Abubuwan da ke faruwa a Najeriya da sassan duniya

Rahoto kai-tsaye

Nabeela Mukhtar Uba

1. Sa'o'i 2 da suka wuceHare-haren jirage marassa matuƙa sun faɗa Otal a yankin Tigray

   Mazauna da ma’aikatan agaji a garin Adwa na yankin Tigray sun ce hare-haren jiragen sama marasa matuƙa da dama da aka kai a garin Adwa da ke tsakiyar yankin Tigray sun yi sanadin mutuwar fararen hula tare da lalata otal-otal da wuraren kasuwanci.

   A cewar mazauna garin da suka zanta da BBC Tigrigna, hare-haren guda huɗu da aka kai a ƙarshen daren Asabar sun afkawa Otal ɗin Segen da kewaye, inda suka kashe mutum 11. Shaidu sun ce mutum tara sun mutu nan take, yayin da wasu biyu suka rasu a asibiti sakamakon raunukan da suka samu. Hudu daga cikin waɗanda suka mutu mata ne.

   Wani ma’aikacin Otal ɗin Segen mai suna Zerit Assefa ya bayyana harin a matsayin mai matuƙar muni, yana cewa an harbi wata mota da ke ajiye a harabar otal ɗin, lamarin da ya kashe masu mashaya da kuma wasu da ke haya a ƙarƙashin ginin.

   “Harin ya zo ne ba zato ba tsammani, kuma ya tayar da hankali matuƙa. Mun ga gawarwakin da idanunmu,” in ji shi, yana mai ƙara da cewa yanzu otal ɗin ba ya aiki.

   Kamfanin dillancin labarai na Reuters ya ruwaito cewa mutum tara sun mutu a Adwa, tare da ambato ma’aikatan agaji da suka tabbatar da mutuwar wasu mutum takwas a wani hari da aka kai sansanin ’yan gudun hijira a Sheraro, wanda ya sa adadin waɗanda suka mutu ya kai 17. Reuters ya ce bai samu damar tantance ko su wa suka kai hare-haren ta sama ba.

   Shaidu sun kuma ce an kai hare-hare kan Otal ɗin Shewit International da kuma Pan Africa Hotel a Adwa a yammacin ranar Asabar.

   Wata mai sayar da kofi a yankin mai suna Leya Grimay ta ce firgici ya bazu a faɗin garin yayin da shaguna suka rufe, tituna kuma suka yi tsit. Ta ce an yi mummunar barna ga gine-ginen otal-otal ɗin, amma ba a samu rahoton rasa rai ba.

   Manajan Otal ɗin Shewit ya tabbatar wa BBC cewa an kai harin, sai dai ya ƙi bayar da ƙarin bayani.

   BBC ba ta samu damar tabbatar da inda hare-haren jiragen marasa matuƙa suka fito ba, ko adadin waɗanda aka ce sun mutu, ko kuma tantance waɗanda suka rasa rayukansu.

   A birnin Mekelle, hedikwatar yankin Tigray, inda dakarun gwamnati suka shiga ba tare da fuskantar turjiya ba a makon da ya gabata, mazauna yankin sun ce rayuwa na ci gaba da komawa yadda take a hankali, inda shaguna ke buɗewa, sannan an dawo da ayyukan wayar salula da intanet bayan katsewar da ta shafe mako guda.

   Sai dai mazauna yankin sun shaida wa BBC cewa har yanzu akwai fargaba a tsakanin jama’a.

   Mazauna yankin Gabashin Tigray, waɗanda suka ce sun ga yadda dakarun Tigray ke sake shirya kansu a kusa da garin Wukro, sun bayyana damuwa kan yiwuwar barkewar sabon rikici.

   Bayan arangamar soji da aka yi a kudancin yankin Tigray tun daga ranar 23 ga Satumba, gwamnatin Tigray karkashin jagorancin TPLF ta sanar da cewa za ta ci gaba da gwagwarmayar makami a wajen birnin Mekelle.

2. Sa'o'i 2 da suka wuceYara 1,900 Ebola ta raba da iyaye ko danginsu a DR Congo

   Asusun kula da kananan yara na MDD UNICEF ya ce akalla yara 1,900 marayu ko wadanda aka raba da iyayensu ko masu kula da su a jamhuriyar Dimukradiyyar Congo, tun bayan ɓarkewar cutar Ebola a ƙasar a watan Mayun shekarar nan.

