Muna da cikakken iko da mashigar Hormuz - Trump

Asalin hoton, Getty Images
Donald Trump ya mayar da martani ga wani ɗan jarida da ya tambaye shi kan abin da ya kira "rashin jin daɗinsa" game da kalaman mataimakinsa, J.D. Vance, bayan shan kaye da jam’iyyar Republican ta yi, da kuma ikirarinsa cewa yaƙin da aka yi da Iran ya taka rawa wajen sakamakon zaɓen.
Trump ya ce: “Magana ce mai kyau. Tabbas yaƙin ya shafi farashin makamashi, amma ba kamar yadda ake zato ba. Wannan yaƙi ne da babu makawa, kuma da za a mayar da hannun agogo baya, da zan sake ɗaukar wannan mataki (na yaƙin Iran).”
Ya ci gaba da cewa: “Yaƙin ya ƙara farashi da kuɗin fetur, amma ba kamar yadda na yi zato ba. Na yi tunanin cewa farashin ɗanyen mai zai kai dala 300 kan kowace ganga. Amma yanzu yana kusan dala 80 ne kawai kan kowace ganga.
"A gaskiya, a makon da ya gabata mun kafa tarihin yawan man da ya ratsa ta mashigar Hormuz. Tarihi ne da ba a taɓa yin irinsa ba. Rundunar ruwanmu ta kafa katanga ta tsaro. Rundunar ruwanmu abin alfahari ce. Sojojinmu ma abin alfahari ne. Muna da cikakken iko a mashigar Hormuz.”
Trump ya ƙara da cewa: “Ina ganin zan iya magana a madadin kowa, duk da cewa ba na son yin magana a madadin wasu. Mutanen da nake aiki tare da su suna da ’yancin bayyana ra’ayinsu. Amma na san jami’an Iran, kuma a gaskiya suna yin abubuwan da ba a saba gani ba. Sun shafe shekaru 51 suna aikata haka, ba shekaru 47 ba.
"Lokacin da muka fara magana kan wannan batu shekaru 47 ne, amma idan aka duba abubuwan da suka faru tsawon shekaru, ko batun kai hari ga ofishin jakadancin Amurka ko kuma kashe Amurkawa da yawa, za a iya cewa sun fara wannan rikici shekaru 51 da suka gabata.”




























