ચોમાસું કેટલી ઝડપે આગળ વધી રહ્યું છે, ગુજરાતમાં પહોંચતા હજુ કેટલો સમય લાગશે?

ભારતમાં ત્રણેક દિવસના વિલંબ બાદ આખરે 4 જૂનના રોજ વિધિવત્ ચોમાસું બેસી ચૂક્યું છે.

કેરળમાં દસ્તક દીધા બાદ હવે ચોમાસું આગળ વધી રહ્યું છે.

ગુજરાતની વાત કરીએ તો ઘણા જિલ્લામાં છૂટોછવાયો વરસાદ પડવાનું ચાલુ છે. તેમજ વાદળછાયા વાતાવરણ અને વરસાદને કારણે રાજ્યમાં અંગ દઝાડતી ગરમીથી થોડી રાહત મળી રહી છે.

હવે હવામાન વિભાગ ચોમાસાની આગેકૂચ અને આગામી દિવસોમાં ગુજરાતમાં વરસાદ અંગે ફરી એક વાર આગાહી કરી છે.

ભારતના હવામાન વિભાગે 5 જૂનના રોજ જાહેર કરેલા પોતાના બુલેટિનમાં આગામી દિવસો માટે ગુજરાતના જિલ્લાઓમાં વરસાદની સ્થિતિની આગાહી કરી છે. જે મુજબ, 6 જૂનના રોજ પંચમહાલ, દાહોદ, છોટા ઉદેપુર, નર્મદા, સુરત, ડાંગ, તાપી, નવસારી, વલસાડ, અમરેલી, ભાવનગર અને ગીર સોમનાથ ખાતે છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડી શકે છે.

આ ઉપરાંત, 7 જૂને અમેરેલી, ભાવનગર, ગીર સોમનાથ, નર્મદા, સુરત, ડાંગ, તાપી, નવસારી અને વલસાડ ખાતે છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડી શકે છે. આ સિવાયના રાજ્યના બીજા જિલ્લામાં આ દિવસે શુષ્ક હવામાન રહી શકે છે.

8 જૂનના રોજ અમરેલી, ભાવનગર, ડાંગ, તાપી, નવસારી અને વલસાડ ખાતે છૂટાંછવાયાં સ્થળોએ ગાજવીજ સાથે હળવાથી મધ્યમ વરસાદ પડી શકે છે. આ સિવાયના રાજ્યના બીજા જિલ્લામાં આ દિવસે શુષ્ક હવામાન રહેવાની આશંકા છે.

બીજી તરફ, ચોમાસાની આગેકૂચની વાત કરીએ તો હવામાન વિભાગના બુલેટિન પ્રમાણે મધ્ય અરબી સમુદ્ર, સમગ્ર ગોવા, મહારાષ્ટ્ર-આંધ્રપ્રદેશના કેટલાક ભાગો, કર્ણાટકના વધુ ભાગો, તામિલનાડુના બાકી રહેલા ભાગો, દક્ષિણપશ્ચિમ બંગાળની ખાડી, પશ્ચિમમધ્ય, મધ્યપૂર્વ અને ઉત્તરપૂર્વ બંગાળની ખાડીના વધુ ભાગો અને ઉત્તરપૂર્વનાં રાજ્યોના કેટલાક ભાગોમાં આગામી બેથી ત્રણ દિવસમાં દક્ષિણપશ્ચિમ ચોમાસાની આગળ વધવા માટેની સાનુકૂળ સ્થિતિ છે.

બીબીસી માટે કલેક્ટિવ ન્યૂઝરૂમનું પ્રકાશન