ah uga faa’iideystaan dhaqaale.

    Codsiga UEFA ayaa lagu sheegay:

    “Run ahaantii, waxay ahayd dariiq uu Infantino iyo koox yar oo isaga ku dhow ay ku heli lahaayeen saamiga joogtada ah ee hantida ugu qiimaha badan FIFA, isla markaana ay uga faa’iideysan lahaayeen, taas oo waxyeello u geysan lahayd FIFA, xubnaheeda iyo dhinacyada kale ee qoyska kubadda cagta.”

    UEFA waxay sidoo kale sheegtay in Infantino qorshaha ku meel mariyay nidaamka gudaha ee FIFA maalmo yar ka hor, isagoo qabtay kulan si degdeg ah loo abaabulay. Kulankaas, tiro kooban oo ka mid ah maamulayaasha iyo shaqaalaha FIFA qaarkoodna aan waligood hore u maqal, qorshahaayaa la siiyay saacado kooban oo keliya si ay u ansixiyaan qorshe aan horay loo arag oo ku kacayay balaayiin doollar.

    UEFA waxay sidoo kale ku andacoonaysaa in qiimaha saamiyada la iibin lahaa aan si madax-bannaan loo xaqiijin, isla markaana lagu iibin lahaa qiime aad uga hooseeya kii ay dhab ahaan mudnaayeen. Waxay iibka la qorsheeyay ku tilmaantay “qiime si khiyaano ah suuqa uga hooseeya oo Infantino u riixayay danihiisa gaarka ah.”

    Codsiga ayaa intaas ku daraya in, sida uu Infantino ku dhawaaqay, maal-gashadayaashu ay heli lahaayeen dano dhaqaale oo joogto ah oo ku saabsan qaybta ganacsi ee FIFA, iyagoo ku bixinaya $4.2 bilyan. Tani, sida UEFA sheegtay, waxay ka dhignaan lahayd in shirkaddaas lagu qiimeeyay oo keliya qiyaastii $20 bilyan, taas oo ay ku tilmaantay qiime aad u hooseeya. UEFA waxay sheegtay in qiimahaasi uusan ka dhalan tartan furan oo iib ah, sidoo kalena uusan hubin qiimeeye madax-bannaan.

    Codsiga, UEFA waxay maxkamad ku taalla Florida ka codsanaysaa inay u oggolaato inay hesho faylal ay hayaan laba shirkadood oo FIFA leedahay FIFA Americas iyo FWC2026—si dukumentiyadaas loogu isticmaalo, marxalad dambe, dacwadda ciqaabeed ee ka socota Switzerland.

    Labada shirkadoodba waxay ku yaallaan Florida.

    UEFA waxay sheegtay in 55-ka waddan ee xubnaha ka ah UEFA ay suurtagal tahay inay waxyeello ka soo gaarto qorshihii iibka saamiyada. Waxa kale oo ay sheegtay inay suuragal tahay inay dacwado ciqaabeed ka gudbiso saraakiil kale oo FIFA ah, marka laga reebo Infantino.

15. 27 Agoosto 2026Ninkii loo yaqaaney “Kawaanlihii Bosnia”, ee amray dilka dad badan oo geeriyooday

    Hoggaamiyihii hore ee ciidamada Serbiyiinta Bosnia, Ratko Mladic, ayaa geeriyooday. Ninkan oo 84 jir ahaa ayaa xabsi daa’im ku qaadanayay magaalada Hague, kadib markii lagu helay dambiyo xasuuq ah iyo dambiyo ka dhan ah aadanaha oo uu geystay horraantii sagaashamaadkii.

    Mladic, oo loo yaqaanay “Kawaanlihii Bosnia”, ayaa ciidamadiisa ku amray inay geystaan gaboodfalladii ugu xumaa ee Yurub ka dhacay tan iyo Dagaalkii Labaad ee Adduunka. Wuxuu lahaa go’doomintii arxan-darrada ahayd ee k adhacday magaalada Sarajevo halkaas oo lagu dilayi kumannaan rag iyo wiilal Muslimiin Bosniay ah.

    Ha yeeshee , weli wuxuu geesi dagaal u yahay qaar badan oo ka mid ah Serbiyiinta waddaniyiinta ah; xarun telefishan oo Serbia ah ayaa geeridiisa ku tilmaantay “ceeb aan weligeed ka tirmayn caddaaladda caalamiga ah.”

    Sheekooyinka kale ee aad sii akhrin karto:

    Maxaa magaalada Miami ee Maraykanka ka dhigay hoyga bilyaneerrada?

