Hadal uu Trump ka sheegay raysal wasaaraha Talyaaniga oo caro dhaliyay
Xigashada Sawirka, Handout via REUTERS
Madaxweynaha Maraykanka, Donald Trump, ayaa telefishan Talyaani ah u sheegay in Ra'iisul Wasaaraha Talyaaniga, Giorgia Meloni, ay "ka codsatay" inuu sawir la galo. Hadalkaas ka dib, Wasiirka Arrimaha Dibadda ee Talyaaniga ayaa baajiyay safar uu ku tegi lahaa Maraykanka.
Ra'iisul Wasaare Meloni ayaa iyaduna si adag u beenisay hadalka Trump, iyadoo sheegtay in sheekada ah inay "ka baryootantay" sawir ay tahay mid gebi ahaanba la iska sameeyay.
Trump iyo Meloni ayaa toddobaadkan lagu arkay iyagoo si dhow u wada hadlaya shirkii G7 Summit ee ka dhacay Faransiiska. Meloni ayaa markii dambe warfidiyeenka u sheegtay in xiriirkooda uusan wax isbeddel ah ku iman, isla markaana "aysan jirin wax khilaaf ah oo dhacay."
Si kastaba ha ahaatee, wareysi telefoon oo uu siiyay telefishan Talyaani ah, Trump ayaa la sheegay inuu yiri: "Markii aad iga codsatay inaan sawir kula galo, waan ka xumaaday."
Sawirro badan ayaa la baahiyay oo muujinaya labada hoggaamiye iyagoo wada fadhiya, dhoolla-caddaynaya, isla markaana wada sheekaysanaya intii uu socday shirka Faransiiska.
Telefishanka Talyaaniga ayaa sheegay in Trump uu sidoo kale yiri in Meloni laga yaabo inay ku faraxsanayd inuu la hadlay. Si kastaba, telefishanku wuxuu baahiyay oo keliya tarjumaadda Talyaaniga ee hadalkaas, mana soo bandhigin codkii asalka ahaa ee Ingiriisiga.
Xigashada Sawirka, Getty Images
Kadib arrintan, Meloni ayaa barta Instagram uga dirtay ku dhowaad toddobo milyan oo qof oo raacsan fariin muuqaal gaaban ah, iyadoo sheegtay inay aad ula yaabtay hadalka Trump isla markaana aysan rumaysan karin.
Waxay sheegtay in tani aysan ahayn markii ugu horreysay ee dhacdo noocan oo kale ahi dhacdo, iyadoo tiri: "Ma garanayo sababta Madaxweynaha Maraykanku mararka qaar ula dhaqmo saaxiibbadiisa sidan oo kale."
Waxay sii raacisay: "Waxa keliya ee aan oran karo waa in madaxweynuhu aanu sidaas oo kale ugu adkayn cadawga Maraykanka iyo reer Galbeedka; taas beddelkeeda mararka qaar wuxuu u muujiyaa ixtiraam badan, taas oo murugo leh."
"Balse hal arrin ayaan rabaa in la xusuusto: aniga iyo Talyaaniguba waligeen cidna ma baryin."
BBC ayaa codsatay in White House ay ka bixiso faallo ku saabsan arrintan.
Meloni, oo noqotay Ra'iisul Wasaaraha Talyaaniga sannadkii 2022, waxay ahayd hoggaamiyaha keliya ee Yurub ee ka qayb gashay munaasabad la xiriirtay Trump bishii Janaayo 2025. Waqtigaas waxaa la filayay inay noqoto buundo isku xirta hoggaamiyeyaasha Midowga Yurub iyo Madaxweynaha Maraykanka.
Meloni waxay si cad uga soo horjeesatay dagaalkii Maraykanku la galay Iran. Bishii Abriil, Trump ayaa wareysi uu siiyay wargeyska Talyaaniga ee Corriere della Sera ku sheegay: "[Meloni] waxaan u haystay qof geesi ah, laakiin waan khaldamay."
Xigashada Sawirka, Reuters
Warbixinada qotada dheer iyo wararka BBC Somali oo toos kuugu imanaaya WhatsApp.
Halkaan kaga soo biir
Dhamaadka xayeysiinta
Sidoo kale markii Trump uu dhaliilay Pope Leo XIV isagoo ku tilmaamay "mid ku jilicsan dambiyada iyo siyaasad dibadeed oo liidata," Meloni ayaa ka hortimid hadalladaas.
Markii wareysiga Trump la maqlay, Madaxweynaha Talyaaniga, Sergio Mattarella, ayaa si degdeg ah u wacay Meloni si uu ugu muujiyo taageeradiisa. Siyaasiyiin badan oo Talyaani ah ayaa sidoo kale ku dhawaaqay inay garab taagan yihiin ra'iisul wasaaraha.
Filippo Sensi oo ka tirsan xisbiga mucaaradka ee Democratic Party ayaa yiri: "Qofna xaq uma laha inuu Ra'iisul Wasaaraha Talyaaniga kula hadlo kibir iyo qaabkan oo kale."
Sidoo kale Giuseppe Conte, hoggaamiyaha xisbiga Five Star Movement, ayaa sheegay in Talyaanigu aanu mudnayn bahdilaad noocan ah, isla markaana raadinta raalli-gelin ka timaadda Washington aysan khatar gelin karin sharafta iyo danaha qaranka.
Dhanka kale, Lucio Malan oo ah hoggaamiyaha kooxda baarlamaanka ee xisbiga Brothers of Italy ee Meloni, ayaa sheegay in hadalka Trump uu qayb ka yahay weerarro hadal ah oo uu ku hayo hoggaamiyeyaal kala duwan oo Yurub ah, isla markaana ugu dambayn uu dhaawacayo sumcadda iyo awoodda Trump laftiisa.
Malan wuxuu intaas ku daray in muuqaalka laga duubay shirkii G7 uu si weyn uga duwan yahay sawirka uu Trump ka bixiyay dhacdada, isagoo tilmaamay in waxa dhab ahaan ka careysiiyay Trump laga yaabo inay ahayd in Meloni ay diidday codsiyo ka yimid Washington markii ay u aragtay inay lagama maarmaan tahay.