   A sanarwar da UNICEF ta fitar a ranar Talata, ta ce yara 1,903 sun rasa ko dai ɗaya daga cikin iyayensu ko duka biyun, ko an raba su da danginsu sakamakon annobar cutar.

   Mafi yawa daga ciki sun fito ne daga yankin Uturi, da wasu daruruwan a arewacin Kivu. Asusun ya yi gargadin adadin yaran ka iya fin haka, kasancewar babu cikakkiyar gididdigar adadinsu a wasu yankunan ƙasar masu wuyar zuwa.

   Daraktar shirin gaggawa na UNICEF's Lucia Elmi, ta ce Ebola ka iya janyo tarin matsalolin da ke barin yara cikin tashin hankali da rashin kulawa da hakan ka iya jefa lafiyarsu cikin hatsarin kamuwa da Ebolar.

   Ta kara da cewa akalla yara 214 ne ke gararanba akan tituna ko aikin karfi a Bunia, da suke bukatar tallafin gaggawa. Yaran da ke gararanba ba tare da kulawar wani ba na cikin hadarin rashin gano su bare a duba lafiyarsu da ba su kariya daga kamuwa da cututtuka ciki har da Ebolar.

   UNICEF ya ce kididdigar ma'aikatar Lafiya ta nuna sama da yara 2,000 ne suka kamu da Ebola a karshen watan Satumba da ya wuce, wasu sama da 1,100 sun rasa rayukansu.

   Yara su ne kusan kashi daya cikin ukun masu cutar, sai kuma wasu kusan kashi daya da suka rasu.

   Ɓarkewar cutar a baya-bayan nan na yaduwa kamar wutar daji, inda wasu ke alaƙanta hakan da tashin hankalin da ke faruwa da ya raba mutane da muhallansu a Jamhuriyar Dimukradiyyar Congo.

   Kusan mutum 4.4 ne suka rasa matsugunansu a Congo, inda taɓarɓarewar tsaro da rashin amince ya sanya ba a nasara a yaƙi da Ebola.

   UNICEF dai na taimakawa yara a cibiyoyin da aka kafa a kusa da inda ake yi wa ma su cutar magani.

   Sai dai asusun ya ce ya na buƙatar ƙarin kuɗaɗen da suka kai dala miliyan 113.4 na kula da masu cutar Ebola a Congo.

   Amma kawo yanzu miliyan 40.1 kaɗai suka samu, hakan kuma babban giɓi ne a ƙoƙarin da ake yi na yin magani da kare yaran daga Ebola.

3. Sa'o'i 3 da suka wuceAbin da ya hana Tijjani Gandu amsa gayyatar mu - Hukumar fina-finan Kano

   Hukumar tace fina-finai da ɗab'i ta jihar Kano ta yi karin haske kan gayyatar da ta yi wa mawaƙi Tijjani Gandu dangane da wata waƙa da ya saki wadda ake zargin ta saɓa wa dokar da ta kafa Hukumar.

   Hukumar ta ce ta karɓi rahoton da ke ɗauke da bayanan rashin lafiyar mawaki Tijjani Gandu ta hannun lauyansa, wanda ya gabatar a matsayin dalilin rashin halartar gayyatar da ta yi masa a lokacin da aka tsara.

   Bayan jami’an lafiya sun tabbatar da ingancin rahoton, Hukumar ta gamsu da bayanan da aka gabatar, tare da amincewa da rashin lafiyar a matsayin sahihin dalilin da ya sa mawaƙin bai samu damar amsa gayyatar ba.

   Haka kuma, Hukumar ta bayyana cewa za ta ci gaba da sa ido kan mawaƙi Tijjani Gandu har zuwa lokacin da zai samu lafiya, domin tabbatar da dokar da ta kafa Hukumar Tace Fina-Finai da Ɗab'i ta Jihar Kano.

4. Sa'o'i 3 da suka wuceAbin da suka kamata ku sani kan jirgin sojin Najeriya da ya faɗi

   Rundunar sojin saman Najeriya ta saki sunayen mutum 25 da ta ce su ne suka rasa rayukansu sakamakon hatsarin jirgi mai saukar ungulu da ya faru ranar Litinin a jihar Ondo.

   Hukumomi sun ce jirgin yana kan wani aiki ne na yau da kullun daga Benin zuwa Legas lokacin da ya faɗi kusa da sansanin sojojin ruwa a safiyar Litinin.

