Bhàsaich 29 duine san tubaist ann an 1994

Bhathas a' coireachadh an dithis phìleat roimhe, airson na tubaiste, anns an do bhàsaich 25 de dh'àrd-eòlaichean tèarainnteachd na Rìoghachd Aonaichte, agus ceathrar den chriutha bho na Feachdan Sònraichte.

Bha an heileacoptair a' siubhal o Èirinn a Tuath gu ruige co-labhairt aig Gearasdan Deòrsa, faisg air Inbhir Nis.

B'e an tubaist as miosa a bh' aig Feachd Rìoghail an Adhair ann an àm na sìthe.

Tha sgrùdadh ùr a chaidh a dhèanamh, a-nis air a ràdh nach b'iad na pìleatan - Flt Lt Jonathan Tapper, à Norfolk, agus Flt Lt Richard Cook, à Hampshire - a dh'adhbharaich an tubaist.

Cho-dhùin an seann bhritheamh, am Morair Philip, a rinn an sgrùdadh ùr gu prìobhaideach còmhla ri triùir neach-poileataigs Albannach, nach robh fianais gu leòr ann a dh'innseadh dè dìreach a dh'adhbharaich an tubaist.

Dh'iarr e gun deadh cur às dhan dìteadh a fhuair an dithis phìleat, agus gum beachdaicheadh an MOD a-rithist air gnothaichean còmhdhail do dh'eòlaichean a tha riatanach do thèarainnteachd na dùthcha.

Thuirt e cuideachd gun robh trioblaidean teignigeach air a bhith ann leis an t-seòrsa Chinook a bha an sàs san tubaist, agus gun robh an RAF fhèin air cùisean-lagha a thogail airson airgid-dìolaidh, as dèidh thrioblaidean.