Ташиевдин адвокаты Бишкек шаардык судьяларынын үстүнөн Башкы прокуратурага кайрылды

УКМКнын мурдагы башчысы, төрт жылга соттолгон Камчыбек Ташиевдин адвокаты Икрамидин Айткулов Бишкек шаардык сотунун чечиминин мыйзамдуулугун текшерүүнү сурап, Башкы прокуратурага кайрылды.

Адвокаттын 14-сентябрда башкы прокурор Малик Бектургановдун атына жазган арызында апелляциялык сот Ташиевди ага мурда коюлбаган айып боюнча күнөөлүү деп тапкан деген жүйө келтирилет. Айткуловдун пикиринде, бул жагдайга өзүнчө укуктук баа берилиши керек.

Бишкек шаардык сотунун апелляциялык коллегиясы буга чейин Ташиевдин жана башка соттолгондордун аракеттерин Кылмыш-жаза кодексинин 195-беренесине - "шайлоо укуктарын ишке ашырууга тоскоолдук кылуу" беренесине кайра квалификациялап, аларды ушул кылмыш боюнча күнөөлүү деп тапкан.

Адвокаттын айтымында, Ташиевге буга чейин "бийликти күч менен басып алууга даярдануу" боюнча айып коюлган жана соттун биринчи инстанциясында ал ушул айып боюнча коргонгон.

Айткулов апелляциялык сотто 195-берене боюнча айып коюлушу мүмкүн экени Ташиевге жана анын жактоочуларына алдын ала айтылбаганын белгилейт.

Анын билдиришинче, коргоо тарабы бул беренеге байланыштуу далилдерди келтирүүгө, өтүнүчтөрдү берүүгө жана өз позициясын даярдоого мүмкүнчүлүк алган эмес.

"Ташиев жана анын жактоочулары мындай айып тууралуу биринчи жолу соттук акты жарыяланганда билишкен", - деп жазат адвокат арызында.

Айткуловдун пикиринде, бул жөн гана кылмыш беренесин техникалык жактан өзгөртүү эмес. Анткени бийликти күч менен басып алууга даярдануу менен шайлоо укуктарын ишке ашырууга тоскоолдук кылуу - курамы жана далилденүүгө тийиш жагдайлары боюнча айырмаланган кылмыштар.

Адвокат Башкы прокуратурадан апелляциялык соттун чечимине байланыштуу жагдайларды текшерүүнү, соттук отурумдардын аудио жана видео жазмаларын, протоколдорун, биринчи жана апелляциялык инстанциялардын соттук актыларын изилдөөнү сураган.

Ошондой эле ал соттук коллегиянын аракеттеринде атайылап мыйзамсыз соттук акт чыгаруу жана адвокаттардын мыйзамдуу кесиптик ишмердигине тоскоолдук кылуу белгилери бар-жогун аныктоону өтүнгөн.

10-сентябрда Бишкек шаардык сотунун судья Адис Момуналиев төрагалык кылган коллегиясы "75чилердин каты" деген ат менен белгилүү болгон кылмыш иши боюнча айыпталган сегиз кишини төрт жылдан эркинен ажыратып, эки жылдык пробация колдонгон.

Соттук коллегия "Бийликти күч менен басып алууга аракет кылуу" беренесин "Шайлоо укуктарын жүзөгө ашырууга тоскоолдук кылуу" беренесине алмаштыруу менен өкүм чыгарган. Сегиз кишиге "Шайлоо укуктарын жүзөгө ашырууга тоскоолдук кылуу" беренеси боюнча өкүм чыгышы коомдо талкуу жараткан.

Бишкек шаардык соту бул иш боюнча апелляциялык арыздарды 10-августта карай баштаган. Буга чейин, 2-июлда Бишкектин Биринчи май райондук соту сегиз айыпталуучуну "Бийликти күч менен басып алууга" байланыштуу берене боюнча күнөөлүү деп таап, төрт жылдан эркинен ажыраткан. Сот алардын ар бирине мүлкүн конфискациялоо жазасын да белгилеген.

Бирок сот үч жылдык пробациялык көзөмөл колдонуп, аларды камакка алган эмес. Ошондой эле айыпталуучулар "Кызмат абалын кыянаттык менен пайдалануу" беренеси боюнча акталган.

Соттолгон сегиз адам райондук соттун өкүмүнө каршы Бишкек шаардык сотуна апелляциялык арыз берген. Башкы прокуратура да өкүмгө байланыштуу апелляциялык арыз менен кайрылган.

2026-жылдын 9-февралында мурдагы премьер-министрлер, депутаттар, саясатчылар жана коомдук ишмерлерди камтыган 75 адам президент Садыр Жапаровго жана ошол кездеги Жогорку Кеңештин төрагасы Нурланбек Тургунбек уулуна кайрылуу жолдоп, мөөнөтүнөн мурда президенттик шайлоо өткөрүүгө чакырышкан.

Андан соң кайрылууга байланыштуу кылмыш иши козголуп, сегиз адамга "Бийликти күч менен басып алуу" жана "Кызмат абалын кыянаттык менен пайдалануу" беренелери боюнча айып тагылган.

Ички иштер министрлиги алардын аракеттери өлкөдө туруксуздук жаратууга багытталган деп билдирген.

Ушундан кийин УКМК төрагасы Камчыбек Ташиев кызматтан алынган.

"75чилердин каты" иши боюнча сегиз киши айыпталган. Алар: мурдагы УКМК төрагасы Камчыбек Ташиев, мурдагы башкы прокурор жана экс-депутат Курманкул Зулушев, Жогорку Кеңештин мурдагы төрагасы Нурланбек Тургунбек уулу, мурдагы айыл чарба министри Бекболот Талгарбеков, мурдагы элчи жана министр Эмилбек Узакбаев, мурдагы ички иштер министри Курсан Асанов, мурдагы депутаттар Курманбек Дыйканбаев жана Аалы Карашев.

Айыпталуучулар өздөрүнө коюлган кинелерди четке кагып, күнөөсүз экенин билдирип келишет.