5. Sa'o'i 4 da suka wuceJirgi maras matuƙi ya kashe fararen hula a yankin Tigray

   Mazauna garin Adwa da ke tsakiyar yankin Tigray da ma'aikatan sa kai sun ce an kai munanan hare-haren jirage marassa matuƙa garin da ya fada kan farar hula da ajalin mutane da dama da lalata otal-otal da wuraren kasuwanci.

   Wani ganau ya shaidawa sashen Tigrigna na BBC, cewa hudu dga cikin harin an kai su ne a daren ranar Asabar da suka fada kan Otal din Segen kuma sun faɗa kan mutum 11, 9 daga ciki sun rasu nan take, ya yin da sauran ke asibiti.

   Cikinsu akwai mata huɗu, kamar yadda Zerit Assefa ma'aikaciyar Otal din ta bayyana. Ta bayyana harin da mai muni da shaida yadda wani bam ya faɗa kan wata mota, da mashayar otal din da wurin ajiyar motocin haya.

   Wasu ganau na daban sun bayyana yadda suka ga gawawwaki a barbaje a ƙasa kuma Otal din ya lalace baki ɗaya.

   Shi ma kamfanin dillancin labarai na Reuters ya bada rahoton mutuwar mutum 9 a garin na Adwa, kuma wasu ma'aikatan sa kai sun bayya mutuwar wasu iyalai a sansanin ƴan gudun hijira na Sheraro, abin da ya kai adadin waɗanda suka rasu zuwa 17.

6. Sa'o'i 5 da suka wuceƳansandan Faransa sun jefawa masu zanga-zanga hayaki mai sa hawaye

   Ƴansanda a Faransa sun yi amfani da hayaki mai sa hawaye a birnin Faris da Marseille domin tarwatsa masu zanga-zanga kan sauyi a fannin ilimin ƙasar.

   Wakilin BBC da ke wurin ya tabbar da aukuwar lamarin inda ya ce hayakin ya shiga har maogwaro da idanun shi.

   Haka ma a Strasbourg, da ke arewa masu gabashin Faransa, an yi ta jefawa masu zanga-zanagr hayaki mai sa hawayen amma su na dauka tre da maida shi ga ƴansanda.

   Kafafen yaɗa labaran Faransa na rawaito nan gaba a yau ake sa ran Shugaba Emmanuel Macron zai gana da ministocin gwamnati a fadar Élysée.

   Ana sa ran cikin mau halartar taron akwai Firai Ministan ƙasar Sébastien Lecornu, da Ministan Ilimi Édouard Geffray, da Ministan cikin gida Laurent Nuñez.

7. Sa'o'i 6 da suka wuceShettima ya tafi taron inganta abinci mai gina jiki a Habasha

   Mataimakin shugaban Najeriya Sanata Kashim Shettima, ya yi balaguro zuwa ƙasar Habasha domin halartar taron gwamnatocin ƙasashen biyu kan bunkasa abinci mai gina jiki.

   Wannan na kunshe cikin sanarwar da mataimaki na musamman kan harkokin yada labarai Mr Stanley Nkwocha ya fitar a ranar Talata.

   Nkwocha ya ce Shettima na halartar taron ne ƙarkashin goron gayyatar mataimakin Firai Ministan Habasha, Temesgen Tiruneh.

   Haka kuma mataimakin shugaban Najeriyar zai gana da masu ruwa da tsaki a fannin cimaka da kaddamar da shirin tsakanin Najeriya da Habasha.

   Wannan na zuwa ne a daidai lokacin da ake nuna damuwa kan tasirin sauyin yanayi kan amfanin gona, da a wasu lokutan ake samun jinkirin girbi da rashin kyawun yabanya.

8. Sa'o'i 7 da suka wuce'A bar kowa ya yi bautar ƙasa a jiharsa ta asali'

   Shugaban ƙwamitin amintattu na Ƙungiyar Iyaye da Malamai ta ƙasa (NAPTAN), Adeolu Ogunbanjo, ya bukaci gwamnatin Najeriya da sake nazari da duban tsanaki kan shirinta na yi wa ƙasa hidima bayan kammala karatun digiri.

   Ogunbanjo ya bayyana haka ne a hira da kamfanin dillancin labarai na NAN a ranar Talata a birnin Lagas.

