Ibitero by'Uburusiya kuri Ukraine byishe abantu babiri, umunsi umwe nyuma y'igitero ku iduka rinini – ibivugwa n'abategetsi

Inyandiko gusa
Insiguro ya video, Kuburira: Amashusho arimo urugomo: Videwo igaragaza igitero cya 'drone' cy'Uburusiya ku iduka rinini muri Ukraine
    • Umwanditsi, Jaroslav Lukiv
    • Umwanditsi, Claire Keenan
  • Yatangajwe
  • Igihe co gusoma: iminota 3

Abategetsi bo muri Ukraine batangaje mu gitondo cyo ku wa gatandatu ko abantu nibura babiri bishwe n'ibitero by'Uburusiya muri icyo gihugu, mu gihe abandi icyenda bakiburiwe irengero nyuma y'umunsi ibitero bibiri bikurikiranye byishe abantu 16 ku iduka rinini muri Ukraine.

Abategetsi bo muri ako gace bavuze ko umuntu umwe yiciwe mu muriro wadutse mu nyubako ibikwamo ibicuruzwa n'ibindi bikoresho yo mu murwa mukuru Kyiv, nyuma yo kuburira ko hari hagiye kuba igitero cya misile yo mu bwoko bwa 'ballistic', mu gihe undi yiciwe mu gitero cy'indege nto y'intambara itajyamo umupilote (drone) cyabereye mu mujyi wa Zaporizhzhia.

Ibi bitero bikurikiye ibitero bibiri by'Uburusiya byiciwemo abantu ku iduka rinini rigira abakiliya benshi, byabaye ku wa gatanu mu mujyi wa Kryvyi Rih.

Perezida wa Ukraine Volodymyr Zelensky yavuze ko icyo gitero cy'"urukozasoni kandi giteye ishozi rwose" cyabaye ku manywa, aho muri uwo mujyi avukamo, cyakozwe mu "byiciro bibiri", icyiciro cya kabiri cyacyo kikaba cyaribasiye abakora ubutabazi bwihuse.

Umwotsi urimo kuzamuka ku iduka rinini ryo mu mujyi wa Kryvyi Rih, uri rwagati muri Ukraine, nyuma y'igitero cya 'drone' cy'Uburusiya. Ifoto yo ku itariki ya 21 Kanama (8) mu mwaka wa 2026.

Ahavuye isanamu, Oleksandr Hanzha / Dnipropetrovsk regional administration

Insiguro y'isanamu, Amakuru avuga ko hakiri abantu bamwe baheze mu byasenyutse byo kuri iri duka rinini ryo mu mujyi wa Kryvyi Rih uri rwagati muri Ukraine

Amashusho yagenzuwe na BBC agaragaza igitero cya kabiri cya 'drone' gikubita kuri iryo duka rinini ryari risanzwe ririmo gushya mu karere ka Dnipropetrovsk. Igisirikare cy'Uburusiya nta cyo cyatangaje.

Abandi bantu 130 – barimo abana 23 – bakomerekeye mu gitero cyagabwe ku iduka rinini cyane ryo muri uwo mujyi. Amakuru avuga ko abandi bantu baheze mu byasenyutse.

Mu gitondo cyo ku wa gatandatu, umutegetsi w'akarere ka Dnipropetrovsk, Oleksandr Hanzha, yavuze ko umubare w'abapfuye wageze ku bantu 16 nyuma yuko undi murambo ukuwe mu byasenyutse.

Mu butumwa yatangaje ku rubuga rwa Telegram, Hanzha yavuze ko hakiri abantu icyenda – barimo abana babiri – amakuru avuga ko baburiwe irengero muri iryo duka rinini.

Skip Ibisomwa cane and continue reading
Ibisomwa cane

End of Ibisomwa cane

Impuguke mu by'imitekerereze n'imyitwarire ya muntu irimo kuvugana n'umugore uhangayitse, nyuma y'igitero cya 'drone' cy'Uburusiya i Kryvyi Rih, rwagati muri Ukraine. Ni ifoto yakuwe muri videwo yatangajwe n'ikigo cya Ukraine gishinzwe ubutabazi bwihuse (DSNS).

Ahavuye isanamu, DSNS / Dnipropetrovsk region

Insiguro y'isanamu, Impuguke mu by'imitekerereze n'imyitwarire ya muntu zahawe amahugurwa yihariye, zoherejwe gufasha bamwe mu barokotse icyo gitero

Mbere yaho ku wa gatanu, igisirikare cya Ukraine cyavuze ko cyagabye ibitero ku ruganda rutunganya ibikomoka kuri peteroli no ku kibuga cy'indege cya gisirikare biri imbere kure mu Burusiya.

Mu mezi ya vuba aha ashize, Ukraine yakajije umurego mu bitero igaba ku bigo by'ingufu (z'amashanyarazi) by'Uburusiya, hamwe no ku nyubako z'ububiko bw'ibicuruzwa z'ikigo cya mbere kinini cyane gikora ubucuruzi bwo kuri murandasi (internet) cyitwa Wildberries, gifatwa nk'Amazon y'Uburusiya.

Ukraine isobanura aho hantu nk'ahemewe ho kurasaho kuko hafasha mu guha amafaranga intambara y'Uburusiya.

Perezida w'Uburusiya Vladimir Putin yatangiye igitero gisesuye kuri Ukraine muri Gashyantare (2) mu mwaka wa 2022, ndetse ubu Uburusiya bugenzura hafi kimwe cya gatanu cy'ubutaka bwa Ukraine mu majyepfo ashyira uburasirazuba.