Gaza: Hamas ivuga ko yemeye gusubiza ibirwanisho mu mugambi w’amahoro wa Trump, ariko Israel ntaco irabivugako
Ahavuye isanamu, Anadolu via Getty Images
Inyuma y'amezi atari make y'ibiganiro, umuhari Hamas watangaje ko wemeye gusubiza burundu ibirwanisho vyose muri Gaza, mu mugambi w’amahoro wa Trump, uzwi nka Board of Peace (Inama y'Amahoro).
Perezida Trump yavuze ko ayo masezerano ari ay'akataraboneka kandi ko ari intambwe ihambaye cane iganisha kw’ishingwa ry’ubutegetsi bushasha bwa Palestina muri Gaza.
Mu butumwa yacishije ku rubuga nyagiro rwiwe, Truth Social, Trump yagize ati: "Iyi ni intambwe ihambaye cane mu gushira mu ngiro Umugambi wa Trump ugizwe n'Ingingo 20. Aya masezerano azoshirwa mu ngiro mu bwitonzi kandi mu mice yateguwe.
“Mu gihe igikorwa co gushira hasi ibirwanisho kizoba kirangiye, ingabo za Israel zizoca ziva muri Gaza, hanyuma Ingabo Mpuzamakungu zo Gutsimbataza Umutekano zizoc zikorana n'igipolisi gishasha ca Palestina kugira ngo zifate mu minwe umutekano wa Gaza ku bayibamwo no ku babanyi bayo”.
Umutegetsi umwe wo hejuru wa Hamas yabwiye BBC ko uwo muhari wemeye umugambi wo gusubiza burundu ibirwanisho muri Gaza, kandi ko vuba hagiye itangazo ku mugaragaro.
Yongeye ashimira Misiri, Qatar na Turukiya ku ruhara vyagize mu guhuza impande.
Umunyamakuru wa BBC akorera i Cairo mu Misiri avuga ko uwo mugambi utegekanya kugira urutonde no kubika ibirwanisho biremereye vya Hamas bisigaye, bikagenzurwa n'abategetsi ba Palestina.
Kugeza ubu, Israel ntiragira ico ibivugako, ariko Perezida Trump yavuze ko ingabo za Israel zizova muri Gaza igihe igikorwa co kwaka ibirwanisho Hamas n'iyindi mirwi yose yitwaje ibirwanisho kizoba kirangiye.
Gusa, imbere y'uko ayo masezerano ashikwako, umwe mu bategetsi ba Israel yari yavuze ko uwo mugambi utari bwashitse ibisabwa na Israel.
Iyi ntambara hagati ya Israel na Hamas yatanguye ku wa 7 Gitugutu (10) 2023, igihe abarwanyi b'uno muhari w'Abanyapalestina binjira muri Israel, mu gitero gikomeye cabaye giturumbuka, bica abantu bababa 1200, bongera banyuruza abandi bababa 250.
Kuva ico gihe, Israel yaciye itera akarere ka Gaza ubu gasigaye karangwamwo ibihomoka gusa.
Twibukanye bimwe bimwe kuri iki gitero ca Hamas catejeiyi ntambara:
