Africa Forward: Ibyo wamenya kuri iyi nama igiye guhuza Macron n'abaperezida 30 ba Afurika i Nairobi

Inyandiko gusa
Perezida Macron yageze i Nairobi ku wa gatandatu

Ahavuye isanamu, William Ruto/X

Insiguro y'isanamu, Perezida Macron yageze i Nairobi ku wa gatandatu, aha araramukanya na mugenzi we William Ruto wa Kenya
Igihe co gusoma: iminota 2

Emmanuel Macron w'Ubufaransa yageze i Nairobi muri Kenya ku wa gatandatu mu rwego rw'inama Ubufaransa butigeze bukora mbere.

France-Afrique ni inama Ubufaransa bwakoranaga n'ibihugu bwahoze bukoloniza, cyane cyane byo muri Afurika y'uburengerazuba.

Nyuma yo kwamaganwa n'ingabo zabwo zikirukanwa muri bimwe mu bihugu by'ako karere ka Afurika, Ubufaransa ubu bwahinduye umuvuno. Ntibugishaka kwigaragaza nk'imbaraga z'uwahoze ari umukoloni ahubwo nk'umufatanyabikorwa wa Afurika.

Ku nshuro ya mbere inama abasesenguzi bamwe bagereranya na France-Afrique, ariko itandukanye na yo mu mimerere, igiye guhuza Ubufaransa n'ibihugu bya Afurika mu gihugu cyakolonijwe n'abongereza; Kenya.

Abategetsi bagera kuri 30 ba Afurika i Nairobi

Ibinyamakuru muri Kenya bivuga ko nibura abakuru b'ibihugu 30 bya Afurika bari bwitabire iyi nama y'iminsi ibiri.

Ku rutonde harimo Perezida w'u Burundi Evariste Ndayishimiye, Paul Kagame w'u Rwanda, Félix Tshisekedi wa DR Congo, Daniel Chapo wa Mozambique cyangwa Brice Oligui Nguema wa Gabon.

Bimwe mu bihugu byahoze bikoronizwa n'Ubufaransa nka Côte d'Ivoire, Gabon na Tchad na byo abakuru babyo bitezwe i Nairobi.

Umunyamabanga mukuru wa ONU, Antonio Guterres, yageze i Nairobi ku wa gatandatu kwitabira iyo nama n'izindi zigendanye na yo ziteganyijwe

Ahavuye isanamu, Kenya Gov

Insiguro y'isanamu, Umunyamabanga mukuru wa ONU, Antonio Guterres, yageze i Nairobi ku wa gatandatu kwitabira iyo nama n'izindi zigendanye na yo ziteganyijwe

Iyi nama igamije iki?

Abasesenguzi bavuga ko Macron yifuza gukoresha iyi nama yiswe Africa Forward Summit mu gutangiza bushya imibanire y'Ubufaransa na Afurika, bukava mu ndorerwamo y'Ubukoloni bukareberwa mu gufatanya muri politike, ubucuruzi, guhanga ibishya n'iterambere ry'ubukungu.

Skip Ibisomwa cane and continue reading
Ibisomwa cane

End of Ibisomwa cane

Ariko kandi, Ubufaransa nk'igihugu kizaba gikuriye umuryango wa G7 kuva mu kwezi gutaha, bukeneye kuzajyanayo ijambo ry'uko inyuma yabwo hari uwundi mugabane wose. Iyi nama ni uburyo bwiza kuri Macron bwo kuhakura icyo cyizere, nk'uko abasesenguzi babivuga.

Minisitiri w'ububanyi n'amahanga wa Kenya Musalia Mudavadi yabwiye abanyamakuru ati: "Iyi ni inama ikomeye cyane, ivuze byinshi ku hazaza ha Afurika".

Ni ibiki biteganyijwe kuba muri iyi nama?

Iyi nama n'izindi zijyanye na yo byateguriwe kubera ku nyubako ya Kenyatta International Convention Centre iri hagati mu mujyi wa Nairobi. Imihanda ihegereye myinshi yafunzwe kugira ngo ingendo z'abantu ibihumbi baje kuyitabira zorohe.

Abakuru b'ibihugu batandukanye hamwe n'intumwa zagiye muri izi nama batangiye kugera i Nairobi ku cyumweru nimugoroba.

Kuri uyu wa mbere haratangira inama izwi nka "Business Forum" yiga ku mikoranire mu by'ishoramari hagati y'Ubufaransa, Uburayi na Afurika, nk'uko urubuga rw'iyi nama rubivuga.

Haraba kandi inama, nk'uko abayiteguye babivuga, zigaruka kuri;

  • Guhindura ingufu zikoreshwa, n'inganda gukoresha ingufu zidahumanya
  • Guhindura imiterere y'ibijyanye n'imari n'ibigo mpuzamahanga by'imari
  • Akazi no guhanga imirimo
  • AI n'irindi koranabuhanga rishya
  • Amagara y'abantu, inkingo, n'ubushobozi bwa Afurika muri ibi
  • Inama ku mahoro n'umutekano

Ku wa kabiri ni bwo hategenyijwe inama nkuru y'abakuru b'ibihugu ari na wo munsi wa nyuma wa Africa Forward Summit.