Ekiti State govnorship election results
Wia dis foto come from, Oluwadare Bejide,Biodun Oyebanji and Wole Oluyede/Facebook
Di Independent National Electoral Commission (Inec) don declare Biodun Oyebanji as di winner of di Ekiti State govnorship election.
Oyebanji wey be di current govnor of di state get total of 319,224 votes to defeat im closest rivals for di poll.
Di ova six hours election no too get drama but tori of some violence and protest dey.
Voting take place across all di 16 local govment areas, 177 wards and 2,445 polling units of di state.
Na 14 govnorship candidates bin contest for di election as Oyebanji first tenure go expire on 15, October 2026.
Di oda contenders na Oluwole Oluyede (PDP), Oluwadare Bejide (ADC), Oyebanji Olajuyin (LP), Blessing Abegunde (NNPP), Samuel Akande (AAC), Ayodeji Ojo (ADP), Opeyemi Felegan (Accord), Joseph Anifowose (APM), Bidemi Awogbemi (APP), Olaniyi Ayodele (PRP), Victor Adetunji (ZLP), Olu Omotosho (AA), and Ayodele Osinkolu (YPP).
Ekiti get 1,059,360 registered voters. However, na only 1,028,929 collect Permanent Voter Cards (PVCs) and dey eligible to participate for di election.
Di election bin serve as litmus test for Inec as dem dey prepare for di 2027 general election.
Dis go be di first major election wey go hold since President Bola Tinubu sign di amended Electoral Act 2026 into law for February.
