د پاکستان پوځ: د خیبرپښتونخوا هنګو کې یو پوځي افسر او ۷ وسلهوال وژل شوي
د عکس سرچینه، OfficialDGISPR
د پاکستان پوځ وايي، د خیبر پښتونخوا په هنګو کې د عملیاتو پر مهال نښته کې ۷ وسلهوال او د پوځ یو افسر وژل شوی دی.
د پوځ د مطبوعاتو او عامه اړیکو دفتر نن سهار پر خپله اېکس پاڼه یوه خپاره کړي بیان کې ویلي، چې دغه عملیات پرون جمعه د وسلهوالو د حضور په تړاو د استخباراتي اطلاعاتو پر بنسټ وشول، خو وسلهوالو په یوه جومات کې پناه واخیسته او له ورغلو امنیتي ځواکونو سره یې نښته پیل کړه.
ایاېسپيار وژل شوي وسلهوال د پاکستاني طالبانو تحریک (ټيټيپي) غړي بللي، چې د پاکستان پوځ او حکومت یې فتنه الخوارج بولي.
بیان کې زیاته شوې د ډزو په تبادله کې وژل شوی افسر، چې د خپلې ډلګۍ مشري یې کوله، تورن حمزه اکرم نومېږي، ۲۷ کلن او د پنجاب د نارووال اصلي اوسېدونکی دی.
ایاېسپيار وايي، په سیمه کې چاڼیز عملیات لا روان دي، چې د نورو وسلهوالو د حضور له اړخه ډاډ ترلاسه شي.
شاوخوا یوه اوونۍ مخکې همدلته په هنګو کې د پولیسو د خزینې بانډې پر پوستې په وسلهوال برید او ورپسې د عملیاتو پر مهال نښته کې د یوه افسر (ډي اېس پي) په ګډون لږترلږه لس پولیس وژل شوي او ۱۸ نور ټپیان شوي وو.
د عکس سرچینه، Getty Images
د یادونې ده چې له څه مودې راهیسې په خیبرپښتونخوا او بلوچستان کې امنیتي پېښې پام وړ ډېرې شوې دي.
تېره اوونۍ د سوات په کبل کې د پولیسو د تاڼې مخې ته ځانمرګي برید د اوو پولیسو په ګډون ۱۷ کسان وژلي وو.
څو ورځې ورمخکې د ټانک سیمې پر مانجي خېل امنيتي پوسته د وسله والو په بريد کې د ۱۲ پوځيانو په ګډون ۱۵ تنه وژل شوي دي.
د پاکستان تېره اوونۍ اعلان وکړ چې د روان کال له پیل راهیسې په وسلهوالو بریدونو او ورپسې پوځي عملیاتو کې ۸۱۹ امنیتي سرتېري او ملکي وګړي وژل شوي دي.
د یادونې ده، له پاکستانه نږدې هره ورځ د پوځي عملیاتو او د وسلهوالو د وژلو رپوټونه هم خپرېږي.
د پاکستان پوځ تېره او وړمه ورځ په دوو اعلامیو کې ادعا کړې وه، د خیبر پښتونخوا په سویلي وزیرستان او دیر او د بلوچستان په واشک او مسټونګ ولسوالیو کې په جلا جلا نښتو او عملیاتو کې ۲۲ وسلهوال وژل شوي دي.
پاکستان کې دغه هېواد کې ګڼو امنیتي پېښو ته د پاکستاني طالبانو تحریک سره تړاو ور کوي او وايي دغه وسلهوال په افغانستان کې مرکزونه او ملاتړي لري.
خو د طالبانو حکومت دغه تورونه ردوي او پاکستان کې امنیتي پېښې د دغه هېواد کورنۍ مسله ګڼي.