    Kaneecodiyaarad soo raacday oo dad ku dishay Jarmalka

16. 27 Agoosto 2026Nolosha qarsoodiga ah ee hoggaamiyaha Iiran iyo shaki laga muujiyay xaaladdiisa nololeed

    Toddobaadkii hore, waxaa magaalooyinka Tehran, Qom iyo Mashhad lagu qabtay xuska sannad-guuradii 40-aad ee geeridii Cali Khamenei. Xuska munaasabdaas, Mojtaba Khamenei kama uusan soo qaybgelin taxanaha cusub ee xafladahaas, mana jirin wax muuqaal ama cod ah oo laga baahiyay isaga.

    Markan, si ka duwan sidii xilligii aaska, waxay u muuqatay inaanay dadweynuhu si gaar ah u filayn inuu goobjoog ka ahaado hoggaamiyaha saddexaad ee Jamhuuriyadda Islaamiga ah; taas oo u muuqata inay ka dhigan tahay in qarsoodiga u uku jira aanay hadda kicinayn dareenkii iyo falcelintii warbaahinta ee hore u jiri jiray.

    Sababta ugu weyn ee afhayeenka dowladda u uku sheegay cudur-daarka maqnaanshahiisa waa arrimaha amniga. Aragtidooda ugu weyn ayaa ah in baahinta muuqaal laga duubay hoggaamiyaha cusub ay daaha ka qaadi karto halka uu ku sugan yahay, taas oo khatar gelin karta noloshiisa. Marka laga jawaabayo su'aasha ku saabsan sababta aan loo baahinayn ugu yaraan wax cod ah oo laga hayo Mojtaba Khamenei, warbaahinta dawladdu waxay ku doodaysaa in xitaa codkiisu uu daaha ka qaadi karo halka uu ku sugan yahay.

    Waa run in marka si taxaddar leh loo falanqeynayo faylka codka, in ay suurtagal noqon karto in la ogaado macluumaad muhiim ah, sida astaamaha qalabka wax lagu duubo, tilmaamaha shabakadda korontada, ama qaar ka mid ah muuqaallada iyo kuwa deegaanka ee goobta wax lagu duubayay. Hase yeeshee, haddii sababta ugu weyn ee loo qariyay muuqaalka iyo codka hoggaamiyaha ay ahayd arrimo la xiriira amniga, waxa jirtay siyaabo wax looga qaban karo khataraha dhicia kara.

    Tusaale ahaan, hay'adaha dawladdu si fudud ayay uga fogaan kareen adeegsiga qalabka kombuyuutarka si ay u duubaan codka Mojtaba Khamenei, iyagoo isticmaali karay qalabkii ka horreeyay kuwan casriga dhijitaalka ah sida cajaladaha iyo qalabkii hore ee cod-duubista.

    Halkan ka soo akhri sheekada oo dhamaystiran

17. 27 Agoosto 2026War cusub oo laga soo sheegay magaalada St Petersburg Ruushka

    Wararka ka imanaya Ruushka ayaa sheegaya in sarkaal milatari lagu dilay kadib markii gaarigiisa uu ku qarxay magaalada St Petersburg. Xaaskiisa ayaa la sheegay inay si xun ugu dhaawacantay.

    Ninka dhintay magaciisa lama shaacin, balse warbaahinta Ruushka ayaa sheegtay inuu ahaa gaashaanledhexe. Mas’uuliyiintu weli ma sheegin waxa sababay qaraxa, waxayna sheegeen oo keliya in gaarigu dab qabsaday, iyadoo baaritaan la bilaabay.

    Dhacdadan ayaa ku soo beegmaysa xilli ay Ruushka ka dhaceen weerarro isdaba joog ah oo lagu bartilmaameedsanayo shaqaale milatari. Moscow ayaa marar badan weerarrada noocan ah ku eedeysay Ukraine, inkastoo Kyiv aysan sheegan mas’uuliyadda dhammaan weerarradaas.

    Sheekooyinka kale ee aad sii akhrin karto:

    Maxaamagaalada Miami ee Maraykanka ka dhigay hoyga bilyaneerrada?

    Kaneecodiyaarad soo raacday oo dad ku dishay Jarmalka

18. 27 Agoosto 2026Pakistan oo beeniyey warar laga faafiyey socdaalka taliyaha ciidamada dalkaas uu ku tagay ku tagay

    Pakistan ayaa beenisay wararka sheegaya in Taliyaha Ciidamada Qalabka Sida, General Asim Munir, uu dhawaan booqday Iran isagoo ahaa ergay uu soo diray Madaxweynaha Mareykanka Donald Trump, iyadoo wararkaasi lagu tilmaamay kuwo “marin-habaabin ah oo xaqiiqada ka fog.”

    Tahir Andrabi, afhayeenka wasaaradda arrimaha dibadda Pakistan, ayaa maanta shir jaraa’id oo toddobaadle ah ku qabtay Islamabad ku sheegay in sheegashada ah in madaxa difaaca Pakistan uu Iran u tegay isagoo ergay u ah Trump ama Mareykanka ay tahay mid been ah. Wuxuu sheegay in safarkaasi uu si gaar ah ugu gaar ahaa Pakistan oo dhex-dhexaadinaysay labada dhinac.

