Ffrae am dâl rhwng chwaraewyr rygbi Cymru a'r undeb cyn gemau'r haf

URCHuw Evans Picture Agency

Mae ffrae rhwng chwaraewyr ac Undeb Rygbi Cymru am faint o dâl maen nhw'n ei dderbyn am gynrychioli eu gwlad wedi amharu ar baratoadau'r garfan ar gyfer Pencampwriaeth y Cenhedloedd.

Bydd y crysau cochion yn wynebu Fiji, Yr Ariannin a De Affrica yn yr wythnosau nesaf.

Bu trafodaethau rhwng y corff llywodraethol a Chymdeithas Chwaraewyr Rygbi Cymru ynghylch "telerau cyflogaeth", ac fe wnaethon nhw ddod i gytundeb yn hwyr brynhawn Mercher er mwyn sicrhau bod modd i'r gêm yn erbyn Fiji fynd yn ei blaen.

Roedd disgwyl i garfan Cymru gynnal cynhadledd i'r wasg am 14:10 ddydd Mercher ac roedd disgwyl i ddau chwaraewr siarad yn y gynhadledd.

Ond yn dilyn oedi o dros awr, fe wnaeth y garfan benderfynu peidio â chynnal y gynhadledd oherwydd yr anghydfod gydag URC.

O ganlyniad, bu'n rhaid gohirio'r gynhadledd i'r wasg yn ogystal â chyfweliadau gyda S4C.

Cafodd trafodaethau pellach eu cynnal, cyn dod i gytundeb ychydig cyn 17:00.

Dyma broblem arall i ychwanegu at y rhestr o heriau sydd wedi wynebu'r chwaraewyr a'r undeb.

Roedd y garfan yn agos at streicio ar noson y gêm gartref yn erbyn Lloegr ym Mhencampwriaeth y Chwe Gwlad yn 2023.

Mae cyfnod Steve Tandy wrth y llyw hefyd wedi cael ei effeithio gan ansicrwydd oherwydd cynnig URC i leihau nifer rhanbarthau proffesiynol y dynion o bedwar i dri - cynllun maen nhw'n bwriadu ei weithredu erbyn 2028.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.