TOOS, Nairobi oo maanta xiran, suuqa Islii oo badi aan la furin iyo dadka oo guryaha ugu jira cabsi daraadeed

Tebin toos ah

1. 25 Juunyo 2026Madaxweynihii hore ee Somaliland oo digniin u diray xukuumadda madaxweyne Cirro

   Madaxweynihii hore ee Somaliland Muuse Biixi Cabdi ayaa ku taliyay in laga fiirsado heshiisyada siyaasadeed ee la galayo, xilli ay caalamka ka dhacayaan isbedello siyaasadeed oo waaweyn.

   Qoraal uu ku daabacay bartiisa Facebook, ayaa madaxweyne hore Muuse Biixi ku yiri: sidaan “Waxa muuqata saamaynta awoodda dawladaha Muslimka ah ee kala ah Iran, Pakistan, Turkiga, Masar iyo sucuudiga, Waxaana suurta gal ah in dawladahani sidii hore iskaga soo dhawaadaan, sababta oo ah is-maan-dhaafka sii xoogaysanaya ee u dhexeeya hoggaanka Maraykanka iyo Israa’iil, oo aan la dhayalsan karin, raadkiisana yeelan doonaa”.

   Wuxuu intaa ku daray in ay muhiim tahay in laga feejignaado waxa ka imaan kara heshiisyada siyaasadeed ee la galayo, isagoo si gaar ah xukuumadda Somaliland ugu baaqay in ay aad uga fiirsato waxa ka dhalan kara gelitaanka heshiisyada caalamiga ah si aaney wax ugu dhimin Somaliland, waxaana uu ku yiri qoraalkiisa:

   “Sida darteed, waxa lagama maarmaan ah in si qoto dheer loo lafo-guro culayska iyo natiijada ka soo baxaysa heshiisyada iyo isbeddellada socda, si looga fogaado hubanti la’aan siyaasadeed. Sidaas awgeed, waxa la gudboon Dawladda, gaar ahaan Xukuumadda Jamhuuriyadda Somaliland, inay si xeeldheer u daraasadayso saamaynta ka dhalan karta isbeddelladan caalamiga ah, si looga baaqsado il-duuf siyaasadeed oo wax u dhimi kara danaha Qaranka. Waxa kale oo muhiim ah in tallaabooyinka aynu hore u qaadnay iyo kuwa ina horyaalla la is waafajiyo, iyadoo lagu salaynayo danta Qaranka”.

   Hadalka madaxweyne hore Muuse Biix, ayaa ku soo aadaya xilli madaxweyne Cirro uu maanta ku soo laabtay magaalada Hargeysa, kadib safar uu toddobaad ugu maqnaa Israa’iil.

2. 25 Juunyo 2026Wariye geeriyooday kadib markii gaarigiisa qarax loogu xiray

   Wariye u shaqeynayay telefishinka Al Arabiya ee dalka Yemen ayaa xalay lagu dilay dalkaasi, kaddib markii bam lagu qarxiyay gaarigiisa.

   Al Arabiya ayaa sheegtay in wariyaheeda, oo la oron jiray Maxamed Aida, lagu bartilmaameedsaday magaalada Mukalla. Sawirro ay baahisay Reuters ayaa muujinaya gaarigiisa oo burburay isagoo yaalla gudaha xarun boolis.

   Sida ay sheegtay Al Arabiya, saraakiisha amniga ee Mukalla ayaa qiyaastii bil ka hor uga digay in naftiisu khatar ku jirto. Ilaa hadda ma jirto koox sheegatay mas’uuliyadda weerarkan.

   Dilkan ayaa dhacay xilli Yemen ay wajahaysay xiisado siyaasadeed iyo amni oo ka dhashay dagaallo u dhexeeyay ciidamo uu taageero Sacuudigu iyo xoogagga gooni-u-goosadka ah ee uu taageero Imaaraadka Carabta, kuwaas oo socday intii u dhexeysay Noofambar iyo Janaayo.

