کرېکټ: افغانستان په دويمه شل اوريزه لوبه کې له هند سره مخامخېږي

د افغانستان او هند تر منځ د شل اوريزو لوبو د لړۍ دويمه لوبه نن سې شنبې (۱۵ سپټمبر) په ډيلي کې ترسره کېږي. دغه لوبه چې د افغانستان په کوربتوب کېږي، ټاکل شوې، د افغانستان پر وخت د ماښام پر ۶:۳۰ بجو پيل شي.

د دواړو هېوادونو تر منځ د شل اوريزو لوبو د لړۍ لومړۍ لوبه هند په ۱۴ اور کې د اوو وېکټو په لوی توپیر ګټلې وه.

په تېره لوبه کې د افغانستان لپاره عظمت الله عمرزي تر ټولو ډېرې (۶۴) منډې کړې وې او ناسوځېدلی پاتې شوی و. د ده تر څنګ محمد نبي ۳۳ منډې جوړې کړې وې. له دغو دواړو لوبغاړو پرته بل کوم لوبغاړي د پام وړ منډې نه وې جوړې کړې او یو پر بل پسې ژر ژر سوځېدلي وو.

له لوبې وروسته د افغانستان کرېکټ روزونکي رېچرډ پايبس ويلي وو، "موږ بنسټيزې تېروتنې وکړې، هغوی ته به له سره کتنه وکړو... بايد په خپلو بنسټيزو چارو کې ډېر دقیق واوسو."

همدا ډول افغان لوبډلمشر ابراهيم ځدراڼ هم وویل، "دا له اوږدې مودې وروسته زموږ لومړي لوبه وه، وروستی ځل مو په فبرورۍ کې د نړيوال جام پر مهال شل اوريزه لوبه کړې وه او دلته زموږ چمتووالی د باران له کبله اغېزمن شوی و".

خو که دواړو لوبډلو ته وکتل شي، هند د کرېکټ اوږد تاریخ لري او څو ځله یې نړيوال جامونه هم ګټلې دي، بل پلو د افغانستان کرېکټ نوی د راغوړېدو په حال کې دی او په دې وروستيو کې یې په نړيواله کچه د ډېرو پام ځانته را اړولی دی.

د هند کرېکټ بورډ وايي د افغانستان پر وړاندې پاتې دوو شل اويزو لوبو کې به ورو توپ اچوونکی ورون چکرورتي د ټپي کېدو له کبله ګډون ونکړي. دوی وايي، دا لنډمهاله دمه ده چې تمه کېږي نوموړی به اسیايي لوبو کې ګډون وکړي چې د همدې مياشتې پر ۲۴ پیلېږي.

هند لا د هغه ځايناستی په رسمي ډول نه دی اعلان کړی خو روي بېشنوی او واشنګټن سوندر یې ځای نيولی شي.

ټاکل شوې د افغانستان او هند تر منځ د لوبلړۍ وروستۍ لوبه د سپټمبر پر ۱۷ نېټه ترسره شي.

دغې لوبلړۍ ته د "دوستۍ جام" نوم ورکړل شوی او ټولې تخنیکي چارې د افغانستان کرېکټ بورډ پر غاړه دي.

د تلویزیوني نشراتو حقوق هم د افغانستان کرېکټ بورډ سره دي او د افغانستان او هند سربېره په پاکستان، اسټرالیا، شمالي امریکا، بریتانیا، اروپا او افریقا کې ځيني تلویزیوني چینلونو یې د خپریدو حق اخیستی دی.