IKIBIRIRAHO, Trump yaretse itangazwa ry'igihano cy'urupfu cy'uwari umusirikare wishe bagenzi be mu 2009 ubwo azaba arimo araswa

Amakuru y'ikibiriraho

Didier Bikorimana

1. Haciye isaha 1Mu rukiko i New York Maduro yahakanye ibirego bishya bijyanye n'iyicarubozo

   Uwahoze ari Perezida wa Venezuela Nicolás Maduro n’umugore we, Cilia Flores, bitabye urukiko ku wa kane bahakana ibirego bishya byo gucura umugambi wo gukora iyicarubozo.

   Mbere, leta y’Amerika yashinje Maduro ibyaha by’iterabwoba rishingiye ku biyobyabwenge bitemewe n’amategeko, gucuruza ibiyobyabwenge n’ibyaha bijyanye n’intwaro, nyuma mu cyumweru gishize yongeraho ibirego bishya kuri we no ku mugore we Flores.

   Maduro na Flores bafashwe muri Mutarama (1) uyu mwaka mu gitero cya gisirikare cy’Amerika, nyuma bajyanwa i New York, aho bagifungiye.

   Bombi bahakanye ibyaha baregwa ndetse bagiye biregura bavuga ko uru rubanza rukwiye guteshwa agaciro kuko bafite ubudahangarwa. Urubanza rwabo ruteganyijwe gutangira mu mizi muri Kamena (6) mu mwaka wa 2027.

   Mu nyandiko y’ikirego gishya mu cyumweru gishize, abashinjacyaha ba leta bashinje Maduro na Flores “gushyiraho no kugumishaho uburyo bw’urugomo bw’ikandamiza” bwatumye “Abanya-Venezuela babarirwa mu bihumbi” bicwa, batotezwa ndetse bagakorerwa iyicarubozo.

   Nicolás Maduro yahakanye ibyo birego bishya yashyiriweho na leta y’Amerika, abwira urukiko ku wa kane ko ahakana “ibirego by’ibinyoma n’ubuhamya bw’ibinyoma kuri jye”.

   Asubiza mu rurimi rw’Iki-Espanyole rugasemurwa n’umusemuzi, yagize ati: “Nanze iyi nyandiko yose uko yakabaye.”

   Umucamanza Alvin Hellerstein yaciye mu ijambo Maduro, atangaza ko urukiko ruza kwandika ko Maduro ahakana ibyo aregwa.

   Binyuze ku musemuzi, Flores yagize ati: “Ndi umwere rwose. Nta cyaha nakoze.”

   Ayandi makuru yacu mushobora kuyakurikira kuri YouTube kuri BBC News Gahuza

   Izindi nkuru wasoma:

   Umubyeyi warokowe mu matongo muri Venezuela ari kumwe n'umwana we w'uruhinja avuga uko yamufashije kubaho

   Menya bano bakuru b'ibihugu bine bamaze gufatwa na Reta Zunze Ubumwe za Amerika

   Inyuma ya Venezuela, ni ibihe bihugu bishobora gukurikira mu burakari bwa Trump?

2. Haciye amasaha 3Abana batatu n'umwarimu bishwe barashwe ku ishuri ribanza ryo muri leta ya Oregon muri Amerika

   Polisi yavuze ko umuhungu w’imyaka 16 yishe arashe abana batatu n’umwarimu ku ishuri ribanza ryo muri leta ya Oregon muri Amerika, nyuma na we yicwa n’umuntu wabirebaga.

   Uwo ucyekwa, utatangajwe izina, yinjiye ku ngufu mu ishuri ribanza rya ‘Silver Rail Elementary School’, riri mu mujyi wa Bend, ku wa kane nyuma ya saa sita z’amanywa, abikora arashe inzugi zikinze, nkuko bivugwa n’umukuru wa polisi muri uwo mujyi, Mike Krantz.

   Krantz yavuze ko uwo muhungu yishwe arashwe n’umuntu wo muri ako gace “wamukurikiye kugera ku ishuri akarasana na we”.

   Abo bana batatu bishwe barimo ufite imyaka itanu, ufite imyaka umunani n’ufite imyaka 11. Krantz yavuze ko umwana w’imyaka irindwi n’umwarimu w’imyaka 54 bajyanwe ku bitaro bamerewe nabi cyane.

   Ntibisobanutse niba uwagabye icyo gitero hari isano yari afitanye n’iryo shuri.

   Mu itangazo yasohoye, umukuru w’amashuri muri ako karere Steven Cook yagize ati: “Tuguye mu kantu kandi dushenguwe umutima n’ubu bwicanyi budafite ishingiro.”

