Croesawu profion i adnabod cŵn gan fod ymosodiadau ar dda byw yn 'torri calon'

Mae ffermwr o ogledd Cymru wedi croesawu'r defnydd o brofion DNA i helpu'r heddlu ymchwilio i ymosodiadau gan gŵn ar stoc.

Ym mis Mawrth daeth newidiadau i'r gyfraith sy'n golygu bod hawl gan yr heddlu i gymryd samplau DNA gan gŵn sydd o dan amheuaeth o ymosod ar anifeiliaid.

O dan y ddeddf newydd, gall swyddogion roi dirwyon di-derfyn i berchnogion cŵn sy'n ymosod ar anifeiliaid, cynnal profion DNA, a chadw cŵn am gyfnod amhenodol.

Y gobaith yw y bydd yn helpu i adnabod y cŵn sy'n gyfrifol, a dwyn mwy o berchnogion y cŵn hynny gerbron y llysoedd.

Yn ôl Daniel Jones, sy'n ffermio ar y Gogarth ger Llandudno, mae ymosodiadau gan gŵn yn broblem barhaus ac yn "torri calon" ffermwyr.

"'Da ni wedi cael dipyn o gŵn yn ymosod ar y defaid ac i ddweud y gwir mae'n broblem enfawr yma," meddai.

"Mae o'n effeithio'r system ffermio o ddydd i ddydd.

"Mae'r defaid yn gorfod mynd drwy lot hefo cael eu hymosod gan gŵn, ond hefyd mae'n cael effaith ofnadwy ar y ffermwyr.

"'Da ni'n trio edrych ar ôl y defaid y gorau medran ni, ond pan mae rhywbeth fel hyn yn digwydd mae o'n torri calon rhywun i ddweud y gwir."

Mae cwmni yswiriant NFU Mutual yn amcangyfrif bod gwerth dros £350,000 o anifeiliaid fferm wedi'u lladd neu eu hanafu'n ddifrifol gan gŵn yng Nghymru y llynedd.

Mae'r heddlu hefyd yn amcangyfrif bod tua 300 o ymosodiadau wedi digwydd dros yr un cyfnod.

Dywedodd Rob Taylor, Cydlynydd Bywyd Gwyllt a Throseddau Gwledig Cymru, bod y pwerau newydd yn arbennig o ddefnyddiol mewn achosion lle mae perchnogion yn gwadu mai eu ci nhw oedd yn gyfrifol.

"Yn y rhan fwyaf o achosion mae perchnogion yn cydweithio, yn ymddiheuro ac yn talu iawndal i'r ffermwr," meddai.

"Ond mae'r gallu i gymryd sampl DNA yn hynod ddefnyddiol mewn achosion lle mae perchennog yn honni mai nad ei gi o neu hi oedd ar fai."

Dywedodd PC Ian Nicholls o dîm troseddau gwledig Heddlu Gogledd Cymru, bod ymosodiadau o'r fath yn rhan sylweddol o waith y tîm.

"Maen nhw'n digwydd yn gyson," meddai.

"Mae'r profion DNA yn ein helpu ni i adnabod cŵn, ac maen nhw hefyd yn anfon neges fod gan yr heddlu ffyrdd newydd o ymchwilio i'r troseddau hyn."

Mae ffermwyr ledled Cymru hefyd wedi cael pecynnau samplu fel rhan o brosiect ymchwil newydd.

Bydd ymchwilwyr ym Mhrifysgol Liverpool John Moores wedyn yn dadansoddi'r samplau er mwyn canfod y ffordd orau o gasglu tystiolaeth DNA ar ôl ymosodiad.

Yn ôl ar ben y Gogarth, dywedodd Daniel Jones ei fod yn croesawu'r datblygiad, ond pwysleisiodd mai atal yr ymosodiadau yn y lle cyntaf ydy'r flaenoriaeth o hyd.

"Mae'r pethau newydd sydd wedi dod i mewn hefo testio DNA yn gam positif iawn, mae'n gam yn y ffordd gywir," meddai.

"Ond be' da ni isio ydy i bobl barchu cefn gwlad.

"'Da ni isio fo stopio cyn iddo fo ddigwydd, i ddweud y gwir."

Dilynwch Cymru Fyw ar Facebook, dolen allanol, X, dolen allanol, Instagram, dolen allanol neu TikTok, dolen allanol.

Anfonwch unrhyw syniadau am straeon i cymrufyw@bbc.co.uk, dolen allanol neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.