Ikibuga cy'umupira muri Gaza, Isi ibisikana n'Ukwezi: Amafoto icyenda atangaje ya 2026 kugeza ubu

Inzobere mu mafoto no gufata amafoto iratwereka amwe mu mafoto akurura imboni yafashwe muri uyu mwaka kugeza ubu – n'icyo avuze ku bugeni bw'amafoto n'ubuzima.

1. Perezida Maduro n'umugore we muri yombi

Ifoto y'aba bari abakomeye cyane, Perezida Nicolás Maduro n'umugore we, Cilia Flores – bambitswe amapingu batwawe n'abashinzwe umutekano mu ntangiriro z'uyu mwaka ubwo bagezwaga muri Amerika, ni imwe mu zarebwe na benshi.

Uku kuvana aba bantu bakomeye ku butegetsi byatekerejwe na mbere n'abanyabugeni nka Charles Eastlake wigeze gutekereza agashushanya Umwami Napoleon w'Ubufaransa yafashwe nk'imfungwa.

Ibi byabayeho kuri Maduro bishyingurwa muri iyi foto yakwiriye henshi.

2. Ababyinnyi ba Bagarumba

Ni ifoto itangaje yo mu kirere y'ababyinnyi b'imbyino gakondo ya Bagarumba muri Mutarama(1) uyu mwaka bariho bitegura guca umuhigo wa Guinness World Record w'abantu benshi cyane bateranye babyina iyo njyana bita kandi "imbyino y'ikinyugunyugu" bari muri Sarusajai Stadium i Guwahati mu Buhinde.

Imyambarire, amabara no guhuza neza mu ntambuko byavuyemo iyi foto yanogeye imboni za benshi.

3. 'Drone' yo muri Ukraine

Ifoto nayo yo muri Mutarama y'umusirikare wa Ukraine afashe 'drone' y'ubutasi n'ikirere kiri hejuru ye hafi y'imirongo y'imbere ku rugamba mu ntambara barwanamo n'Uburusiya, yerekanye ubuhanga bw'uwayifashe.

Yayifatiye hasi, aho nta kindi kintu kiri mu ifoto uretse uyu mugabo uyifashe nk'ugiye kuyohereza. Yerekana ubushobozi n'ubuhanga bwo gufotora ku mirongo y'imbere ku rugamba.

4. Umuvandimwe w'Umwami muri yombi

Ifoto yafatiwe kure na Phil Noble yerekana uwari igikomangoma cy'Ubwongereza Andrew Mountbatten-Windsor arimo atwarwa na polisi mu kwezi kwa kabiri yatumye benshi bagaruka ku ngufu z'ubutabera imbere y'ubwami mu Bwongereza.

Uburyo uyu muvandimwe w'Umwami Charles yabonekaga ahangayitse kandi akanuye amaso byatumye yongera kwibukwa ubwo yari intumwa y'Ubwongereza ishinzwe ubucuruzi hagati ya 2001 na 2011.

5. Punch, inkende yishwe n'irungu

Ifoto yafashwe muri Gashyantare(2) ahororerwa inyamaswa hitwa Ichikawa City Zoo mu Buyapani, yerekana makaku yitwa Punch irimo kurebana impuhwe igishusho cy'inyamaswa ya orangutan yicaye iruhande rwayo, ni imwe mu zakunzwe cyane kugeza ubu muri ako karere k'isi.

Igishyika n'impuhwe mu maso by'iyi makaku biboneka mu mboni yayo muri iyi foto bisobanura ubwigunge bwibasira inyamaswa ziba mu bigo zororerwamo aho kuba mu mashyamba mu buturo karemano bwazo.

6. Injangwe muri Syria

Ifoto y'injangwe iri mu modoka itwaye imifariso irimo kureba mu kirahure cy'ibara ry'iroza, biboneka ko ihangayikishijwe n'ikintu cyangwa umuntu.

Iyi foto yafashwe mu gihe abaturage b'aba-Kurde bari barahunze intambara muri Syria batangiye gutaha iwabo nyuma yo kumvikana hagati ya leta n'umutwe w'inyeshyamba.

Iyi foto kuri bamwe isobanuye itandukaniro ryo mu rugo no mu buhungiro n'uburyo abantu mu guhunga no guhunguka badasiga iby'ibanze nkenerwa ariko n'ibyo bakunda kurusha ibindi, nk'injangwe.

7. Umukororombya n'ubwato i Sydney

Muri Mata(4), ubwato bwite bwo mu bwoko bwa Yatch bwafotowe burimo kugenda busa n'ububisikana n'umukororombya uri mu kirere cy'icyambu cya Sydney Harbour muri Australia.

Umukororombya n'abantu mu ifoto byibutsa benshi ubwiza karemano bw'isi, imbaraga z'isi n'ubuhanga bw'abantu mu gusobanura ibiyibaho nk'umukororombya, ndetse n'ukwemera kuri bamwe ko ari ikimenyetso cy'isezerano ry'Imana n'abantu.

8. Kurenga kw'isi imbere y'ukwezi

Iyi foto yafashwe na Christina Koch ari mu butumwa Artemis II muri Mata(4) bwagiye mu kirere cy'ukwezi, yerekana isi irimo kurenga buhoro buhoro inyuma y'agace k'ukwezi kazwiho kurangwa n'umwijima.

Iyi shusho na mbere y'uko ifatwa yagiye itekerezwa inashushanywa n'abanyabugeni mu myaka ya kera. Berekana isi irimo kugendagenda mu kirere ibisikana n'izindi nyenyeri ndetse n'ukwezi.

Christina yabibonye n'amaso ye anafata iyi foto.

9. Ikibuga cy'umupira muri Gaza

Ifoto idasanzwe yo mu kirere yerekana ikibuga cy'umupira gitunganyije neza muri Gaza ariko kiri hagati y'amatongo y'inzu zashenywe n'ibitero by'ingabo za Israel.

Iki kibuga gisobanuye icyizere hagati mu bibazo bikomeye cyane n'ingaruka z'intambara y'imyaka ibiri yashenye Gaza mu buryo bukomeye, ifoto yacyo yigaruriye imitima ya benshi bakurikiranye iby'iyi ntambara.