Wiil dhalinyaro ah oo sameyay saabuun sida warqadda oo kale ah

Aniso Maxamed Cabdullaahi waa nin dhalinyaro ah oo sheegay inuu soo saaro oo suuq geeyo saabuun tayo leh oo qaab warqadeed leh. Waxa uu sheegay inuu haysto aqoonsi la siiyay oo lagu siiyay shaqadiisa isla markaana ay aqoonsadeen ha'daha dowladda ee bixiya aqoonsiga.

Aniso ayaa sheegay in saabuuntiisu aysan ahayn oo keliya saabuun warqad u eg, balse ay sidoo kale tahay mid si fudud jeebka loogu qaadan karo, sida warqad oo kale.

Aniso oo ku dhashay magaalada Kaarraa Miele ee degmada Gooroo Guutuu, gobolka Bariga Harargee, ayaa ka qalin-jabiyay Jaamacadda Sayniska iyo Teknoolojiyadda ee Adaama, isagoo bartay farsamada gacanta.

Waxa uu BBC-da uga warramay sida uu u sameeyay saabuunta warqadda u eg iyo waxyaabaha ay kaga duwan tahay saabuunaha kale.

Aniso ayaa sheegay in maadaama saabuunta caadiga ah aysan si fudud jeebka ugu qaadan karin, uu doonayay inuu sameeyo saabuun yar oo si sahlan jeebka ama boorsada loogu qaadan karo.

"Waxa ku jira kiimikooyinka saabuunta oo tayo leh, waana saabuun tayo sare leh oo si fudud loo isticmaali karo," ayuu yiri.

Waxa uu BBC-da u sheegay in saabuuntiisu aysan ka samaysnayn warqad caadi ah, balse loo sameeyo qaab gaar ah oo u eg warqad, iyadoo habka wax-soo-saarkeeduna la mid yahay kan saabuunaha kale.

"Saabuuntani waa mid gaar ah. Sida qofku jeebka uga soo saaran karo warqad, waxaad mid ka mid ah saabuuntan warqadda u eg ku dhex ridi kartaa biyo, kadibna gacmaha ayaad ku dhaqi kartaa," ayuu yiri Aniso.

Waxaan ninkan weydiinay in saabuunta uu sameeyay loogu talagalay dharka, jirka iyo gacmaha, iyo in qof walba isticmaali karo.

"Saabuuntan waxaa loo isticmaalaa in gacmaha lagu dhaqo. Waxa ay kaga duwan tahay saabuumaha kale waa in ay ka samaysan tahay warqad, isla markaana loogu talagalay isticmaalka qofka," ayuu yiri.

Anisoo Maxamed, oo ah dhalinyaro muddo bil ah soo saarayay saabuunta warqadda u eg, ayaa sheegay inuu horey u helay shahaadooyin iyo aqoonsiyo la xiriira samaynta noocyo kale oo saabuun ah.

"Waxaan horey shahaado iyo abaalmarin lacageed uga helay Jaamacadda Haramaya sannadkii 2021, kadib markii aan sameeyay waxa aan ugu yeero hal-abuurka saabuunta," ayuu yiri.

Waxa uu sheegay in saabuunta warqadda u eg ay fududahay in jeebka lagu qaato, isla markaana dadka qaarkood ay dukaamada ka dalbanayaan in la keeno oo la iibiyo.

Anisoo ayaa sheegay in bishii u dambeysay, tan iyo markii uu bilaabay soo saarista saabuunta qaabkan cusub, uu suuqa geliyay ku dhowaad 5,000 oo xabbo.

"Dalabku aad ayuu u badan yahay. Weli dad badan ayaan siinayaa, waxaanan u qaybinayaa suuqyo kala duwan. Dad ayaa taleefan igala soo xiriiraya oo iga codsanaya inaan ugu geeyo saabuunta," ayuu yiri.

Waxa uu sheegay in hadda halka uu ku sugan yahay uu hal xabbo oo saabuunta ah ku iibiyo hal birr, halka baakadka uu ka kooban yahay 20 xabbo.

Mustaqbalka, Anisoo waxa uu sheegay inuu doonayo inuu soo saaro saabuumo ka hortagi kara cudurrada maqaarka ku dhaca.