   Intii ay socdeen iska horimaadyadaas, gacan-ku-haynta magaalada Mukalla ayaa dhowr jeer isu beddeshay Golaha Ku-meelgaarka ah ee Koonfurta Yemen iyo ciidamada ku xiran dowladda Yemen ee caalamku aqoonsan yahay. Hadda magaalada waxaa gacanta ku haya ciidamada ay taageerto Sacuudi Carabiya.

   Golaha Kumeel-gaarka ee Koonfurta Yemen oo uu taageero Imaaraadka Carabtu, ayaa cambaareeyay dilka, wuxuuna ku tilmaamay calaamad muujinaysa dhibaatooyin amni oo ballaaran oo ka jira gobolka Xadramowt ee bariga Yemen.

   Rashad Al-Alimi, oo ah madaxa Golaha Hoggaanka Madaxtooyada Yemen, ayaa amar ku bixiyay in la dhiso guddi wadajir ah oo baaraya dilkan, wuxuuna sheegay in dadka ka dambeeyay la horgeyn doono sharciga.

   Yemen ayaa colaad ku jirtay tan iyo sannadkii 2014, markaas oo kooxda Houthis ee ay taageerto Iiraan ay qabsatay magaalada Sanaa, taasoo keentay in isbahaysi uu hoggaaminayo Sacuudi Carabiya uu ku biiro dagaalka.

3. 25 Juunyo 2026War deg deg ah, Degdeg: Weerar lagu qaaday markab marayay meel u dhow Hormuz

   Xarunta Hawlgallada Ganacsiga Badda ee Boqortooyada Ingiriiska, ayaa ku dhawaaqday inay heshay warbixin ku saabsan dhacdo ka dhacday biyaha u dhow Marin-biyoodka Hormuz, waqooyiga dalka Cumaan.

   Markab xamuul ah ayaa dhiniciisa midig waxaa ku dhacay walax aan la aqoonsan, taas oo dhaawac gaarsiisay qaybta laga hago markabka.

   Kabtanka markabka ayaa sheegay in aysan jirin cid ku dhaawacantay dhacdada, isla markaana aysan wax saameyn deegaanka ah ka dhalan.

   Mas’uuliyiinta ayaa baaraya arrintan, waxaana maraakiibta ku sugan aagga lagu wargeliyay inay taxaddar dheeraad ah muujiyaan isla markaana ay UKMTO ku soo wargeliyaan dhaqdhaqaaq kasta oo laga shakiyo.

   Iiraan ayaa hore uga digtay in isu-socodka maraakiibta ee Marin-biyoodka Hormuz uu noqdo mid la isku dubbariday oo raaca marin ay Iiraan u qoondeysay maraakiibta isticmaasha marin-biyoodkaa

4. 25 Juunyo 2026DAAWO: Sawirrada laga soo qaaday qyabo ka mid ah Venezuela

   Dhulgariirka ku dhuftay dalka Venezuela ayaa gaystay burbur xooggan. Waxaana laga soo qaaday goobaha qaar sawirro muujinaya baaxadda dhulgariirka. Daawo sawirrada iyo burburka uu sababay dhulgariirka dadka badan ku dhinteen.

5. 25 Juunyo 2026War deg deg ah, War cusub oo ka soo kordhay cudurka Ebola iyo faahfaahin

   Jamhuuriyadda Dimuqraadiga ah ee Congo ayaa soo rogtay xayiraado cusub oo dhinaca safarka ah si loo xakameeyo faafitaanka cudurka Ebola.

   Qof kasta oo ka baxaya meelaha uu cudurku saameeyay waa inuu hadda maro muddo go'doon ah oo ah 21 maalmood ka hor inta uusan u safrin meel kale oo dalka gudihiisa ah ama dibadda ah.

   Tallaabadan ayaa timid kaddib markii kiiskii ugu horreeyay ee Ebola laga helay dalka France, kaas oo ku saabsanaa dhakhtar ka soo laabtay Jamhuuriyadda Dimuqraadiga ah ee Congo.

