په فېسبوک کې د پيغام له امله یې خپله مخکنۍ ښځه ووژله

یوه برتانوي خپله پخوانۍ ښځه له دې امله وژلې، چې پر فېسبوک هغې ليکلي وو چې (له خپل پخواني مېړه څخه کرکه لري.)

۲۹ کلن ادم مان د خپلې مخکنۍ ۳۰ کلنې ښځې لیزا بیفرلي په وژلو کې مخکې له دې چې هغه حلاله کړي، تېشه کارولې وه.

په برتانیا کې یوه څارنوال ویلي چې د بیفزلي پنځه کلن زوی خپله مور "په یوه ویاله کې مړه ومونده ".

دی وایي چې " هغه په ډېرې بې رحمۍ سره وهل شوې او بیا وژل شوې ده."

په برتانیا کې يوې محکمې ښاغلی مان مجرم بللی چې ټاکل شوې، د راتلونکې اکتوبر میاشتې پر څلورمه به د هغه په حق کې پرېکړه وکړي.

مان او بیفرلي په ۲۰۰۷ کال کې له یو بل څخه د خپل زوی د روزلو پر سر د یوې ترخې لفظې شخړې له امله جلا شول.

بیفرلي د برتانیا "د ماشومانو د ملاتړ" له ادارې څخه له خپل پخواني مېړه څخه د زوی د پالنې لګښت ترلاسه کاوه.

بیفرلي تر وژل کېدا دوه ورځې مخکې په فېسبوک کې پر خپلې پاڼې لیکلي وو چې : "موږ د تل لپاره هېر کړه، زه او زوی مې کرکه درنه لرو."

څارنوال ويلي مان د بیفرلي له وژلو څو ساعته مخکې د ماشومانو د ملاتړ له ادارې سره اړیکه نیولې وه، چې ګني پیسې نه لري او خپلې پخوانۍ ښځې ته پیسې نورې نه شي ورکولی.