Rwanda: Imvo n'Imvano ku mibereho y'abakinnyi nyuma yo gucyura igihe

Insiguro y'amajwi, Aristide Mugabe (ibumoso) wahoze ari kapiteni w'ikipe y'igihugu ya basketball, ubu asigaye ari umutoza w'uyu mukino
Rwanda: Imvo n'Imvano ku mibereho y'abakinnyi nyuma yo gucyura igihe

Ndabashuhuje mwebwe mwese mukurikiye BBC, none ni ku wa gatandatu tariki 25 y'ukwezi kwa kane umwaka wa 2026, ni umwanya w'ikiganiro Imvo n'Imvano.

Uyu munsi turaganira ku mibereho y'abakinnyi nyuma yo gucyura igihe. Ese abakinnyi mu Rwanda bacyura igihe mu cyubahiro cyangwa mu gahinda?

Hari bamwe mu bakinnyi nyuma yo kwamamara cyane mu kibuga bacyura igihe aho kwishimira ibyo bagezeho mu kibuga no hanze yacyo, ifirimbi ya nyuma ikaba ari bwo urugamba rw'ubuzima busharira rutangiye. Hakaba n'abandi ubwamamare bwabo babugenzanya no kwizigamira ejo hazaza ha nyuma y'ikibuga.

Abakinnyi mu Rwanda bavuga ko nta gahunda y'izabukuru bateganyirizwa n'amakipe bakinira. Ni mu gihe abakinnyi na bo ubwabo bafite uruhare mu kutamenya gucunga neza umutungo binjiza kandi igihe cyabo cyo gukina kiba ari gito.

Fabrice Twagizimana yambaye umupira w'ubururu udafite amaboko, akoze ikimenyetso n'ibiganza, arimo kuvuga areba muri 'camera'. Arapfutse ku jisho rimwe. Yabize icyuya mu mutwe, ku ijosi, ku maboko, mu maso no mu gatuza. Ahagaze mu kibuga, inyuma ye kure hari abakinnyi barimo gukina umupira w'amaguru, hirya hari ishyamba n'inzu.
Insiguro y'isanamu, Fabrice Twagizimana yabaye kapiteni w'ikipe ya Police FC ndetse akinira n'ikipe y'igihugu y'umupira w'amaguru, Amavubi

Inzego zirebwa n'imikino mu Rwanda, zirimo n'amashyirahamwe y'imikino, ntibashatse kugira icyo batangariza BBC kuri iki kibazo.

Impuguke n'abajyanama mu by'imikino bo basanga amashyirahamwe y'imikino akigendera mu mutaka w'uko imikino mu Rwanda itari iy'ababigize umwuga ngo kandi atari byo. Ikindi kandi ngo ayo mashyirahamwe n'amakipe ni yo yakagombye gufata iya mbere mu kuzigamira abakinnyi.

Ikiganiro cyo kuri uyu wa gatandatu mwagiteguriwe kandi murakigezwaho na Yves Bucyana.