    Wuxuu sheegay in Asim Munir uu Tehran u safray 24-kii Agoosto, taas oo qayb ka ahayd dadaallada diblomaasiyadeed ee Pakistan ay ku doonayso in lagu soo afjaro colaadda u dhexeysa Mareykanka iyo Iran, isla markaana gacan looga geysto dib u furista marin-biyoodka Hormuz.

    Sida uu sheegay afhayeenka wasaaradda arrimaha dibadda Pakistan, wada-hadalladii booqashada ayaa diiradda lagu saarayay yareynta xiisadaha gobolka, sidii loo soo afjari lahaa ismari-waaga militari iyo sidii loo raadin lahaa xal wada-hadal lagu gaaro oo lagu soo celinayo nabadda iyo xasilloonida gobolka.

    Wuxuu intaas ku daray in booqashadu muujisay doorka Islamabad ee “daacadnimada iyo wax-dhiska leh” ee lagu yareynayo khilaafaadka u dhexeeya Washington iyo Tehran.

    Afhayeenku wuxuu sheegay in Pakistan, oo ay weheliyaan dalal ay ku tilmaantay “walaalo”, ay sii wadi doonaan dadaallada isku-duwan ee lagu xallinayo dhibaatooyinka ka jira Bariga Dhexe, ayna taageeri doonaan dhammaan dadaallada dhab ah ee lagu dib loogu bilaabayo wadahadallada nabadda laguna gaarayo xal dhammaystiran, caddaalad ah oo waara.

    Sheekooyinka kale ee aad sii akhrin karto:

    Maxaa magaalada Miami ee Maraykanka ka dhigay hoyga bilyaneerrada?

    Kaneeco diyaarad soo raacday oo dad ku dishay Jarmalka

19. 27 Agoosto 2026Liverpool oo qarka u saran helista ciyaaryahan tayo sare leh iyo qiimo ay ku doonayso

    

    Liverpool ayaa ku dhow inay la soo saxiixato Bradley Barcola oo ka tirsan Paris Saint-Germain, iyadoo lacagta heshiisku gaari karto £120 milyan.

    Ilo wareedyo ayaa BBC Sport u sheegay in wada-hadalladu horumar sameeyeen 48-kii saacadood ee la soo dhaafay, waxaana hadda la filayaa in heshiis buuxa laga gaaro weeraryahanka xulka France.

    PSG waxay ku qiimeysay 23-jirkan £145 milyan, balse Liverpool ayaa diyaar u ah inay heshiiska ku gaarto xirmo lacag ah oo ugu yaraan £100 milyan ah, taas oo gaari karta £120 milyan iyadoo ku xiran guulo waaweyn oo la gaaro ciyaaryahanka iyo kooxda.

    Barcola waa lugta midig, balse wuxuu doorbidaa inuu ka ciyaaro garabka bidix. Imaatinkiisa ayaa shaki dheeraad ah gelinaya mustaqbalka Cody Gakpo ee Anfield.

    Ilo wareedyo badan ayaa BBC Sport u sheegay in Tottenham Hotspur iyo Manchester City ay labaduba xiiseynayaan weeraryahanka reer Netherlands.

    Liverpool sidoo kale waxay suuqa uga jirtaa garab midig, iyadoo ay horay u sahamisay inay la soo wareegto Yankuba Minteh oo ka tirsan Brighton iyo Ismaïla Sarr oo ka tirsan Crystal Palace.

20. 27 Agoosto 2026Tirada dadka lagu la’yahay masiibadii Nepal iyo kuwa ku dhintay oo korortay

    Hay’adda Qaranka Nepal u qaabilsan Yareynta iyo Maareynta Khatarta Masiibooyinka ayaa sheegtay in 910 qof la la’yahay, isla markaana aan lala xiriiri karin kadib fatahaadaha.

    Kuwa la la’yahay waxaa ka mid ah 517 qof oo ajaanib ah, 44 xubnood oo ka tirsan Ciidanka Nepal iyo 28 askari oo ka tirsan Booliska Nepal.

    Hay’addu waxay intaas ku dartay in ilaa hadda la helay meydadka 258 qof, halka 351 qofna la badbaadiyey.

    Wararkeennii ugu dambeeyay, waxaan soo sheegnay tirooyin ay bixiyeen Booliska Nepal oo sheegayay in tirada dhimashadu gaartay 289 qof. Labada hay’adoodba waxay si gooni-gooni ah u soo gudbinayaan xogta ku saabsan howlgalka samatabbixinta, iyadoo xaaladdu isbeddelayso.