Amerika niyarekura ibombe, ingabo zabo mu karere zizokwicwa – Umushikiranganji mushasha wa Iran ajejwe kwivuna abansi
Ahavuye isanamu, Reuters
Mu gihe Inama nshingamateka yariko iratora kugira yemeze abashikiranganji bashasha, Mehrdad Akhlaqi yishuye abamenyeshamakuru ku bijanye n'uko Amerika yoshobora gukoresha ikibombe gikomeye cane kizwi nka "nyina w'amabombe yose" (Mother of All Bombs).
Yavuze ati: "Twarafashe ingingo zikenewe kuri ico kibazo kandi turatekanye. Turiko dukora akazi kacu ata bwoba, twizigiye ubushobozi bwacu."
Ahejeje kwemezwa nk'umushikiranganji mushasha ajejwe kwivuna abansi, Akhlaqi yavuze kandi ko Perezida wa Reta Zunze Ubumwe za Amerika "akwiye kwiyumvira ingene yokura abasirikare biwe muri aka karere mu mutekano. Niyatera ikibombe, azoca abona igitigiri c'abasirikare biwe azobwirizwa gukura muri aka karere baryamitswe n'impfu."
Nk'uko uwo mushikiranganji wa Iran abivuga, "Ico ni co nyene catumye Amerika idashika aho ifata iyo ngingo gushika ubu. Ariko rero, niyahindura iterabwoba ryayo rikava mu majambo gusa rigashirwa mu ngiro, izobona ingaruka zavyo."
