Igitero cya mbere kinini cyane cya Ukraine kuri Moscow cyakoreshejwemo 'drone' amagana – umukuru w'akarere

Inyandiko gusa
Insiguro ya video, Reba videwo: Uruganda rutunganya ibikomoka kuri peteroli rw'i Moscow rwabonetse rurimo gushya nyuma y'igitero cya 'drone' cya Ukraine
    • Umwanditsi, Jaroslav Lukiv
    • Umwanditsi, Dearbail Jordan
  • Yatangajwe
  • Igihe co gusoma: iminota 3

Abantu nibura babiri bishwe naho abandi 20 barakomereka mu gitero cya mbere kinini cyane cy'indege nto z'intambara zitajyamo umupilote (zizwi nka 'drone') Ukraine yagabye mu ijoro ryacyeye ku karere karimo umurwa mukuru Moscow w'Uburusiya, nkuko bivugwa na Guverineri Andrei Vorobyev.

Umuyobozi w'umujyi wa Moscow Sergei Sobyanin yavuze ko 'drone' 450 zerekezaga ku murwa mukuru zahanuwe muri icyo yise "igitero cya mbere kinini cyane". Uruganda rukomeye rwo muri uwo mujyi rutunganya ibikomoka kuri peteroli rwangiritse n'ingo nyinshi zahiye.

Perezida wa Ukraine Volodymyr Zelensky yemeje ko igihugu cye cyarashe uruganda "rukomeye" rw'Uburusiya rutunganya ibikomoka kuri peteroli n'ikigo cy'ibikoresho muri ako karere, ibyo byombi bikaba bitanga "miliyari z'amadolari zituma intambara ikomeza".

Hagati aho, abategetsi bo muri Ukraine bavuze ko abantu icyenda, barimo abana batatu, ku wa gatandatu biciwe mu bitero by'Uburusiya mu turere twa Kyiv na Sumy.

Kuva mu gihe cya vuba aha gishize, Uburusiya na Ukraine byakajije umurego mu bitero byabyo, birasana ku bigo bitanga ingufu hamwe n'iby'ubwikorezi, ndetse n'ibigo binini bibikwamo ibikoresho.

Umugore w'imyaka 44 yiciwe i Sofyino mu Burusiya ku cyumweru nyuma yuko 'drone' irashe ku nyubako yo guturamo y'amagorofa atatu, nkuko bivugwa n'umukuru w'ako karere, Vorobyev. Abandi bantu batanu – barimo abana babiri – bakomeretse.

Vorobyev yongeyeho ko umugabo ushaje yapfuye nyuma yuko inzu irashweho mu karere ka Orekhovo-Zuevo.

Videwo zagaragaye ku mbuga nkoranyambaga, uko bigaragara zerekana ibiturika mu kirere ari nijoro hejuru ya Moscow, ndetse n'inyubako ibikwamo ibikoresho n'ibicuruzwa irimo gushya. BBC ntiyagenzuye izo videwo.

Skip Ibisomwa cane and continue reading
Ibisomwa cane

End of Ibisomwa cane

Sobyanin yavuze ko icyo gitero kinini cyari "igerageza ryo kudobya" amatora y'abadepite yo mu Burusiya, ku cyumweru yari arimo kuba ku munsi wayo wa gatatu.

Ayo matora agenzurwa cyane n'ibiro bya Perezida w'Uburusiya (bizwi nka Kremlin) ndetse yapfobejwe n'abanenga ubutegetsi bavuga ko atakozwe mu bwisanzure, mu kutabogama no mu mucyo.

Inyubako yangiritse yo guturamo y'amagorofa menshi mu karere ka Moscow. Abategetsi bo mu Burusiya bavuze ko yarashwe n'igitero cya 'drone' cya Ukraine i Kotelniki, mu karere ka Moscow mu Burusiya, ku itariki ya 20 Nzeri (9) mu mwaka wa 2026.

Ahavuye isanamu, Reuters

Insiguro y'isanamu, Inyubako yo mu karere ka Moscow mu gitondo cyo ku cyumweru. Abategetsi bo mu Burusiya bavuze ko yarashwe n'igitero cya 'drone' cya Ukraine

Muri iki cyumweru gishize, Uburusiya na Ukraine byakomeje kurasana ku bikorwa-remezo by'ingufu bya buri ruhande, nubwo Perezida w'Amerika Donald Trump yatangaje ku mbuga nkoranyambaga ko impande zombi zemeranyije kutabikora.

Ku wa gatanu, Trump yashyize umukono ku mushinga w'itegeko ry'ibihano byibasira ubukungu bw'Uburusiya binyuze mu gushyira imisoro ku baguzi banini cyane b'ibikomoka kuri peteroli hamwe na gaze by'icyo gihugu, barimo Ubushinwa n'Ubuhinde.

Iryo tegeko ry'Amerika riha Perezida ububasha bwo gushyiraho imisoro ya 100% ku baguzi banini b'ibicuruzwa byo mu rwego rw'ingufu by'Uburusiya.

Perezida w'Uburusiya Vladimir Putin yagabye igitero gisesuye kuri Ukraine kuva muri Gashyantare (2) mu mwaka wa 2022.