د تصویرونو البم: کندهار کې د قربانۍ څارویو د پېر او پلور بازار

د افغانستان د نورو سيمو په څېر کندهار کې خلک د لوی اختر له رارسېدو سم د قربانۍ لپاره څاروي پېري او پلوري. لوی اختر، چې د قربانۍ اختر په نوم هم یادېږي، د اسلام له مهمو مذهبي لمانځنو څخه دی. د دې اختر پر مهال مسلمانان قرباني کوي او غوښه یې پر کورنۍ، دوستانو او اړمنو کسانو وېشي.

په بازارونو کې خلک د قربانۍ څاروي د عمر معلومولو لپاره د څاروي غاښونه ګوري، ځکه د اسلامي اصولو له مخې د قربانۍ څاروی باید ټاکلي عمر ته رسېدلی وي. همداراز څاروي باید روغ، تکړه او له ښکاره عیبونو پاک وي.

هر کال په نړۍ کې سلګونه میلیونه مسلمانان د لوی اختر پر مهال قرباني ترسره کوي. د نړۍ د شاوخوا دوه میلیارده مسلمانانو له ډلې هغه کسان چې مالي وس او توان ولري، قرباني کوي. په ډېرو اسلامي هېوادونو کې میلیونونه پسونه، غواګانې او اوښان د اختر په ورځو کې حلالېږي.

ویل کېږي چې د خیریه بنسټونو او مرستندویه ادارو له لارې هر کال میلیونونه کورنیو ته د قربانۍ غوښه رسېږي، او د قربانۍ دا لړۍ د نړۍ له سترو کلنیو خوراکي مرستو شمېرل کېږي.