Ugandans pay tribute to youngest king wey die at 34 as e take final journey home
Wia dis foto come from, Uganda Media Center/AFP via Getty Images
Di funeral of di world youngest traditional monarch, wey die last month, dey go on for Uganda.
Wit tears, plenti crowd come out to pay dia last respect to di Tooro king wey die at di age of 34.
Di late King Oyo Nyimba Kabamba Iguru Rukidi di Fourth go take im final journey home as dem go lay am to rest today for di royal burial grounds of di Tooro Kingdom for western Uganda.
Dem carry di body of di late King Oyo Nyimba Kabamba Iguru Rukidi di Fourth, wey die last month for di age of 34, from Karuzika Palace to St John's Cathedral for Fort Portal.
Thousands of mourners, some dress in white tunics and bark cloth, as well as leaders of cultural institutions and oda dignitaries, don gada for di palace and di cathedral to attend di king final send-off.
King Oyo die for di United States last month, wia e bin dey receive treatment for cancer.
How Uganda dey pay tribute
Di pipo of Tooro Kingdom don dey bid farewell to dia king, Omukama Oyo Nyimba Kabamba Iguru Rukidi IV, wey dem crown at just three years old for 1995.
At about 9:16 a.m. local time, di casket wey carry im body, in di kingdom official yellow colours, comot for Karuziika Palace for Fort Portal for di final time.
Thousands of mourners gada for St. Johns Cathedral, church wey King Oyo grandfather, Omukama Rukidi build III.
Na also dis cathedral wey dem baptize King Oyo.
Na Archbishop of di Church of Uganda, Stephen Kaziimba Mugalu, for St. Johns Cathedral in Fort Portal bin lead di funeral service.
During di service, tributes show King Oyo efforts to promote unity within di Tooro Kingdom.
Di Church of Uganda announce plans to plant 15 million trees as part of celebrations marking 150 years wey Christianity first arrive for di Tooro-Rwenzori region.
Im death don put di kingdom into succession fight, wit im mother and some members of di royal family rejecting di appointment of Edward Rukidi Kijanangoma, a television anchor, as di heir to di throne.
Dem insist say King Oyo son suppose be di rightful successor.
Di issue of di successor go kontinue afta di burial, but di pipo still dey mourn for now.
Following di funeral service, mourners dey expected to waka about 10 kilometres to di royal burial grounds for Karambi.
Upon arrival, di burial ceremony go continue today for private according to traditional royal customs.
Di death of Omukama Oyo end di 31-year reign and close anoda chapter for di long and complex history of di Tooro Kingdom.
During di week, di deadi bodi of di late Omukama of Tooro Kingdom, King Oyo Nyimba Kabamba Iguru Rukidi IV, arrive for Uganda from United States.
President Yoweri Museveni alongside govment officials and family and friends receive di deadi bodi of di 34-year-old king wey arrive for Entebbe Airport on Friday, 4 September.
From Entebbe, di burial programme move into one carefully planned procession wey intend to allow di pipo of Tooro witness di return of dia king.
Family, friends and officials gada for brief prayer for airport bifor di aircraft carry im remains go Uganda.
Di prayers na to ask for safe passage for di late king on im final journey back to di land wey e rule for more dan 30 years.
King Oyo die for Dallas, Texas, on August 27, 2026, afta e battle aggressive brain cancer.
