Umuntu wa mbere wo mu Bwongereza yarezwe jenoside yabaye mu Rwanda mu 1994

Ubushinjacyaha bw'Ubwongereza (CPS) bwavuze ko umugabo w'Umunyarwanda, wabaga mu majyaruguru y'umurwa mukuru London, yabaye umuntu wa mbere mu Bwongereza urezwe ibyaha bijyanye na jenoside yabaye mu Rwanda mu mwaka wa 1994.

Dr Vincent Brown, wahoze yitwa Dr Vincent Bajinya, w'imyaka 65, yarezwe icyaha kimwe cy'imyitwarire y'ubufasha kuri jenoside n'ibyaha bitandatu by'imyitwarire y'ubufasha ku bwicanyi nk'icyaha cyibasiye inyokomuntu.

Frank Ferguson, umukuru w'ishami ryo mu bushinjacyaha bw'Ubwongereza rishinzwe ibyaha byihariye no kurwanya iterabwoba, yavuze ko Brown "ashinjwa kuba yarayoboye akanashishikariza ibikorwa by'ubwicanyi na jenoside byakozwe n'abandi".

Brown araza kugezwa mu rukiko rw'ibanze rwa Westminster Magistrates' Court rw'i London kuri uyu wa kabiri.

Ferguson yavuze ko icyemezo cyo kurega Brown cyafashwe "nyuma yo gusuzuma dosiye y'ibimenyetso yatanzwe n'Itsinda ry'Ibyaha byo mu Ntambara rya Polisi y'Ubwongereza".

Yongeyeho ati: "Twanzuye ko igipimo cyacu cyo mu rwego rw'amategeko [ibisabwa mu rwego rw'amategeko] cyo kumushyiriraho ibirego nshinjabyaha cyagezweho."

Itsinda ry'Ibyaha byo mu Ntambara ryatangiye gukora iperereza ryaryo muri Nzeri (9) mu mwaka wa 2019, nyuma y'ubusabe bwatanzwe na leta y'u Rwanda bwuko hakorwa iperereza ku bantu bashinjwa kugira uruhare muri jenoside mu yahoze ari komine Rugenge mu mujyi wa Kigali – ubu ni mu kagari ka Rugenge, mu murenge wa Muhima w'akarere ka Nyarugenge, mu mujyi wa Kigali – muri Mata (4) mu mwaka wa 1994.

Mu gihe cy'iminsi 100 mu mwaka wa 1994, Abatutsi hamwe n'Abahutu bashyiraga mu gaciro muri politike bose hamwe bigereranywa ko bagera ku 800,000 bishwe mu Rwanda n'Abahutu b'abahezanguni.

Bari bagambiriye abo mu bwoko bwa ba nyamucye bw'Abatutsi, hamwe n'abataravugaga rumwe muri politike n'abo bakoraga ubwicanyi, hatitawe ku bwoko bwabo.

Izari inyeshyamba zigizwe ahanini n'Abatutsi zaje gufata ubutegetsi nyuma ya jenoside zishinjwa kuba zarishe Abahutu babarirwa mu bihumbi mu Rwanda mu kwihorera.

Polisi y'Ubwongereza yavuze ko ibirego kuri Brown bikurikiye "iperereza ry'urusobe kandi ryimbitse ryamaze imyaka irindwi".

Komanda Helen Flanagan, umukuru w'ishami rya polisi ry'i London ryo kurwanya iterabwoba, yagize ati: "Iyi dosiye igaragaza ko Ubwongereza atari ubuhungiro butekanye ku bantu bacyekwaho gukora ibyaha mpuzamahanga.

"Itsinda ryo kugenza Ibyaha byo mu Ntambara rikomeje kwiyemeza gutuma abacyekwaho kugira uruhare muri jenoside n'ibindi byaha ndengakamere babiryozwa binyuze mu buryo bwemewe n'amategeko.

"Ayandi maperereza arakomeje ku bandi bantu bo mu Bwongereza ku byaha nk'ibyo bijyanye na jenoside yo mu Rwanda."