   Ya ƙara da cewa biyo bayan harin da ƴan bindiga suka kai wa motocin bas da ke ɗauke da dalibai masu shirin fara hidimar ƙasa da wasu fasinjoji kan babbar hanyar Owerri zuwa Onitshaa kusa da Umunoha a ƙaramar hukumar Mbaitoli a jihar Imo, tare da garkuwa da su.

   Ƴan bindigar sun yi awon gaba da masu bautar ƙasar da fasinjoji, inda ya ce abin damuwa ne da tashin hankali, ba ga iyaye ko ƴanuwan wadanda akai garkuwar da su kaɗai ba har ƴan Najeriya.

   Sakamakon matsalar tsaron da ake fama da ita a Najeriyr, bai kamata a dinga barin ɗalibai na niƙar gari da tafiya mai nisa kamar haka ba.

   A ƙarƙare da kiran a bari kowa ya yi bautar ƙasa a jiharsa ta asali, ba don matsalar tsaron kadai ba har da rahin wadatar abin hannu da wasu iyayen ke fama da shi.

9. Sa'o'i 7 da suka wuceMutum 12 sun jikkata bayan hari kan jirgi a mashigar Hormuz

   Gwamnatin Indiya ta ce mutum 12 daga cikin ma’aikatan jirgin dakon mai na MT Peace sun jikkata bayan wani hari da makami mai linzami ya afka wa jirgin yayin da yake ratsa mashigar Hormuz a ranar Talata.

   Ma’aikatar harkokin wajen Indiya ta ce daga cikin ma’aikatan jirgin 19, mutum 17 ƴan Indiya ne.

   Indiya ta ce an kai wa jirgin harin ne a mashigar Hormuz, tare da yin Allah wadai da lamarin.

   Ƙasar ta ƙara da cewa mutum 11 daga cikin waɗanda suka jikkata ’yan ƙasar Indiya ne.

   Hukumomin Oman sun taimaka wajen kwashe waɗanda suka samu raunuka daga jirgin, inda aka kai su birnin Khasab na ƙasar domin samun kulawa a asibiti.

   Indiya na daga cikin manyan ƙasashen da ke samar da ma’aikata ga jiragen ruwa na kasuwanci a duniya.

   Tun bayan fara yaƙin Gabas ta Tsakiya, wasu matuƙan jirgin ruwan Indiya sun rasa rayukansu a hare-haren da aka kai a mashigar Hormuz.

10. Sa'o'i 7 da suka wuceAn kama ƴan adawa a Indiya kan bukatar ƙwamishinan zabe ya yi murabus

    Ƴan sanda a birnin Delhi na Indiya na tsare da yawancin ƴan majalisa ɓangaren ƴan adawa, da sukai ƙokarin macin buƙatar ƙwamishinan zaɓen ƙasar ya ya murabus kan wata danbarwa da ta shafi zaɓen.

    An tilastawa jagoran ƴan adawa Rahul Gandhi, da kanwarsa Priyanka da wasu ƴan adawa shiga motar ƴan sanda. Daga bisani an sake su, kuma suka ci gaba da macin da suka fara na zaman dirshan a kusa da shalkwatar hukumar zaben ƙasar.

    Wannan ce danbarwa ta baya-bayan nan da ta shafi hukumar zaɓen Indiya, kan zarge-zarge da dama.

    Jam'iyyun adawa na kiran shugaban hukumar Gyanesh Kumar ya yi murabus, kan zargin nuna ɓangaranci da nuna fifiko ga jam'iyyar Firai Minista Narendra Modi ta Bharatiya Janata Party, wani zargi da BJP da hukumar zaɓen suka musanta.

11. Sa'o'i 8 da suka wuceEbola ta hallaka mutum na farko a Kenya

    Ƙasar Kenya ta tabbatar da mutum na farko da ya kamu da cutar Ebola, mutumin da ke zaune a Jamhuriyar Dimukradiyyar Congo sama da shekaru 7.

    Ministan lafiya Aden Duale, ya ce a watan da ya gabata ne mutumin ya fara rashin lafiya an kuma yi ma sa magani a asibitoci daban-daban a Congo, kuma ya rasu kwanaki kaɗan bayan isarsa birnin, Nairobi.

    Duale ya ƙara da cewa maras lafiyar ya isa kasar ta jirgi a ranar Asabar, an yi masa dukkan binciken da ake yi wa matafiya a filin jirgin sama, kafin daga bisani ƴan uwansa su kai shi asibiti.

