Cap o £21 ar gost presgripsiwn anifeiliaid dan reolau newydd
- Cyhoeddwyd
Bydd cap o £21 yn cael ei gyflwyno ar ffioedd presgripsiwn gan filfeddygon yn rhan o newidiadau y mae'n rhaid i filfeddygfeydd eu cyflwyno dros y misoedd nesaf.
Bydd yn rhaid i filfeddygon hefyd ddweud wrth gwsmeriaid os oes meddyginiaeth rhatach ar gael ar-lein, rhoi amcan bris cyn triniaeth a chyhoeddi rhestr brisiau am wasanaethau.
Mae cwsmeriaid wedi croesawu'r newidiadau ond mae 'na bryder ymysg milfeddygon am neges y mesurau newydd.
Mae Macauley Cook yn addoli Simba'r ci ond mae'n gallu bod yn ddrud pan mae'n sâl
Mae Simba yn rhan bwysig o fywyd Macauley Cook.
I nifer o berchnogion anifeiliaid anwes fel Macauley mae'r gost o gadw nhw'n iach, yn enwedig biliau milfeddygol, yn gallu bod yn sioc.
"Ambell waith ni wedi cael antibiotics, cael infection unwaith ac o'dd y drugs yn costio lot," meddai.
"Ni wedi dewis peidio cael yswiriant ond mae'n sioc wedyn pan ti'n mynd i'r fet a chael y bil.
"Ti'n gallu ffindio allan y gost os ti'n ffonio nhw ond mae'n [teimlo] fel bo nhw'n cadw fe'n eitha secret a rhoi e i ti ar ôl yr operation."
Mae milfeddygon wedi ennill ymddiredaeth y cyhoedd ar hyd yr amser, medd Kate O'Sullivan o Filfeddygfa Ystwyth
Mae'r corff sy'n goruchwylio cystadleuaeth rhwng cwmnïau wedi cyflwyno mesurau newydd wedi i ymchwiliad i'r sector ddangos bod prisiau wedi codi bron i ddwywaith cyfradd chwyddiant.
O dan y rheolau newydd bydd yn rhaid i filfeddygon gyflwyno amcangyfrif o unrhyw driniaeth sy'n costio mwy na £500. Bydd hi'n ofynnol nodi cost gofal wedi'r driniaeth a rhestru'r costau'n unigol.
Yn ddibynnol ar faint y cwmni mae gan filfeddygon hyd at 12 mis i gyflwyno'r holl newidiadau.
'Gwneud synnwyr' i gynnig gradd gyfan milfeddygaeth yn Aberystwyth
- Cyhoeddwyd2 o ddyddiau yn ôl
Millie y Shih Tzu gofalgar yn cael croeso mawr gan gleifion
- Cyhoeddwyd25 Awst
Mae rhai milfeddygon, fel Kate O'Sullivan o Filfeddygfa Ystwyth yn Aberystwyth yn poeni am y neges mae'r mesurau newydd gan yr Awdurdod Cystadleuaeth a Marchnadoedd yn ei hanfon.
"Maen nhw wedi bod yn emphatic iawn am brisiau moddion - yn fwy na dim byd arall," meddai.
"Fi'n ofni bo nhw yn hela'r cyhoedd i feddwl bo' ni'n ddrud ymhobman.
"Dan ni wastad wedi bod yn broffesiwn sydd gyda ymddiriedaeth y cyhoedd a licen i feddwl bo' ni wedi ennill hynny on merit.
"Mae hyn, mewn ffordd, yn dinistrio'r teimlad yna."
Mae'n bwysig bod milfeddygfeydd yn dryloyw, medd Ifan Lloyd
Mae Ifan Lloyd yn aelod o Gyngor Cymreig Cymdeithas Milfeddygol y BVA.
Mae'n dweud ei fod yn "bwysig bod busnesau milfeddygol mor transparent â maen nhw'n medru bod a'u bod yn gallu cydweithio gyda pherchennog yr anifail".
"Ni'n siarad yn bennaf am anifeiliaid anwes fan hyn fel bod cwsmeriaid yn gwybod beth fydd y costau yn gallu bod a'r gwahanol opsiynau triniaeth - yn enwedig pan mae triniaethau cymhleth yn costi tipyn o arian."
Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.
Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.
Lawrlwythwch yr ap am y diweddaraf o Gymru ar eich dyfais symudol.
