Suspected bandits threaten Sokoto community wit attack, demand $30,000 to withdraw
Wia dis foto come from, KOLA SULAIMON/AFP via Getty Images
Residents of Kebbe town for Kebbe Local Government Area of Sokoto State Northern Nigeria report say dem dey face fresh security wahala afta suspected bandits demand 40 million naira ($30,000) from di community and threaten to attack di town if dem no pay di money.
Di ultimatum don make fear catch residents of Kebbe town.
Di villagers receive di ultimatum on Tuesday and di bandits dey believed to give dem until weekend, while oda sources from Kebbe say dem get until tomorrow, Friday.
Sources for Kebbe town reveal say di bandits initially give residents five-day ultimatum to raise di money.
According to one source from Kebbe town wey no want make we tok im name, e tell BBC News Pidgin say one resident wey dey travel along one road wey bandits reportedly dey use see dem and run.
E add say di bandits chase am on motorcycles, catch up wit am and surround am, bifor dem give am one phone make e carry am go give di village head.
E say, “Afta dem stop am for road on Tuesday, dem give am phone and tell am make e carry am go give village head, say dem go call. Afta di phone reach di village head representative, dem call and say within di next few days, dem want make dem raise 40 million naira ($30,000) for dem.”
E say dem don already tell di authorities.
End of Di one wey oda users dey read well well
“Di day wey dem call, we carry di phone go police station and tell dem wetin dey happen.”
However, e say up till now, no resident don start to contribute money becos dem know say if dem start to give money, di situation go kontinu to happen.
“For now, we never start to collect any money because we dey fear say for future dem fit come back and tell us say we must give more money again.”
Wia dis foto come from, Getty images
E say di information wey dey reach dem show say di bandits fit enter di town on Friday if dem no give dem di money wey dem demand.
However, e say dem dey try to remain vigilant, even though pipo dey live inside fear for now.
"We no fit do anything but we dey inside fear, as we know dem fit attack our town."
Di source say na recently bandits start to enter Kebbe town. According to di source, dem enter di town last month, August, wia dem kill four soldiers.
Di Sokoto State Police Command spokesperson, DSP Ahmed Rufai, say di command dey aware of di reported threat.
“Di command dey aware of di information and di police command for Sokoto don already start to work on di information,” he tok.