   Mas’uuliyiinta Congo ayaa ka codsaday Faransiiska inuu la wadaago xogta lagama maarmaanka u ah dabagalka dadka uu cudurku gaari karo, iyadoo la xoojiyay kormeerka garoomada diyaaradaha ee Kinshasa iyo Bunia, oo ah xarunta uu cudurku sida weyn uga dillaacay.

   Ilaa hadda, waxaa la xaqiijiyay in ka badan 1,000 kiis oo Ebola ah, kuwaas oo ay ku jiraan 291 qof oo geeriyooday.

6. 25 Juunyo 2026War deg deg ah, Israa'iil oo sheegtay in laga dilay ku dhawaad afartan askari

   Ciidanka Israa’iil ayaa sheegay in mid ka mid ah askartooda uu ku dhintay waxa ay ku tilmaameen “hawlgal muhiim ah” oo ka socday koonfurta dalka Lebanon.

   Inkasta oo xabbad-joojin lagu dhawaaqay, haddana waxaa jira warar sheegaya in weli ay iska horimaadyo ka socdaan aaggaas oo u dhexeeya ciidamada Israa’iil iyo xoogagga Xisbullaah.

   Afhayeen u hadlay ciidanka Israa’iil ayaa wakaaladda wararka AFP u sheegay in askarigaasi uu geeriyooday kaddib markii gaarigii uu saarnaa uu rogmaday.

   Ciidanka Israa’iil ayaa sidoo kale sheegay in tan iyo markii uu billowday dagaalka ay la galeen Xisbullaah horraantii bishii Maarso, ay koonfurta Lubnaan ku dhinteen 37 askari iyo hal shaqaale rayid ah.

7. 25 Juunyo 2026War deg deg ah, Lubanaan iyo Israa'iil oo war cusub ka soo kordhay

   Wajigii ugu dambeeyay ee wadahadallada u dhexeeya Lubnaan iyo Israa’iil ayaa ka bilowday Xarunta Wasaaradda Arrimaha Dibadda ee Maraykanka ee magaalada Washington, D.C..

   Wadahadalladan ayaa dhacaya xilli Maraykanku uu isku dayayo inuu helo xal diblomaasiyadeed, halka Israa'iil ay sii waddo weerarradeeda ka dhanka ah Lubnaan. Taas ayaana dhalisay su’aal ku saabsan in wadahadalladani ay awoodi doonaan inay keenaan xal siyaasadeed oo waara.

   Cadaadis kaga yimid Maraykanka awgiis, mas’uuliyiinta Lubnaan ayaa bishii Abriil ka bilaabay Washington wadahadallo toos ah oo ay la leeyihiin Israa'iil.

   Isagoo ka hadlayay wadahadallada, Xoghayaha Arrimaha Dibadda ee Maraykanka, Marco Rubio, ayaa sheegay in labada dal ee deriska ah ay ku dhow yihiin “xal adag oo rasmi ah”.

8. 25 Juunyo 2026War deg deg ah, Dad loo haysto dil oo dacwad lagu soo dalka Koonfur Afrika

   Xeer-ilaaliyeyaasha dalka Koonfur Afrika ayaa sheegay in saddex qof oo u dhashay dalka Lesotho lagu soo oogay dacwad dil ah, kaddib toogasho wadareed horraantii bishan dhacday oo ay ku dhinteen 13 qof.

   Dadka lagu eedeeyay ayaa la xiray kaddib markii ay aqoonsadeen qaar ka mid ah dadkii ka badbaaday weerarka.

   Booliska ayaa sheegay in ku dhowaad toban nin oo si culus u hubeysnaa ay weerar ku qaadeen degaan aan rasmi ahayn oo ku yaalla aagga Cleveland, oo bariga kaga beegan magaalada Johannesburg. Weeraryahannadu waxay rasaas ku fureen dadka halkaas joogay, kaddibna waxay ku baxsadeen gaari hore ugu sugayay goobta.

   Dadka deegaanka ayaa aaminsan in toogashadu ay la xiriiri karto loollan ka dhexeeya kooxo macdan qodayaal sharci-darro ah oo ku nool aaggaas, kuwaas oo ku muransan gacan-ku-haynta iyo saamaynta goobaha ay ka shaqeeyaan.