    Sama da mutum 4,000 cutar Ebola ta yi ajali a Jamhuriyar Dimukradiyyar Congo a shekarar nan, a wani abu da hukumar lafiya ta duniya WHO ta ce wannan ne ɓarkewar cutar mafi muni da aka gani.

12. Sa'o'i 9 da suka wuceAn shiga kwana 100 kafin babban zaɓen shugaban ƙasa a Najeriya

    Najeriya ta shiga kwanaki 100 kafin babban zaɓen shugaban ƙasa na 2027, inda Hukumar Zaɓe Mai Zaman Kanta ta Ƙasa (INEC) ta bayyana sabon kundin masu zaɓe da aka faɗaɗa, tare da shirye-shiryen amfani da sabbin fasahohi domin ƙara inganta sahihancin zaɓen.

    A wani taron masu ruwa da tsaki na ƙasa da taron manema labarai da aka gudanar a Abuja yau Talata, shugaban INEC, Farfesa Joash Amupitan, ya sanar cewa adadin mutanen da ke cikin Kundin Masu Zaɓen ya haura miliyan 103, bayan kammala aikin rajistar masu zaɓen mai mataki uku da kuma tantance bayanan masu zaɓen.

    Wannan adadi ya nuna ƙarin masu zaɓe kusan miliyan 10, idan aka kwatanta da sama da mutum miliyan 93 da suka yi rajista a babban zaɓen 2023. A aikin rajistar baya-bayan nan kaɗai, sabbin masu zaɓe 10,772,421 ne suka yi rajista, waɗanda ke jiran tantancewar ƙarshe ta tsarin tantance bayanan masu zaɓe daga INEC.

    Jihar Lagos ce ke da mafi yawan masu rajistar zaɓen inda take da kimanin miliyan bakwai, sai Kano mai miliyan shida. Kaduna na da kimanin miliyan huɗu, yayin da jihohin Katsina, Rivers, Oyo, Delta, Benue, Ogun da Bauchi ke da kimanin masu zaɓe miliyan uku kowannensu, a cewar alkaluman INEC.

    A ranar Juma’a 9 ga watan da muke ciki na Oktoba ne za a fara rabon katunan zaɓe na dindindin (PVC) a faɗin ƙasar inda hukumar ke kira ga masu zaɓe su karɓi katunansu a kan lokaci.

    Domin tafiyar da zaɓen da yawan masu kaɗa ƙuri’a ya ƙaru, Amupitan ya ce INEC ta sayi sabbin na’urorin tantance masu zaɓe 57,000. Haka kuma, an inganta manhajojin da ake da su.

    Shugaban INEC ya kuma bayyana cewa jam’iyyun siyasa 18 ne za su fafata a zaɓen shugaban ƙasar, inda hukumar ta sanya ’yan takarar shugaban ƙasa 18 a jerin ƴantakarar da ta amincewa su shiga zaɓen da ke ƙunshe da, maza 16 da mata biyu.

    Ya ce hukumar ta kuma wallafa sunayen ’yan takarar gwamna da mataimakansu domin zaɓen gwamnoni da za a gudanar ranar 6 ga Fabrairun 2027.

    Hukumar za ta kuma fara amfani da wani ingantaccen tsarin aika sakamakon zaɓe ta intanet, wanda zai mayar da takardun sakamakon zaɓe zuwa tsarin dijital, ya tabbatar da sahihancinsu, sannan ya tura su zuwa shafin tattara sakamakon zaɓe na IReV.

    INEC ta ce tana aiki tare da ƙwararrun kamfanonin fasaha na ƙasashen waje kan amfani da fasahar AI wajen gano kurakurai ko abubuwan da ba su dace ba, da kuma inganta tsaron intanet.

    A cewar hukumar, manufar ita ce ƙarfafa tantance masu zaɓe da aika sakamakon zaɓe, rage damar yin maguɗi, da kuma hanzarta sanar da sakamakon zaɓe. Hukumar tana kuma son tabbatar da cewa an fara kaɗa ƙuri’a a rumfunan zaɓe a lokaci guda.

    Sai dai burin amfani da waɗannan fasahohi na haifar da shakku, musamman ganin cewa zaɓen zai shafi masu rajista sama da miliyan 100.

    ’Yan Najeriya da dama na son sanin yadda INEC za ta rarraba dubban na’urorin BVAS da tura ma’aikatan zaɓe a faɗin ƙasar, tare da tabbatar da cewa an buɗe rumfunan zaɓe a kan lokaci.