   “Nta magambo ashobora gusobanura neza intimba umuryango [abatuye hano] wacu ufite.”

   Kuri uyu wa gatanu, amashuri yo mu mujyi wa Bend yafunzwe. Abategetsi bavuze ko abahatuye bacyeneye igihe cyo kubanza gukira ku mutima.

   Polisi yavuze ko abana bagera kuri 450 biga kuri iryo shuri ribanza rya ‘Silver Rail Elementary School’. Abakozi bakuru barenga 40 ni bo barikoraho.

   Imibare yo mu bubikoshingiro bw’amakuru ajyanye no kuraswa ku mashuri, buzwi nka ‘K-12 School Shooting Database’, igaragaza ko habayeho ibikorwa 235 byo kuraswa ku mashuri yo muri Amerika mu mwaka ushize, ndetse n’ibikorwa byo kuraswa ku mashuri nibura 140 kugeza ubu muri uyu mwaka.

   Ayandi makuru yacu mushobora kuyakurikira kuri YouTube kuri BBC News Gahuza

   Izindi nkuru wasoma:

   TikTok igiye kuriha Amerika miliyoni $400 mu bwumvikane bwo kurangiza ikirego ku ivogerwa ry'ubuzima bwite bw'abana

   Umukuru wa CIA yerekeje i Moscow mu biganiro bitari byatangajwe – ibivugwa n'ibitangazamakuru byo muri Amerika

3. Haciye amasaha 4Trump yaretse itangazwa ry'igihano cy'urupfu cy'uwari umusirikare wishe bagenzi be mu 2009 ubwo azaba arimo araswa

   Perezida w’Amerika Donald Trump yaretse gahunda yo gutangaza imbonankubone iyicwa ry’uwari umusirikare akaba n’umuganga w’indwara zo mu mutwe mu gisirikare, Nidal Hasan, ubwo azaba arimo araswa n’itsinda ry’abasirikare.

   Mbere, Trump yari yemeye ko urupfu rw’uwo wishe abasirikare abarashe rwerekanwa, mu gihe Visi Perezida w’Amerika JD Vance yari afite amakenga niba bizaba ndetse akavuga ko atazabireba.

   Icyemezo cya Trump cyo kuburizamo iryo tangazwa ry’igihano cy’urupfu ubwo kizaba kirimo gishyirwa mu ngiro, agifashe nyuma yuko henshi muri Amerika no mu mahanga banenze iyo gahunda. Ku wa kane, yavuze ko “abantu benshi beza cyane kandi bagamije icyiza bakwifuza kutamureba arimo apfa”.

   Trump yagize ati: “Ntekereza ko gutangaza iyicwa bose bakaribona byajyaga kuba ikumira rikomeye cyane ku Isi ikabona ukuntu Amerika ihangana n’Abakora iterabwoba n’UMWANDA nka Hasan.”

   Ku rubuga nkoranyambaga rwa Truth Social, Perezida Trump yongeyeho ati: “Azapfa, nkuko biteganyijwe, yishwe n’itsinda ry’abarashi, ariko iki gikorwa ntikizatangazwa kirimo kuba.”

   Hasan yishe arashe abasirikare 13 b’Amerika batari bafite intwaro ndetse akomeretsa abandi 32, mu kigo cya gisirikare cya Fort Hood, muri leta ya Texas muri Amerika, mu mwaka wa 2009. Iyicwa rye arashwe n’itsinda ry’abarashi, riteganyijwe kuba ku itariki ya 3 Ukuboza (12) uyu mwaka, rizaba ribaye ishyirwa mu ngiro ry’igihano cy’urupfu ku musirikare rya mbere ribayeho muri Amerika mu myaka irenga 60 ishize.

   Trump yavuze ko imiryango y’abishwe n’abakomeretse ishobora kujya kureba iyicwa rye niba ibyifuza.

   Yagize ati: “Ikwiriye kureba UBUTABERA!”

   Ayandi makuru yacu mushobora kuyakurikira kuri YouTube kuri BBC News Gahuza

   Izindi nkuru wasoma:

   Umwicanyi w'Umunyamerika Christa Pike yasohotse mu bitaro inyuma y'imisi 10 igikorwa co kumwica kinaniranye

   US: Urukiko rwasubitse iyicwa ry'imfungwa isaba gupfa pasitoro ayirambuyeho ibiganza

   Ifunguro rya nyuma abakatiwe urwo gupfa muri Amerika bariye mbere yo kwicwa

4. Haciye amasaha 4Mwaramutse neza!

   Ikaze kuri BBC Gahuzamiryango, aho tubagezaho amakuru yo mu karere no mu mahanga mu buryo bw’aka kanya.