9. 25 Juunyo 2026War deg deg ah, Degdeg: Iiraan oo Israa'iil u dirtay digniin adag

   Ismaaciil Qaani, oo ah taliyaha laanta dibadda ee Ciidanka Ilaalada Kacaanka Islaamiga ah ee Iiraan ayaa uga digay Israa'iil in ciidamadeedu ay sii joogaan dhulka dalka Lebanon.

   Farriin uu ku daabacay bartiisa X ayuu Qaani ku yiri:

   “Haddii aydnaan maanta uga bixin danihiinna awgood, berri waxaa la idinku qasbi doonaa inaad ku carartaan ceeb iyo bahdilaad.”

   Xabbad-joojinta u dhexeysa Israa'iil iyo kooxda Xisbullaah ee Lubnaan ayaa ka mid ah is-afgaradka u dhexeeya Iiraan iyo Maraykanka, waxaana dowladda Iiraan ay mar walba u aragtay hirgelinteeda inay tahay shuruud muhiim ah oo heshiiskaas ka mid ah.

   Si kastaba ha ahaatee, iska horimaadyada u dhexeeya ciidamada Israa'iil iyo Xisbullaah ayaa weli socda.

   Maalmihii u dambeeyay, Ra’iisul Wasaaraha Israa'iil, Benjamin Netanyahu, ayaa bayaan uu kaga jawaabayay is-afgaradka Iiraan iyo Maraykanka ku sheegay:

   “Waxaan sii joogi doonnaa aagga amniga ee koonfurta Lubnaan inta ay jirto baahi taas loo qabo. Anigoo ah Ra’iisul Wasaaraha Israa'iil, ayaa arrintaas si cad u xaqiijinayaa, mana jiro wax beddeli kara go’aankaas.”

10. 25 Juunyo 2026War deg deg ah, Dalalka caalamka oo u gurmanaya Venezuela iyo xaaladda oo sii adkaanaysa

    Maraykanka ayaa ballanqaaday inuu si degdeg ah uga jawaabi doono musiibada. Xoghayaha Arrimaha Dibadda ee Maraykanka, Marco Rubio, ayaa wariyeyaasha u sheegay intii uu booqashada ku joogay dalka Bahrain in dadaalka Maraykanku uu noqon doono mid ballaaran, degdeg ah, isla markaana wax ku ool ah.

    Dalalka Shiinaha iyo Hindiya ayaa sidoo kale ballanqaaday inay ka qayb qaadanayaan hawlgallada samatabixinta.

    Midowga Yurub ayaa sheegay inuu hawlgeliyay nidaamkiisa dayax-gacmeedka ee kormeerka si loo taageero dadaallada soo kabashada. Dalalka Spain iyo France ayaa ka mid ah waddamada soo bandhigay inay diraan kooxo samatabixiyaal ah.

    Garoonka diyaaradaha caalamiga ah ee ugu weyn dalka, oo ku dhow Caracas, ayaa la xiray sababo la xiriira burburka soo gaaray, taasoo adkayn karta gaarsiinta gargaarka degdegga ah.

11. 25 Juunyo 2026War deg deg ah, Marinka Hormuz iyo is haynta hadda taagan

    Xoghayaha Arrimaha Dibadda ee Maraykanka, Marco Rubio, ayaa u xaqiijiyay xulafada Maraykanka ee Khaliijka in marin-biyoodka Hormuz uu sii ahaan doono mid aan wax lacag ah laga qaadin maraakiibta isticmaasha.

    Isagoo ku sugan Bahrain intii uu socdaalka ku marayay dalalka Khaliijka, Rubio wuxuu sheegay in Maraykanku doonayo heshiis uu la galo Iiraan, balse aanu aqbali doonin heshiis qiimo kasta lagu gaaro.