    Babban abin damuwa kuma shi ne yadda za a gudanar da zaɓen a yankunan da ke fama da rashin tsaro, Rashin kyawun hanyoyi, ƙarancin wutar lantarki ko raunin hanyoyin sadarwa. Akwai kuma tambayar matakan da hukumar za ta ɗauka idan sabbin tsare-tsaren dijital suka samu matsala a ranar zaɓe.

13. 6 Oktoba 2026Ƴansanda sun yi arangama da masu zanga-zanga a Faransa

    Masu zanga-zanga sun yi arangama da ’yan sandan kwantar da tarzoma a Lyon, wani babban birni da ke da kusan kilomita 466 kudu maso gabashin Paris.

    An ga jami’an cikin ɗamara suna amfani da makaman tarwatsa taron jama’a.

    Ana sa ran dubban mutane za su gudanar da zanga-zanga a yau a biranen Marseille, Nice, Nantes, Lyon da Paris.

14. 6 Oktoba 2026Ana zanga-zangar nuna goyon baya ga ɗalibai a Faransa

    An yi arangama tsakanin masu zanga-zanga da ’yan sanda a birane da dama na Faransa, yayin da ake gudanar da zanga-zanga a faɗin ƙasar domin neman gwamnati ta ƙara inganta makarantu.

    ’Yan sanda sun harba hayaki mai sa hawaye kan masu zanga-zanga a birnin Toulouse da ke kudancin ƙasar, yayin da ’yan sanda a Lyon suka ce sun mayar da martani bayan da aka jefa musu abubuwa.

    Zanga-zangar ɗaliban, wadda ake yi kan ƙarancin malamai, cunkoson azuzuwa da kuma raunin gine-ginen makarantu, ta fara ne a birnin Paris a watan da ya gabata kafin daga bisani ta bazu zuwa sassa daban-daban na Faransa.

    An rufe ɗaruruwan makarantu sakamakon zanga-zangar.

    A ranar Litinin, wani ɗalibi ɗan shekara 15 ya rasa hannunsa sakamakon fashewar gurneti.

    Gwamnatin Faransa ta ce ɗalibai fiye da 200 sun ji rauni, yayin da aka tsare mutane sama da 6,000, waɗanda da dama daga cikinsu matasa ne, tun bayan fara zanga-zangar.

15. 6 Oktoba 2026Yadda Saudiyya ta yanke wa matashi hukuncin kisa kan kalaman ɓatanci ga Annabi

    Anojan Sivarasa, matashi ɗan Sri Lanka mai shekara 24 da ya je Saudiyya ci-rani yana fuskantar hukuncin kisa bayan da wata kotun ɗaukaka ƙara ta same shi da laifin yin ɓatanci ga Musulunci da Annabi Muhammad SAW sakamakon wani saƙo da ya wallafa a shafinsa na Fesbuk.

    Sai dai cikin kuka mahaifiyarsa Rasamanickam Yogalakshmi ta roƙi a y iwa ɗan nata afuwa kan kuskuren da ya aikata tana mai cewa „Don Allah ku yafe masa, ku dawo mana da shi.”

    Lamarin ya tayar da hankula a faɗin Sri Lanka, inda ƙungiyoyin farar hula suka gabatar da ƙorafi. Jam’iyyun siyasa da hukumomin gwamnati da dama sun haɗa kai wajen ƙoƙarin neman a yi masa afuwa.

    Sai dai iyalan Anojan ba su samu wani ƙarin bayani game da halin da yake ciki ba tun ranar 28 ga Satumba. Gwamnatin Sri Lanka ta buƙaci iyalan da su guji sake yin wasu kalamai yayin da ake ci gaba da ƙoƙarin an shawo kan lamarin ta hanyar diflomasiyya.

    Hukumomin Saudiyya ba su sanar da ranar da za a aiwatar da hukuncin kisan ba, kuma har yanzu ba a san lokacin da za a zartar da hukuncin ba. A baya, Saudiyya ta aiwatar da hukuncin kisa ba tare da sanar da iyalan waɗanda abin ya shafa ko ofisoshin jakadancin ƙasashensu tun da farko ba, inda a wasu lokuta sai bayan an aiwatar da hukuncin ake sanar da ’yan uwa.

    An gurfanar da Anojan ne bayan wata takaddama a shafukan sada zumunta sakamakon wani lamari da ya faru yayin wani aikin ibada na mabiya addinin Hindu a Sri Lanka.