    Iiraan ayaa hore u soo jeedisay inay lacag ka qaadi karto maraakiibta maraysa marin-biyoodkan istaraatiijiga ah. Hase yeeshee, dalka Oman, oo sidoo kale xuduud la leh marin-biyoodka Hormuz, ayaa arrintaas meesha ka saaray.

    Mas’uuliyiinta Cumaan ayaa hore u sii daayay khariidad muujinaysa marin mara xeebahooda, kaas oo noqon kara beddelka marinka ay Tehran furtay.

12. 25 Juunyo 2026War deg deg ah, Nin lagu waysanaa deegaanka Milxo oo maydkiisa la helay

    Deegaanka Milxo ee gobolka Sanaag ayaa sheegaya in la helay meydka nin ilaa shalay oo dhan la raadinayay, kaas oo ugu dambeyn laga helay midka ka mid ah gododka dahabka laga qado ee deegaankaasi oo uu ku geeriyooday.

    Sidoo kale ninka dhintay ayaa waxaa la socday nin kale oo isna la helay isaga oo dhaawac ah.

    Labadan nin oo midna dhaawacmay midna geeriyooday ayaa ah dhalinyaro, waxaana ay ku dhaceen godadka laga qado dahabka ee deegaanka Milxo.

13. 25 Juunyo 2026Baasaboorka Hindiya oo muran ka taaganyahay

    Sarkaal ka tirsan Wasaaradda Arrimaha Dibadda ee Hindiya ayaa muran weyn dhaliyay kaddib markii uu sheegay in haysashada baasaboorka Hindiya aysan caddayn u ahayn in qofku yahay muwaadin Hindi ah.

    Hadalkan ayaa si weyn loo cambaareeyay, iyadoo dadka dhaliilaya ay ku doodayaan in tani ay ka dhigan tahay in dalalka kale aysan mar dambe u aqoonsan doonin baasaboorka Hindiya inuu yahay caddeyn muujinaysa jinsiyadda qofka.

    Si kastaba ha ahaatee, dowladda Hindiya ayaa ku adkaysanaysa in baasaboorku uusan waligiis caddayn rasmi ah u ahayn muwaadinnimada, isla markaana Wasaaradda Arrimaha Dibadda ay kaliya sharaxaysay sharciyada jira.

    Murankan ayaa yimid kaddib markii la sheegay in malaayiin Hindi ah laga qaaday xuquuqdoodii codbixinta, sababo la xiriira eedeymo sheegaya inay ku guuldarreysteen inay caddeeyaan muwaadinnimadooda.

14. 25 Juunyo 2026War deg deg ah, Iiraan oo beenisay war ka soo yeeray Trump

    Ninka u qaabilsan wadahadallada ee dhinaca Iiraan, Maxamed Baqer Qalibaf, ayaa sheegay in sheegashada Maraykanka ee ah in Iiraan ay hantideeda la sii daayay ku iibsan doonto wax-soo-saarka beeraha ee Maraykanka ay tahay mid aan sax ahayn.

    Qalibaf ayaa bartiisa X ku qoray:

    “Maraykanku wuxuu si been ah u sheeganayaa in hantidayada la sii daayay loo isticmaali doono in lagu iibsado wax-soo-saarkooda beeraha...”

    Wuxuu hadalkiisa si kaftan iyo canaan isugu jira u sii raaciyay:

    “Waxaan goosanaynaa oo keliya wixii aad beerateen: tobannaan sano oo kalsooni-darro ah. Waa dalag dabiici ah, isla markaana gudaha laga soo saaray. Laakiin sida muuqata Maraykanku wuxuu dhoofiyaa oo keliya digirta ee hidde ahaan la beddelay, ballanqaadyo la jebiyay, iyo hadallo aan sal lahayn.”

    Hadalkan ayaa muujinaya dhaleeceyn uu u jeedinayo Maraykanka iyo kalsooni-darrada soo jireenka ah ee ka dhex jirta labada dal.

15. 25 Juunyo 2026War deg deg ah, Iiraan iyo Cumaan oo qaaday tallaabooyin ay isku garabsanayaan

    Sida ay baahisay warbaahinta dowladda Iiraan, wasiirrada arrimaha dibadda ee Iiraan iyo Cumaan ayaa intii ay ku wada hadlayeen khadka taleefanka adkeeyay muhiimadda ay leedahay in la sii wado iskaashiga iyo isku-duwidda labada dal ee ku saabsan isu-socodka maraakiibta ee Marin-biyoodka Hormuz.

    Wasiirka Arrimaha Dibadda ee Iiraan, Cabbaas Caraqji, iyo dhiggiisa Cumaan, Badr Al-Busaidi, ayaa sidoo kale ka wada hadlay xaaladihii ugu dambeeyay ee gobolka, oo ay ku jiraan habraacyada maraakiibta ee Marin-biyoodka Hormuz iyo tallaabooyinka ku-meel-gaarka ah ee lagu go’aamiyay muddada 60-ka maalmood ah.

    Arrintan ayaa lagu sheegay bayaan lagu daabacay akoonka Telegram-ka ee Wasiirka Arrimaha Dibadda ee Iiraan.

16. 25 Juunyo 2026Madaxweynaha Eritrea hooyadii oo geeriyootay

    Madaxweynaha Eritrea, Isaias Afwerki, hooyadii Marwo Adaanesh Barihee, ayaa geeriyootay.

    Wasaaradda Warfaafinta ee Eritrea ayaa sheegtay in hooyada Madaxweyne Isaias, Marwo Adaanesh, ay geeriyootay iyadoo da’deedu saxda ah aan lgau xusin qoraalka la baahiyay.

    Isaias Afwerki, oo ah hoggaamiyaha 80 jirka ah ee Eritrea, ayaa dalkaas maamulayay tan iyo markii uu ka go’ay Itoobiya oo uu xornimada qaatay.

    Hooyadiis ayaa geeriyootay Axaddii.

    Aaska Marxuumad Adaanesh Barihee ayaa shalay lagu qabtay meel u dhow magaalada Asmara, oo ah goobta ay ku dhalatay, waxaana ka soo qayb galay mas’uuliyiin sare oo dowladda ka tirsan iyo hoggaamiyeyaal diimeed, oo uu ku jiro Madaxweyne Isaias Afwerki, sida ay Wasaaradda Warfaafinta Eritrea ku baahisay boggeeda baraha bulshada.

    Marwo Adaanesh Barihee waxay dhashay 14 carruur ah oo uu ka mid yahay Madaxweyne Isaias Afwerki.

    Sagaal ka mid ah carruurteeda ayaa ka qayb qaatay halgankii Eritrea ugu jirtay inay xornimada ka qaadato Itoobiya.

17. 25 Juunyo 2026War deg deg ah, Degdeg: Tirada dadka ku dhintay dhulgariirka Venezuela oo korortay

    Tirada dadka ku dhintay dhulgariirradii xalay ku dhuftay dalka Venezuela ayaa hadda gaartay 164 qof, sida ay sheegtay madaxweynaha ku-meel-gaarka ah ee dalkaas, Delcy Rodríguez, wakaaladaha wararka ee Reuters iyo AFP ayaa tabiyay warkaan.

    Hoos ka akhri sheekooyinka kale:

    Sacdiyo Bajaaj oo xabsi 3 sano ah lagu xukumay, maxaa lagu sababeeyey

    Mala socotaa inay jiraan taageerayaal la siinayo $50,000 si ay u daawadaan ciyaar kasta oo Koobka Adduunka ah?

    Muxuu yahay kulaylka daran ee ka jira dunida?

18. 25 Juunyo 2026Dhacdo hadal hayn dhalisay oo ka dhacday Kashmir qaybta Hindiya maamusho

    Dhacdo aan caadi ahayn oo ka dhacday saldhigga booliska ee Atholi ee degmada Kishtwar ee Kashmir-ta ay Hindiya maamusho ayaa dhalisay su’aalo cusub oo ku saabsan wada-shaqeynta gudaha iyo ku dhaqanka sharciga ee hay’adaha amniga.