    A ƙarshen watan Yuni, wani bidiyo da ke nuna wani matashi Musulmi yana dukan wani kare da ke bin mabiya addinin Hindu ya yaɗu sosai a shafukan sada zumunta, lamarin da ya haifar da muhawarar addini a intanet.

    A yayin muhawarar, wani mai amfani da shafin ya yi kalaman ɓatanci ga wani abin bautar mabiya addinin Hindu, lamarin da ya sa Anojan ya mayar da martani da harshen Tamil, inda ya yi kalaman ɓatanci ga Annabi Muhammad.

    Duk da cewa Anojan ya goge kalaman nasa nan take tare da wallafa bidiyon neman afuwa, an riga an ɗauki hoton kalaman. Daga baya aka kai batun ga kamfanin da yake yi wa aiki da kuma hukumomin Saudiyya, abin da ya kai ga kama shi a watan Yuli.

    Daga bisani an ƙwace na’urorinsa na kashin kai, sannan hukumomin Saudiyya sun goge shafukansa na sada zumunta.

16. 6 Oktoba 2026Jerin sunayen mutum 25 da suka rasu a hatsarin jirgin soji a jihar Ondo

    Rundunar sojin saman Najeriya ta saki sunayen mutum 25 da ta ce su ne suka rasa rayukansu sakamakon hatsarin jirgi mai saukar ungulu da ya faru ranar Litinin a jihar Ondo.

    Hukumomi sun ce jirgin yana kan wani aiki ne na yau da kullun daga Benin zuwa Legas lokacin da ya faɗi kusa da sansanin sojojin ruwa a safiyar Litinin.

    Wani mazaunin garin ya shaida wa BBC cewa jirgin ya faɗi kusa da wani kurmi kuma an gano tufafi da takalma a wurin. Ana iya ganin hayaki yana tashi daga yankin.

    Rahotanni a baya sun nuna cewa mutum 32 ne suka rasu.

    Rundunar ƙarƙashin babban hafsanta, Air Marshal Sunday Kelvin Aneke ta bayyana sunan mutum 25, a shafinta na X a ranar Talata da suka hada da matuƙan jirgin biyar da fasinjoji 20. Rundunar ta ce ba a samu wani wanda ya tsira da ransa ba.

    Matuƙa da ma'aikatan jirgi

    • Squadron Leader MI Aburime
    • Squadron Leader AP Man-Ugwueje
    • Flight Lieutenant IS Bako
    • Warrant Officer Abubakar A (Mai gyaran jirgi)
    • Corporal Uguru HC (Mai gyaran jirgi)

    Fasinjoji

    • Flight Lieutenant TL Lazarus
    • Flight Lieutenant M Akinloye
    • Flying Officer IM Adeshina
    • Master Warrant Officer Onwuka F
    • Master Warrant Officer Matini BA
    • Warrant Officer Nuhu FS
    • Flight Sergeant James RB
    • Flight Sergeant Mohammed AI
    • Sergeant Ani AE
    • Sergeant Izibenikien SI
    • Sergeant Alafuka C
    • Sergeant Mbadugha AN
    • Lance Corporal Ugwuba FC
    • Lance Corporal Eledan GE
    • Mrs Ezeh Nneka
    • Godstmine Tarabina
    • Joy Micheal
    • Sunday Micheal
    • Ukeme David
    • Gideon Omotola

17. 6 Oktoba 2026Babban Sakataren Majalisar Shari'ar Musulunci Nafiu Baba-Ahmed ya rasu

    Allah ya yi wa Babban Sakataren Majalisar Ƙoli kan Harkokin Shari’ar Musulunci a Najeriya, Mallam Nafiu Baba-Ahmed rasuwa.

    Mallam Nafiu Baba-Ahmed ya rasu ne yau Talata bayan doguwar jinya.

    Za a yi jana’izarsa anjima da ƙarfe 1 na rana a masallacin ƙasa da ke Abuja, babban birnin Najeriya.

    Marigayin ya shafe shekaru 26 na rayuwarsa wajen hidimtawa Musulunci tare da fafutukar tabbatar da adalci ga kowa.

    Cikin waɗanda suka miƙa saƙon ta’aziyyar rasuwarsa har da Tsohon Ministan Sadarwa na Najeriya, Sheikh Isa Pantami.

    Pantami ya bayyana alhininsa ne cikin wata sanarwa da ya wallafa a shafinsa na Fesbuk.

18. 6 Oktoba 2026Ana ci gaba da aikin gano sojojin da suka mutu a hatsarin jirgi

    Gwamnatin Jihar Ondo ta ƙaddamar da aikin ceto sakamakon hatsarin wani jirgin Rundunar Sojin Saman Najeriya da ya faru a yankin Igbokoda na Ƙaramar Hukumar Ilaje a jihar Ondo.

    Wakilan Gwamnan Jihar Ondo, Dr Lucky Orimisan Aiyedatiwa, ƙarƙashin jagorancin Babban Mataimaki na Musamman ga gwamnan kan agajin Gaggawa da Tabbatar da Tsaro, Hon. Wellington Oriade Adebawo, sun ziyarci wurin da jirgin ya yi hatsari jiya Litinin, domin tantance halin da ake ciki da kuma tallafawa ƙoƙarin gano mutanen da ke cikin jirgin.

    Tawagar ta ƙunshi jami’an Hukumar Ba da Agajin Gaggawa ta Jihar Ondo da Hukumar bada Agajin Gaggawa ta Ƙasa (NEMA), wakilin ƙungiyar agaji ta Red Cross ta Najeriya, da kuma wani mai bai wa gwamna shawara, Hon. Cornelius Owolewa.

    Mai Bai wa Gwamnan Shawara na Musamman kan Harkokin Sadarwa, Hon. Allen Sowore, shi ma ya haɗu da tawagar a wurin da jirgin ya yi hatsari.

    Jirgin, mai lamba NAF 970, nau’in ATR-42 ne da Rundunar Sojin Saman Najeriya ke amfani da shi. An ruwaito cewa yana ɗauke da mutum 32, waɗanda suka haɗa da fasinjoji 25 da ma’aikatan jirgi bakwai, lokacin da ya yi hatsari a yankin Igbokoda yayin da yake kan aiki daga Benin zuwa Lagos.

    Gwamnatin Jihar Ondo ta nuna damuwa kan lamarin tare da jaddada aniyarta ta ci gaba da tallafa wa aikin da ake gudanarwa.

    Ta kuma yi kira ga mazauna yankin da sauran jama’a su kwantar da hankalinsu tare da dogaro da sahihan bayanai daga hukumomi yayin da ake ci gaba da aikin nema.

19. 6 Oktoba 2026Najeriya na makokin mutuwar sojojinta a hatsarin jirgin sama

    Shugaban Najeriya, Bola Tinubu, ya ayyana zaman makoki na kwanaki uku sakamakon hatsarin jirgin soji da ya faru a jihar Ondo inda kuma ya bayar da umarnin gudanar da bincike kan musabbabin hatsarin.

    Haka kuma, Tinubu ya bayar da umarnin a yi ƙasa ƙasa da tutoci domin girmama jami’an sojin da suka rasu a hatsarin jirgin.

    A wata sanarwa da mai magana da yawun shugaban ƙasa, Bayo Onanuga, ya fitar ranar Litinin, Tinubu ya “miƙa ta’aziyyarsa ga iyalan fasinjoji 25 da ma’aikatan jirgin bakwai da lamarin ya shafa, da Babban Hafsan Sojin Sama, Air Marshal Sunday Kelvin Aneke, da daukacin hafsoshi da jami’an Rundunar Sojin Saman Najeriya.”

    Hatsarin jirgin dai ya yi ajalin dukkan mutum 32 da ke ciki da suka hada da fasinjoji 25 da ma'aikata 7.

    “Wannan lokaci ne mai matuƙar raɗaɗi ga Rundunar Sojinmu da ma ƙasa baki ɗaya. Jami’an Rundunar Sojin Samanmu suna jefa rayukansu cikin haɗari a kowace rana domin tabbatar da tsaron Najeriya. Ba za a taɓa mantawa da sadaukarwar da suka yi ba,” in ji Tinubu.

20. 6 Oktoba 2026Assalamu Alaikum

    Masu bin wannan shafin barkan mu da safiyar wannan rana ta Talata.

    Nabeela Mukhtar Uba ke fatan kasancewa da ku a daidai wannan lokaci, domin kawo muku labaran abubuwan da ke faruwa a faɗin duniya, za mu fi mayar da hankali kan Najeriya da makwabtanta.

    Kuna iya leƙawa shafukanmu na sada zumunta domin tafka muhawara kan labaran da muke wallafawa.