    Booliska Jammu iyo Kashmir ayaa diiwaangeliyay dacwad rasmi ah oo ka dhan ah tobanaan askari oo ka tirsan ciidamada Hindiya, kuwaas oo ay ku jiraan taliyaha guutada 17-aad ee Rashtriya Rifles, sarkaal darajadiisu tahay Major, iyo Naib Subedar.

    Ciidamadan ayaa lagu eedeeyay inay weerareen saldhigga booliska, jirdileen saraakiil boolis ah, isla markaana burburiyeen hanti dowladeed.

    Dhanka kale, afhayeen u hadlay Ciidanka Hindiya ee gobolka Jammu ayaa ku dhawaaqay in la sameyn doono baaritaan heer sare ah oo wadajir ah oo lagu eegayo dhacdadan. Baaritaankan waxaa si wadajir ah u fulin doona saraakiil ka tirsan booliska iyo ciidamada milatariga.

19. 25 Juunyo 2026War deg deg ah, Mar kale miyuu rabaa Trump in dagaal uu ku qaado Iiraan ?

    Aqalka Cad ee Maraykanka ayaa ka codsaday xubnaha Congress-ka inay ansixiyaan kharash dhan 87.6 bilyan oo doolar, inta badan lacagtaasna lagu sheegay inay tahay “baahiyo degdeg ah” oo la xiriira dagaalka uu Maraykanku kula jiro Iiraan. Tani waxay timid maalin kaddib markii Congress-ku meel mariyay qaraar cambaareynaya dagaalkaas.

    Sida Aqalka Cad sheegay, qaybta ugu badan ee lacagtaas, oo gaareysa 67 bilyan oo doolar, waxaa loo qoondeeyay Wasaaradda Difaaca ee Maraykanka.

    Si kastaba ha ahaatee, codsigan ayaa wajahaya caqabado ka jira Congress-ka.

    Arrinta Iiraan ayaa la kulmeysa dhaleeceyn kaga imaanaysa codbixiyeyaasha Maraykanka ka hor doorashooyinka dhexe ee la filayo inay dhacaan bisha Nofeembar, inkastoo xabbad-joojin ay hadda jirto.

    Madaxweynaha Maraykanka, Donald Trump, ayaa sidoo kale khilaaf kala kulmay qaar ka mid ah xubnaha xisbigiisa ee Jamhuuriga arrinta Iiraan, waxaana la soo wariyay inuu dood adag la yeeshay senator maalintii Arbacada.

    Senatorkaasi, Bill Cassidy, oo ka socda gobolka Louisiana, ayaa ka mid ahaa tiro yar oo ka tirsan xisbiga Jamhuuriga oo ka horyimid madaxweynaha Talaadadii, iyagoo u codeeyay qaraar dalbanaya in la joojiyo dagaalka ama in madaxweynuhu oggolaansho ka helo Congress-ka ka hor inta uusan sii wadin tallaabooyinka milatari.

20. 25 Juunyo 2026War deg deg ah, Ciidamada ammaanka Kenya oo xirxiray dad qayb ka ahaa bannaanbaxyada

    Saraakiisha amniga dalka kenya ayaa xiray qaar ka mid ah dadka u ololeeya arrimaha bulshada oo ku sugnaa bannaanka dhismaha Baarlamaanka intii lagu jiray bannaanbaxyada lagu xusayo dhalinyaradoo Gen Z ee ku dhintay mudaharaadyadii looga soo horjeeday Hindise-sharciyeedka Maaliyadda 2024-kii.

    Sidoo kale, ciidamada amniga ayaa lagu arkay meelo kala duwan oo ka tirsan magaalada Nairobi iyagoo kala eryaya dibadbaxayaal isugu soo baxay xuska xubnaha Gen Z ee naftooda ku waayay mudaharaadyadii dalka gilgilay laba sano ka hor.

    Gelitaanka xarunta Baarlamaanka iyo inta badan xaruunta ganacsiga ee Nairobi ayaa la xaddiday, iyadoo waddooyin badan la xiray isla markaana ciidamada amniga si tiro badan loo geeyay goobaha muhiimka ah.